لیکوال: محمد عاصم اسماعیل زهي
د ډاروین نظریه (شپږمه برخه)
د انسان د نسل دوام او د هغه تکویني سیر – د هغه د نسل پایښت
قرآن کریم د لومړي انسان له یادولو وروسته، د هغه د نسل پایښت د نطفې له لارې یاد کړی او وایي:
«وَبَدَأَ خَلْقَ الإِنْسَانِ مِنْ طِينٍ * ثُمَّ جَعَلَ نَسْلَهُ مِنْ سُلَالَةٍ مِنْ مَاءٍ مَهِينٍ.»
او بیا فرمایي:
«فَلْيَنْظُرِ الإِنْسَانُ مِمَّ خُلِقَ * خُلِقَ مِنْ مَاءٍ دَافِقٍ * يَخْرُجُ مِنْ بَيْنِ الصُّلْبِ وَالتَّرَائِبِ.»
«انسان باید وګوري او پام وکړي چې له څه شي څخه پیدا شوی دی؟ هغه د ټوپ وهونکو اوبو څخه پیدا شوی دی، اوبه چې د شا او د سینې د هډوکو له منځ څخه راوځي.»
هو، قرآن سپرم (نطفه) د ژوندۍ حجرې په توګه معرفي کوي. دا حجره د ژوند ماده ده، او نوی علم هم وایي چې سپرم هغه ژوندۍ حجره ده چې په عربي کې ورته “خلیه“ او په انګلیسي کې “cell” وایي. دا حجره د وراثت د واحدونو قوانینو تابع ده. بې له شکه، دا د قادر خدای ځواک دی او بس.
قرآن موږ ته بلنه راکوي:
«سَبِّحِ اسْمَ رَبِّكَ الْأَعْلَى * الَّذِي خَلَقَ فَسَوَّى * وَالَّذِي قَدَّرَ فَهَدى.»
«د خپل لوی خدای نوم په پاکۍ سره وستایه، هغه څوک چې پیدا یې کړل او همغږي یې ورکړه؛ او هغه چې اندازه یې وټاکله او لارښوونه یې وکړه.»
ډاکټر عبدالرؤف مخلص په خپل کتاب «د قرآن کریم اعجاز» کې لیکي:
«انسان باید وګوري چې له څه شي څخه پیدا شوی دی؟ دا انسان ته یوه الهي بلنه ده. د دې لپاره چې انسان د علمي تحقیقاتو او څېړنو په ډګر کې د خپل ژوند او خلقت حقیقت او ماده کشف کړي.»
موږ په دې الهي بلنه کې له تأمل څخه نه یو خلاص شوي، ځکه چې په هغې پسې یو بل آیت راځي چې د انسان د خلقت جوهر معرفي کوي او وایي:
«خُلِقَ مِنْ مَاءٍ دَافِقٍ.»
«هغه د ټوپ وهونکو اوبو څخه پیدا شوی دی.»
دا د انسان لپاره قرآني ننګونه ده چې تحقیق وکړي او حقیقت درک کړي. په پای کې به هغه نتیجې ته ورسېږي چې قرآن له دې بلنې سمدستي وروسته تشریح کړې ده. هو، قرآن کریم وایي: د انسان د ژوند حقیقت له نطفې څخه پیل کېږي.
نوی علم وایي چې سپرم هماغه ژوندۍ حجره ده چې په عربي کې ورته “خلیه“ او په انګلیسي کې “cell” وایي. دا “ژوندۍ حجره“ د ژوند جوهر دی. دغه له عقل، شکل، ارادې او ځواک څخه خالي نطفه په خپل اوږد سفر کې د مخلوقاتو د عجایبو اعجوبه ده.
هو، دا ساده حجره له عقل او ارادې پرته پوهېږي چې څه وکړي او کومه لاره تعقیب کړي. ځکه چې د خدای تعالی د قدرت لوی لاس هغې ته پوهه، ځواک، او اراده ورکړې ده. نو، ستاسو په نظر، څوک دې حجرې ته لارښوونه کوي چې له هماغه ټاکلي ځایه ولاړه شي او خپل کار پیل کړي؟
بې له شکه، دا د لوی څښتن تعالی قوي لاس دی، لکه څنګه چې فرمایي:
«سَبِّحِ اسْمَ رَبِّكَ الْأَعْلَى * الَّذِي خَلَقَ فَسَوَّى * وَالَّذِي قَدَّرَ فَهَدى.»
«د خپل لوی خدای نوم په پاکۍ سره وستایه، هغه څوک چې پیدا یې کړل، همغږي یې ورکړه، او هغه چې اندازه یې وټاکله او لارښوونه یې وکړه.»
د ژوندیو حجرو په جوړښت کې انتقال شوي وراثتي واحدونه
د داروین نظریه، چې د “نشر او ارتقاء” په اړه وايي د ژوندي موجوداتو ټول ډولونه له «یوه حجروي» موجود څخه رامنځته شوي او د خپل تکامل په بهیر کې د انسان د پیدایښت لامل ګرځېدلي، په بنسټیز ډول د وراثتي واحدونو د کشف په رڼا کې رد کېږي.
بې له شکه، دا نظریه په دې ځانګړي ټکي کې په بشپړه توګه غلطه ده؛ ځکه د وراثت د عواملو کشف، چې داروین له هغو هېڅ پوهه نه لرله، د تکامل د یو ډول څخه بل ډول ته انتقال ناشونی کړی دی. د وراثت عوامل د ټولو ژوندیو موجوداتو په حجرو کې په داسې ډول ځای پر ځای شوي چې د هر ډول ځانګړتیاوې په بشپړه توګه خوندي ساتي. په پایله کې دا یقیني او قطعي کوي چې هر ژوندی موجود باید د خپل ځانګړي ډول په محدوده کې پاتې شي او په هیڅ ډول شرایطو کې له خپلې نوعي حلقې بهر نشي او نوي ډول ته وده ورنکړي.
د بیلګې په توګه، پیشو د خپل پیدایښت له پیل راهیسې پیشو ده او د پیړیو په اوږدو کې به د تل لپاره پیشو پاتې شي. په همدې ډول، سپی، غوا، آس، بېزوګۍ او نور هم خپلو ځانګړو ډولونو ته وفادار پاتې دي.
په پایله کې، انسان یا بل هر ژوندی موجود د وراثتي عواملو پر بنسټ په خپل ځانګړي حریم کې د خپل نوعیت ساتنه کوي. که څه هم وده او پرمختګ ممکن وي، دا یوازې د خپل ډول په حدودو کې ترسره کېږي، نه د نورو ډولونو په چوکاټ کې.
هو، د وراثت قانون هغه ناسمه عقیده چې ځینې بې فکره خلک فکر کوي د داروین نظریه یو نه ماتېدونکی علمي حقیقت دی، په بشپړه توګه له منځه وړي.
د مسخ یادونه په قرآن کې
قرآن یو بل په زړه پورې بحث هم وړاندې کوي، چې ډېر د تأمل وړ دی. قرآن په څو آیتونو کې د هغه قوم یادونه کوي چې د خپلو ګناهونو له امله په بېزوګیانو بدل شوي دي (مسخ شوي دي).
په بل عبارت، قرآن انسان د یو ډول بېزو د منشأ په توګه نه، بلکې بېزوګیان د ځینو مسخ شوو انسانانو د پایلې په توګه معرفي کوي. دا موضوع په لاندې آیتونو کې روښانه شوې ده:
«وَلَقَدْ عَلِمْتُمُ الَّذِينَ اعْتَدُواْ مِنكُمْ فِى السَّبْتِ فَقُلْنَا لَهُم كُونُوا قِرَدَةً خاسِئِینَ.»
«تاسو بې شکه پوهېږئ، له هغو کسانو څخه چې د شنبې په ورځ یې (له الهي حدودو څخه) سرغړونه وکړه. نو موږ ورته وویل: رانده شوې بېزوګیان شئ!»
«قُلْ هَلْ أُنَبِّئُكُم بِشَرٍّ مِّن ذَلِكَ مَثُوبَةً عِندَ اللَّهِ مَن لَّعَنَهُ اللَّهُ وَغَضِبَ عَلَيْهِ وَجَعَلَ مِنْهُمُ الْقِرَدَةَ وَالْخَنَازِيرَ وَعَبَدَ الطَّاغُوتَ أُوْلَئِكَ شَرٌّ مَّكَانًا وَأَضَلُّ عَن سَوَاءِ السَّبِيلِ.»
«ووايه: آیا زه تاسو ته خبر درکړم د هغو کسانو په اړه چې د خدای په نزد د ډېر بد مقام څښتنان دي؟ هغوی هغه کسان دي چې خدای لعنت پرې کړی، پر هغوی غضب شوی، او له هغوی څخه یې بېزوګیان او خنزیران جوړ کړي دي. هغوی د شیطان عبادت کړی دی. هغوی ډېر بد ځای لري او له رښتې لارې ډېر په انحراف کې دي.»
«فَلَمَّا عَتَوْا عَن مَا نُهُوا عَنْهُ قُلْنَا لَهُمْ كُونُوا قِرَدَةً خَاسِئِينَ.»
«او کله چې دوی د هغو شیانو له پرېښودو ډډه وکړه چې نهیي شوي وو، نو موږ هغوی ته وویل: رانده شوي بېزوګیان شئ!»
ادامه لري…
By محمد فاتح