لیکوال: دوکتور نورمحمد محبي
قران تل پاتې معجزه (برخه: ۷۱)
د سمندري جریانونو حیرانوونکی سیسټم
که انسان د سمندرونو ژورو ته پام وکړي پوهېږي چې د نړۍ اوبه په دوامداره توګه د حرکت په حال کې دي. د سمندر هر څاڅکی اوبه له استوا څخه تر شمالي قطب پورې څو کلن سفر کوي او ځينې يې له دې مسيرونو څخه تر (پنځلس زره کيلو مترو) پورې اوږدوالی لري.
په دې لوی بهیر کې اصلي عامل د «اوبو د تودوخې او کثافت توپير[1]» دی. په استوایي سیمو کې اوبه ګرمېږي، پراخېږي او سطح یې شاوخوا «شل سانتي متره» لوړېږي. دا لوړوالی د دې لامل کېږي چې دا جریانونه له استوا څخه شمال او جنوب لور ته وخوځېږي؛ برعکس په قطبي سیمو کې اوبه یخې او درنېږي، ښکته ځي او د استوا پر لور ژور جریانونه رامنځته کوي.
په دې توګه په ټولو سمندرونو کې د سطحي او ژورو جریانونو یو حیرانوونکی نظام رامنځته کېږي؛ داسې نظام چې د هغه دقیق تنظیم د الهي حکمت یوه څرګنده نښه ده.
د خلیج په جریان کې معجزه (Gulf Stream)
د الله تعالی د قدرت یوه لویو نښه «د خلیج جریان» دی؛ د خلیج جریان د تودو اوبو ستر جریان چې د مکسیکو له خلیج څخه پیل او د اروپا تر سواحلو پورې غځېدلی دی؛ په دې بهیر کې د جریان سرعت شاوخوا «اته کیلومتره پر ساعت» دی؛ یعنې که کومه کښتۍ د دې جریان په اوږدو کې ودرېږي او خپل انجنونه بند کړي، نو بیا هم د همدې سرعت په اندازه پر مخ ځي.
د دې جریان پلنوالی له «اتیا کیلومترو» څخه ډېر دی او ژوروالی یې شاوخوا «څلور سوه پنځوس مترو» ته رسېږي، چې په هره دقیقه کې له «څلور میلیونو ټنو» څخه ډېرې اوبه پکې په حرکت راځي.
دا ستر جریان په هر «لسو ورځو کې شاوخوا (۱۳۰) زره ټنه قطبي یخونه» ويلي کوي او د «اروپا د هوا په معتدلوالي» کې ډېر مهم رول لري؛ داسې چې که دا جریان له حرکت څخه ولوېږي، د اروپا لویې برخې به په سړو او یخ پوښو سیمو بدلې شي.
د جنوبي امریکا په سواحلو کې ساړه جریانونه
د پورته تود جریان په مقابل کې په سويلي نیمه کره کې یو «سوړ جریان» له منجمد جنوبي سمندر څخه د «پېرو او چیلي» ساحلونو پر لور حرکت کوي.
دا سوړ جریان د «سمندري نباتاتو او واښو» (فیتو پلانکتونونو) لویه اندازه له ځان سره وړي. دغه نباتات د اوبو په سطح کې وده کوي او میلیونونه ټنه «ساردین کبان» په ځان کې رانغاړي. دغه کبان د میلیونونو «سمندري مرغانو» خواړه دي. د دغو مرغانو شمېر ان تر «پنځوس میلیونو» رسېږي. د دوی فاضله مواد چې د عضوي او معدني موادو له پلوه غني دي، د «تر ټولو غوره طبیعي سرې» (Guano) په توګه راټوله او نورو هېوادونو ته صادرېږي.
د حیرانتیا وړ خبره دا ده چې د پېرو او چیلي د خلکو د اقتصاد لویه برخه پر همدې طبیعي سرې (Guano) ولاړه ده؛ هغه محصول چې د یوه دقیق او حکیمانه خلقت په پایله کې رامنځته شوی دی.
خو کله چې الله تعالی وغواړي او د دې جریان مسیر لږ څه بدل کړي؛ سمندري بوټي کمېږي، کبان له منځه ځي، مرغان وږي پاتې کېږي او انسانان له اقتصادي پلوه له کمښت او قحطۍ سره مخ کېږي. دا روښانه حقیقت دی چې « روزي او نعمت د رزاق او متین څښتن تعالی په لاس کې ده.»
«إِنَّ ٱللَّهَ هُوَ ٱلرَّزَّاقُ ذُو ٱلقُوَّةِ ٱلمَتِینُ.»[2] ژباړه: «پرته له شکه همغه الله ښه روزي ورکوونکی محکم (کلک) قوت والا دی.»
د الله تعالی په قدرت کې فکر کول
په دې نړۍ کې هره ذره، د سمندرونو له حرکت څخه نیولې تر یوې کوچنۍ مرغۍ پورې، د خدای جل جلاله پر یووالي او تقوا شاهدي ورکوي.
فوا عجباً كیف یعصى الإلهُ أو كیف یجحدهُ الجاحدُ
وفی كلّ شیءٍ له آیةٌ تدلّ على أنّه واحدُ
ژباړه: څومره حیرانوونکې ده چې د خدای جل جلاله نافرماني کوي؛ څنګه انکار کوونکی له هغه ذات څخه انکار کوي چې په هر څه کې د هغه داسې نښې دي، چې شاهدي ورکوي، الله یو دی.
چا دا حیرانوونکی نظام رامنځته کړی دی؟ چا د اوبو، جریانونو، نباتاتو او مرغانو مسیر داسې تنظیم کړی دي، چې هره برخه د بلې برخې لپاره روزي وي؟ پرته له علیم او حکیم الله څخه، هېڅ ځواک د داسې تنظیم وړتیا نه لري.
قرآن کریم موږ ته بلنه راکوي چې د دې ایت په اړه فکر وکړو: «سَنُرِیهِم ءَایٰتِنَا فِی ٱلأٓفَاقِ وَفِیٓ أَنفُسِهِم حَتَّىٰ یتَبَینَ لَهُم أَنَّهُ ٱلحَقُّ.»[3] ژباړه: «ژر دی چې موږ به در وښايو تاسو ته خپلې نښې په څنډو (د اسمان) کې او ستاسو په نفسونو کې، چې ښکاره شي چې دا (قرآن) حق دی.»
په پایله کې باید وویل شي چې د قرآن کریم په کلماتو کې له دقیق عددي نظم څخه نیولې د سمندرونو تر حرارتي او بیولوژیکي نظام پورې، ټول په دې واحد حقیقت شاهدي ورکوي چې: قرآن کریم د الله تعالی وینا ده او د نړۍ خلقت د همدې وینا څرګندونه ده.
په هره اندازه چې علم پرمختګ کوي په هماغه اندازه د قرآن کریم د معجزو نور رازونه هم را څرګندېږي او کله چې انسان د زړه سترګې پرانېزي، نو د سمندر په هره څپه او د خاورې په هره ذره کې به د لوی خدای جل جلاله نښې ومومي. هغه خدای جل جلاله چې: «إِنَّ ٱللَّهَ هُوَ ٱلرَّزَّاقُ ذُو ٱلقُوَّةِ ٱلمَتِینُ.»[4] ژباړه: «پرته له شکه همغه الله ښه روزي ورکوونکی محکم (کلک) قوت والا دی.»[5]
دوام لري…
مخکینۍ برخه
سرچینې
[1]. چگال یعنی: حجمی کم، اما با جرم یا انرژی بسیار زیاد.
[2]. الذاریات: 58.
[3]. فصلت: 53.
[4]. الذاریات: 58.
[5]. فشردۀ مطلب از: موسوعة الإعجاز العلمي في القرآن والسنة، ج 2، ص 102-107.