لیکوال: ابورائف
فرماسونري (برخه: ۲۹)
په تېرو بحثونو کې مو د هغو سمبولونو، بڼو او نښو یوه برخه ولوستله چې د فراماسونرۍ ځانګړو معناوو، موخو او پیغامونو ته یې اشاره کوله او په یو ډول یې نړیوالو ته د دې حرکت ځانګړی پیغام رساوه. هغه پیغامونه چې اکثره یې د نورو پر برلاسۍ، سیاسي واکمنۍ، د نړۍ پر کنټرول، دوکې، چل او نیرنګ او نورو ورته مواردو ولاړ وو.
په دې بحث کې هم د دغو نښو او اشارو یوې بلې برخې ته تم کېږو.
د بېروحه شيانو سمبولونه او ځانګړې ماناوې
۱. د رڼا سمبول
که څه هم رڼا په لرغونو ختیځو تمدنونو کې د الهي تجلۍ، کایهاني خلقت، د خالق له لوري د نوې ژوند نښه او همدارنګه د روحي روښانتیا او صفاوالي استازیتوب کوي، خو په فراماسونري تفکر (په ځانګړي ډول په شاهي ماسونیت کې) په دې ډول تعبیریږي: هغه رڼا چې پر حضرت موسی علیهالسلام د غره پر سر راښکاره شوه، یا هغه رڼا چې د فلسطین پر لور د موسی علیهالسلام او د هغه د قوم د حرکت پر مهال د دوی مخې ته روانه وه.
خو په سمبولیک ماسونیت کې «رڼا» د انساني عقل د رڼا نښه بلل کېږي.[۱]
۲. د اور سمبول (د ازادۍ مشعل)
د اور سمبول د دې مانا ورکوي چې پخوانی نړیوال نظم له منځه یوړل شي او د فراماسونرۍ له خوا نوی نړیوال نظم رامنځته شي، په داسې حال کې چې د دوی مخې ته د مشعل وړونکی، یعنې شیطاني معبود «لوسیفر» حرکت کوي. دا اور دوه ماناوې لري:
الف) د فکر، ارادې او پاکوالي روښانوونکی؛
ب) سخته او پرېکنده ویجاړي او جګړه.[۲]
داسې ښکاري چې یاد سمبول دې ته اشاره کوي چې ماسونیان غواړي نړۍ یو ځل بیا له سره ورغوي او یو نوی نظم پرې حاکم کړي.
۳. د معکوس صلیب سمبول («د پطرس صلیب»)
که څه هم معکوس صلیب په عیسوي دود کې د قدیس پطرس د تواضع نښه بلل کېږي (ځکه نوموړي ځان د دې وړ نه ګاڼه چې د حضرت عیسی مسیح په څېر مصلوب شي) خو په فراماسونري تفکر کې د ماسوني شیطانپالو له نښو څخه ګڼل کېږي او د عیسوي کلیسا د دودیزو دیني باورونو او ښوونو د رد او مخالفت څرګندونه کوي.[۳]
داسې ښکاري چې یاد سمبول هم په یو ډول له مسیحیت سره د ټکر او تضاد څرګندونه کوي.
۴. د مات صلیب سمبول (سواستیکا)
یاد سمبول د لرغونو تمدنونو، په ځانګړي ډول د اسیايي تمدنونو زېږنده دی او د نېکمرغۍ، تلپاتېوالي، ابدیت، د تلپاتې لمر او د هغه د حرکت او همدارنګه د څلورو لورو نښه بلل کېده.
خو د فراماسونرۍ او شیطانپالو په فکر کې د نازي ګوند د یرغلګر او نژادپاله افکارو د ستاینې تظاهر ګڼل کېږي.[۴]
دوام لري…
مخکینۍ برخه
سرچینې:
[۱] الرموز فی الفن والأِدیان والحیاة، مخ: ۳۳۵.
[۲] إشارات رموز وأساطیر، مخ: ۵۵-۵۷.
[۳] قصة الرمز الدینی، مخ: ۱۸۰، الرموز فی الفن والأدیان والحیاة، مخ: ۳۸۸.
[۴] عباد الشیطان أخطر الفرق المعاصرة، مخ: ۱۴۷