۳- د رسول الله صلی الله علیه وسلم له وفات وروسته د هغه د ښخولو په اړه شخړه
د رسول الله صلی الله علیه وسلم له وفات وروسته، د هغه د ښخېدو په ځای شخړه پیدا شوه، خو دا موضوع د نبوي حدیث پر بنسټ حل شوه. په «الکامل: ۳/۲۲۵» تاریخ او نورو کتابونو کې راغلي: کله چې دا شخړه رامنځته شوه، حضرت ابوبکر صدیق رضي الله عنه وفرمایل: ما له رسول الله صلی الله علیه وسلم څخه اورېدلي دي چې ویې فرمایل: «هر پیغمبر په هغه ځای کې ښخ کېږي چې وفات شوی وي.»
د دې حدیث له اورېدو وروسته شخړه حل شوه، او د رسول الله صلی الله علیه وسلم مبارک جسد د صحابه کرامو په اجماع سره په هغه ځای کې خاورو ته وسپارل شو چې پکې وفات شوی و.
۴- د قرآن کریم راټولول
د اسلام په تاریخ کې یو له مهمو پیښو څخه د قرآن کریم راټولول دي. کله چې حضرت عمر رضي الله عنه حضرت ابوبکر صدیق رضي الله عنه ته وړاندیز وکړ چې قرآن په یوه مصحف کې د دوو تختو ترمنځ راټول شي، حضرت ابوبکر په پیل کې وویل: «زه څنګه هغه کار وکړم چې رسول الله صلی الله علیه وسلم نه دی کړی؟»
تر څو چې الله د هغه زړه پراخ کړ او ډاډ یې ورکړ. هغه بیا حضرت زید بن ثابت رضي الله عنه ته دنده وسپارله چې قرآن راټول کړي. زید بن ثابت هم په پیل کې ورته خبره وکړه: «څنګه داسې کار ترسره کړم چې رسول الله صلی الله علیه وسلم نه دی کړی؟»
خو وروسته هغه ته هم الله ډاډ ورکړ، او دا لوی مسؤولیت یې ترسره کړ. له دې پېښې ښکاري چې صحابه کرام رضي الله عنهم د ستونزو په حل کې د رسول الله صلی الله علیه وسلم د سنتو پیروي لومړیتوب باله.
۵- د انا میراث
په موطا امام مالک کې روایت شوی دی چې د یو سړي انا وفات شوه، او هغه د میراث غوښتنه وکړه. حضرت ابوبکر صدیق رضي الله عنه ورته وویل: «د الله په کتاب کې ستا لپاره څه نه لرو، او د رسول الله صلی الله علیه وسلم په سنتو کې هم ستا لپاره څه نه وینو.»
خو حضرت مغیره رضي الله عنه شاهدي ورکړه چې رسول الله صلی الله علیه وسلم د انا میراث شپږمه برخه ټاکلې وه. کله چې بل شاهد (محمد بن مسلمه انصاري) هم دا خبره تایید کړه، حضرت ابوبکر د انا میراث د سړي لپاره وټاکه.
۶- د مجوسیانو جزیه
کله چې فارس د اسلامي خلافت برخه شوه، حضرت عمر رضي الله عنه د مجوسیانو په اړه شک وکړ چې ایا ترې جزیه اخیستل کېږي؟ ځکه په قرآن کریم کې یوازې د اهل کتاب (یهود او نصارا) په اړه د جزیې یادونه شوې ده. تر دې چې عبدالرحمن بن عوف رضي الله عنه شاهدي ورکړه چې رسول الله صلی الله علیه وسلم د «حجر» سیمې له مجوسیانو څخه جزیه اخیستې وه. د دې شاهدي پر اساس، حضرت عمر هم له هغوی څخه جزیه واخیسته.
By محمد فاتح