لیکوال: دوکتور نورمحمد محبي
قرآن؛ تلپاتې معجزه (برخه: ۷۷)
زنجبیل: د قرآن کریم او ساینس له پلوه یو معجزهيي بوټی
د زنجبیل هغه ګټې چې په قرآن کریم کې ذکر شوې دي:
زنجبیل په قرآن کریم کې د یوې ګټورې مادې په توګه یاد شوی دی:
«وَیُسْقَوْنَ فِیهَا كَأْسًا كَانَ مِزَاجُهَا زَنْجَبِیلًا»[1]
ژباړه: « او په دغه (جنت) كې به په دوى د شرابو داسې جامونه څښل كېږي چې ګډونى به يې زنجبیل وي.»
«إِنَّ الْأَبْرَارَ یشْرَبُونَ مِنْ كَأْسٍ كَانَ مِزَاجُهَا كَافُورًا.»[2]
ژباړه: « بېشكه نېكان خلق به د شرابو له داسې جامونو نه څښاك كوي چې د هغو ګډونى (امېزش) به كافور وي.»
په قرآن کریم کې زنجبیل ته اشاره د انسان د تغذیې او جسمي روغتیا په برخه کې د زنجبیل د اهمیت څرګندونه کوي.
د سنتي طب موندنې
د سنتي طب د سرچینو له مخې، زنجبیل لاندې ګټې لري:
۱. د خوړو په هضم کې مرسته کوي؛
۲. خېټه او کولمې نرموي؛
۳. بدن تقویه کوي او د التهاب ضد حیثیت لري؛
۴. د ستوني د التهاب او زکام لپاره ګټور دی؛
۵. د معدې او بندونو (مفصلاتو) دردونو له منځه وړي.
ابن قیم رحمهالله لیکي: «زنجبیل بدن ګرم ساتي، د خوړو په هضم کې مرسته کوي، خېټه نرموي، او په ځیګر کې د هغې انسداد مخه نیسي چې د یخوالي او لندبل له امله را پیدا کېږي. همدارنګه په معده او کولمو کې باد او ګازونه له منځه وړي، او د هغه ځیګر او معدې لپاره مناسب دی چې سوړ طبیعت لري.»[3]
معاصرې علمي موندنې
معاصرو طبي څېړنو هم ښودلې ده چې زنجبیل:
۱. د زړه عضله پیاوړې کوي او د وینې له جریان سره مرسته کوي؛
۲. رګونو او شریانونو ته وسعت ورکوي؛
۳. د وینې د پلاټېلېټونو(Platelets) له تجمع څخه مخنیوی کوي؛
۴. د وینې فشار او کولېسټېرول راکموي؛
۵. د بندونو (مفصلاتو) التهاب راکموي؛
۶. د هاضمې سیستم لپاره ګټور دی.
له پورته ځانګړتیاوو څخه په ډاګه کیږي چې زنجبیل نه یوازې د ناروغیو درملنه کوي، بلکې د ناروغیو د مخنیوي او د بدن د عمومي روغتیا په پیاوړتیا کې هم مهم رول لري.
پایله
په پایله کې باید وویل شي چې علمي، تاریخي او ديني څېړنې ښيي هغه طبي بوټي چې په قرآن کریم او احادیثو کې یادونه ترې شوې ده، لکه زنجبیل او توره دانه (سیاهدانه) نه یوازې دا چې واقعي طبي او وقایوي ځانګړتیاوې لري، بلکې د معاصرو علمي موندنو له مخې هم اغېزمن ثابت شوي دي.
سیاهدانه، چې په تېره برخه کې یې تفصیل وړاندې شو، د بدن دفاعي سیستم پیاوړی کوي، د میکروبونو د ودې مخه نیسي او له پنځوسو څخه د زیاتو ناروغیو لپاره ګټوره ده.
زنجبیل د زړه، رګونو او د هاضمي سیستم د پیاوړتیا لامل کیږي، د التهاب ضد دی او د مزمنو ناروغیو د مخنیوي ځانګړتیا لري.
د معاصرو علمي موندنو او ديني نصوصو ترمنځ دا همغږي، د قرآن کریم او د نبوي سنتو د علمي او طبي اعجاز یوه روښانه بېلګه ده، او دا ښيي چې د انسان د روغتیا د ساتنې په برخه کې د پیغمبر اکرم صلیاللهعلیهوآلهوسلم سپارښتنې تر نن ورځې پورې معتبرې او د عملي کېدو وړ دي.[4]
دوام لري…
مخکینۍ برخه
سرچینې:
[1]. الإنسان: ۱۷.
[2]. الإنسان: ۵.
[3]. «مسخن، معین على هضم الطعام، ملین للبطن، نافع من سدد الكبد العارضة عن البرد والرطوبة، محلل للریاح الغلیظة فی الأمعاء والمعدة، صالح للكبد والمعدة الباردتَي المزاج.» ابن قيم الجوزية، محمد بن أبي بكر بن أيوب بن سعد شمس الدين (ت ۷۵۱هـ)، الطب النبوي، جزء من كتاب زاد المعاد لابن القيم، ص ۲۴۰، الناشر: دار الهلال-بيروت.
[4]. د «موسوعة الإعجاز العلمي في القرآن والسنة» لنډه خلاصه ج ۲، ص ۲۳۱-۱۲۶.