لیکوال: ډاکټر نورمحمد محبي
قرآن؛ تلپاتې معجزه (برخه: ۸۷)
دویمه برخه: د زرافې په خلقت کې اعجاز( ادامه)
۱. په خلقت کې د دقت په اړه قرآني آیتونه
الله تعالی فرمایي: «صُنعَ ٱللَّهِ ٱلَّذِیٓ أَتقَنَ كُلَّ شَیءٍ»[1]؛ ژباړه: «(وګورئ) كاریګري د الله هغه چې هر شى يې محكم كړى دى.»
زرافه د همدې دقت او بېنقصه خلقت یو ښکاره مثال دی.
۲. د قد لوړوالی او جسمي جوړښت
زرافه له تر ټولو لوړو ژوندیو موجوداتو څخه ده. له شپږو مترو څخه لوړ قد لري، شاوخوا یو ټن وزن یې دی او د ۶۰ کیلومتره په سرعت سره منډه وهي. دا لوی موجود، سره له دې چې د غاړې قد یې په غیرعادي ډول لوړ دی، خو یو حیرانوونکی توازن لري.
۳. د ۳۶۰ درجې لید: د څار ځیرک سیستم
الله تعالی زرافې ته دوه مجهزې سترګې ورکړې دي چې د ۳۶۰ درجې لید وړتیا لري. په داسې حال کې چې غاړه یې د ځمکني برج په څېر له پورته خوا ولاړه وي او سترګې یې ټول افق تر نظر لاندې نیسي. دا حیوان د چاپېریالي پوهې له پلوه له تر ټولو خوندي موجوداتو څخه شمېرل کېږي.
۴. د حیواناتو ترمنځ تر ټولو اوږده غاړه
د زرافې غاړه زموږ په کره کې د ټولو شته موجوداتو په پرتله اوږده ده، چې اوږدوالی یې تر یو نیم متر زیات دی. دومره اوږده غاړه دقیق فزیولوژیکي فعالیت ته اړتیا لري چې بدن ته د اکسیجن په رسولو کې له ستونزې سره مخ نه شي.
۵. د غاړې د ټیټولو پر مهال د وینې د دوران په نظام کې اعجاز
د زرافې تر ټولو حیرانوونکې ځانګړنه دا ده چې د وینې د فشار د تنظیم بېساری نظام لري.
طبیعي ستونزه
کله چې زرافه د بوټو د خوړلو لپاره ځمکې ته خپل سر ټېټوي، نو د جاذبې قوې له امله د وینې فشار په ډېر شدت سره د سر برخې ته ځي او په طبیعي ډول باید د رګونو د چاودېدو، د دماغي وینېبهېدنې، یا لږ تر لږه د بېهوښۍ لامل شي؛ خو له زرافې سره داسې نه کېږي او له دا ډول خطراتو څخه خوندي ده.
الهي حللاره
الله تعالی د زرافې د غاړې په رګونو کې:
۱. انعطافمنونکي عضلا ځای پر ځای کړې دي چې د وینې د زیاتېدو پر مهال رګونو ته پراخوالی وربښي او اضافي وینه په ځان کې ځای پر ځای کوي؛
۲. الله تعالی د زرافې د غاړې په رګونو کې ځانګړي سوري پیدا کړې دي چې کله سر په ناڅاپي ډول پورته شي، نو دغه سوري بندېږي، ترڅو په چټک ډول بېرته د وینې د را ګرځيدو مخه ونیسي؛
۳. وروسته رګونه همدا سوري ورو ورو خلاصوي او وینه په تدریجي ډول بېرته بدن ته راګرځوي.
د زرافې دا ډول حیرانوونکی جوړښت د الهي خلقت او بشپړ دقت یو څرګند مثال دی.
۶. د زرافې د زړه ځواک
د زرافې زړه په هره دقیقه کې «۵۵ لیټره وینه» پمپ کوي؛ د وینې فشار یې د نورو حیواناتو په پرتله ډېر لوړ دی او داسې ځواکمن عضلات لري چې د څو مترو لوړې غاړې تر پایه پورې وینه رسوي. د پمپ کولو دغه ځواک د هغې دقیقې الهي انجنیرۍ یوه برخه ده چې دماغو ته د وینې رسول یقیني کوي.
۷. زرافه؛ د خلقت په برخه کې د دقت او حکمت نښه
په ځمکه او اسمان کې هېڅ داسې مخلوق نشته چې الله تعالی دې په غوره بڼه نه وي پیدا کړی او په خلقت کې دې یې تفاوت، ګډوډي یا نیمګړتیا ولېدل شي.
«مَّا تَرَىٰ فِی خَلقِ ٱلرَّحمَٰنِ مِن تَفَٰوُتٖۖ»[2]؛ ژباړه: «ته به د الله په پيدایښت کې هیڅ ډول عیب ونه وینې.»
هر څومره چې انسان د مخلوقاتو په جوړښت کې زیات غور او دقت وکړي، همغومره به د الله تعالی د قدرت، حکمت، علم او رحمت له نورو نښو سره مخ شي.
آس د وفادارۍ، زړورتیا، تېزهوښۍ او ځواک او همدارنګه زرافه د خپل لوړ قامت، د وینې د فشار د معجزهډوله نظام او پراخ لید له امله دواړه د الهي عظمت څرګندې نښې دي. هر یو یې داسې کتاب دی چې ثابتوي الله تعالی علیم، حکیم، خبیر، قادر او حمید دی او د الله تعالی خلقت ټول له اعجاز او اتقان څخه ډک دی.
الله تعالی انسان په خپل خلقت کې فکر او تدبر ته رابولي: «قُلِ ٱنظُرُواْ مَاذَا فِی ٱلسَّمَٰوَٰتِ وَٱلأَرضِ»[3]؛ ژباړه: «ورته ووایه چې هغه دلایل په غور وګورئ چې په اسمانونو او ځمکه کې دي.»
ادامه لري…
مخکینۍ برخه | راتلونکې برخه
سرچینې:
[1]. النمل: ۸۸.
[2]. الملك: ۳.
[3]. یونس: ۱۰۱.