لیکوال: عبدالحي لیان
شیطانپرستي (اولسمه برخه)
۲. انحرافات
د شیطانپرستۍ فرقه د ډېرو ستونزو او انحرافاتو درلودونکې ده، هم د عقیدې او فکر په اړخ کې او هم د عمل او چلند په اړخ کې. په لنډ ډول یې ځینې یادونه کوو:
۲.۱. د خدای تعالی انکار
شیطانپرستان د واحد الله منکران دي، په داسې حال کې چې د اسلام په تعلیماتو کې د خدای سبحانه و تعالی وجود، د هغه احدیت، لامحدود صفات او ځانګړتیاوې د نورو عقایدو اصل او ریښه ګڼل کېږي.
۲.۲. د معاد (قیامت) انکار
آنتوان لاوي وايي چې هېڅ جنت په آسمان کې او هېڅ دوزخ چې خلک وسوځوي، شتون نه لري. «دلته او همدا اوس ستاسو د خوښۍ ورځ ده. دلته او همدا اوس ستاسو چانس دی.»
خو د اسلامي عقیدې له اصولو څخه د قیامت، آخرت، د جنت او دوزخ شتون، د خپل اعمال په مقابل کې د انسان مسئولیت او نور باورونه دي.
۲.۳. له الهي دینونو سره ضدیت او مبارزه
لاوي د شیطاني انجیل په کتاب کې په دینونو برید کوي او هغه د اسقفانو جوړ بولي. شیطانپرستان د الهي دینونو پر وړاندې د ضدیت او مبارزې لپاره دیني مقدساتو ته، په ځانګړې توګه مسیحیت او حضرت عیسی علیه السلام ته، خورا بد سپکاوی کوي. په داسې حال کې چې ناتحریفشوي الهي دینونه د خدای تعالی او د پاکو او مطهرو پیغمبرانو لخوا د انسانانو د لارښوونې لپاره نازل شوي دي او خلک د خدای په لور دعوت کوي، نه ځان ته.
قرآن کریم خدای تعالی ته د پیغمبرانو د بلنې په اړه وايي:
«وَلَقَدْ بَعَثْنَا فِي كُلِّ أُمَّةٍ رَّسُولًا أَنِ اعْبُدُوا اللَّهَ وَاجْتَنِبُوا الطَّاغُوتَ»؛
«موږ په هر امت کې یو پیغمبر مبعوث کړ، چې (ویل یې) د یوه خدای عبادت وکړئ او له طاغوت څخه ډډه وکړئ.»
همدارنګه د حضرت مسیح علیه السلام په اړه فرمايي:
«وَقَالَ الْمَسِيحُ يَا بَنِي إِسْرَائِيلَ اعْبُدُوا اللَّهَ رَبِّي وَرَبَّكُمْ»؛
«… مسیح وویل: ای بنیاسرائیلو! د یو خدای عبادت وکړئ چې زما او ستاسو رب دی…»
۴. د انسان په اړه غلطه عقیده
د شیطانپرستۍ په دین کې هر څه په یوه شي کې راغونډېږي، او هغه انسانپالنه او د انسان الوهیت دی. په دې عقیده کې انسان د خدای د بندګۍ له قید څخه خلاص ګڼل کېږي.
خو په اسلامي لارښوونو کې انسان د خدای بنده او د هغه په حضور کې د فقیر په توګه معرفي شوی دی. د انسان د پیدایښت موخه د خدای تعالی پېژندنه، د هغه عبادت، او هغه ته د قُرب مقام ته رسېدل دي.
د انسانانو په اړه د دوی د نورو انحرافاتو په اړه، آنتوان لاوي داسې وایي:
«شرارت، بدي، بغض او نفرت نه یوازې د انسان د طبیعت او وجود اړتیا ده، بلکې دغه د تاوتریخوالي او بدۍ اړخ د انسان د وجود پر نورو اړخونو واکمني کوي. د انسان پر وجود د شر ځواکونو حاکمیت، یو عادي تسلط نه دی، بلکې په اصل کې شر د انسان ټول حقیقت دی.»
د انسان د حقیقت په اړه د لاوي دا نظر، هم غیر دیني دی او هم غیر حقیقي؛ ځکه انسان که څه هم د انسانیت د اړتیا له مخې متضاد خلق شوی، او د مادي او الهي تمایلاتو برخمن دی، خو د انسان حقیقت د هغه ملکوتي اړخ دی. دا د هغه روښانه اړخ دی.
په انسانانو کې د شهوت او غضب قُوې (واک) دواړه فعاله دي. په الهي دینونو کې دا دواړه قُوې باید د وحیاني تعلیماتو او د عقل د ځواک په رڼا کې اداره شي، ترڅو د انسان د الهي اړخ د رڼا سره مرسته وکړي. خدای تعالی په انسان کې داسې تمایلات ځای پر ځای کړي دي چې د هغو په مرسته د خپل الهي اړخ یا، په بل عبارت، د خپل وجود الهي نفخه (دم) پیاوړی کړي او د ابدي خوښۍ لاره پرمخ بوځي.
۲.۵. د شیطان په اړه غلط تصور
په شیطانپرستۍ کې د شیطان په اړه نظر د یهودیانو د نظر پایله ده، چې د اسلامي نظر سره توپیر لري. د یهودیانو په نظر، شیطان یوه فرښته ده چې د یو شمېر فرښتو سره یوځای د آزادۍ لپاره راپورته شوه او د الهي نظام څخه ووتله. همدارنګه، د آدم او حوا په کیسه کې شیطان د انسانانو لپاره د ژغورونکي رول لوبوي. د معرفت د ونې مېوې ته د هغوی لارښوونه، هغوی د باطني چارو څخه پوه کوي او هغوی د خدای تعالی د استثماري بندګۍ له جال څخه خلاصوي! (نعوذ بالله)
خو په اسلامي نظر کې، شیطان هغه پېری (جن) دی چې د عبادت په نتیجه کې له ملایکو سره یوځای شو. خو د خدای له حکم څخه د سرغړونې له امله، چې آدم علیه السلام ته یې د سجدې کولو امر کړی و، له خپل مقام څخه ګوښه شو. هغه د آدم او د هغه د مېرمنې علیهما السلام په دوکه کولو سره د ممنوعه ونې په اړه د دې لامل شو چې هغوی دواړه له الهي جنت څخه ښکته شي.
په اسلامي نظر کې شیطان:
-
متکبر،
-
کافر،
-
د خدای له دربار څخه شړل شوی،
-
د قیامت تر ورځې پورې ملعون،
-
سرکښ او داسې نور معرفي شوی دی.