ليکوال: ابوریان عزیزي
فمينيزم (اوولسمه برخه)
د ښځو د کارموندنې په شعار سره د ښځو اغفال:
لکه څنګه چې مو په تیرو بحثونو کې ولوستل چې فمینیسټان تل له اسلام سره په شخړه کې دي او هڅه کوي چې د ښځو د ازادۍ په نوم مسلمانې ښځې د ګناهونو په ګندآب کې ډوب کړي او یوه غوښتنه یې د ښځو کار دی چې په دې بهانه غواړي د ښځو پښې له کوره بهر ته خلاصې کړي. په داسې حال کې چې په کور کې د ښځې پاتې کېدل د دين او شريعت حکم دی او د ښځې د وتلو اجازه يو ځانګړی حد لري چې اسلام ورته ټاکلی دی او اصل دا دی چې ښځې دي په کور کې پاتې شي. ځکه الله تعالی فرمایلي دي: «وَقرْنَ في بيُوتِكنَّ»؛ (په خپلو کورونو کې پاتې شئ). نو له ښځو څخه د شریعت غوښتنه په کور کې پاتې کېدل او له کوره بهر وتل يوازې د (شرعي) ضرورت په موخه ورته اجازه ده. په همدې دليل الله تعالی د پورته آيت په لړ کې فرمايي: «وَلَا تَبَرَّجْنَ تَبَرُّجَ الْجَاهِلِيَّةِ الْأُولَى»؛ (او خپل سينګار مه ښکاره کوئ د تېر جاهليت د تبرج په څېر) حضرت مقاتل رحمه الله د تبرج د آیت په ژباړه کې وايي: د جاهلیت تبرج داسې و؛ کله به چې یوې ښځې پر سر ټکری واچوله، نو نه به یې تړله او ویښتان، غوږوالۍ او غاړه به یې ښکاره کېده؛ بیا به له کوره ووت او ورو ورو دا طریقه په ټولو ښځو کې عامه شوه.
په کور کې د اوسېدلو حکم په دې معنی دی چې دروازه، دېوالونه او پرده، ښځه د پردیو له سترګو او اختلاط څخه ساتي او دا ټول په مجموع کي د یوې خولۍ او صدف په څېر پاتې کېږي چې ملغلره په ځان کې ساتي او که ښځه د کور څخه په وتلو مجبوره شي او ناچار د پردیو سترګو ته ښکاره شي، نو د په دې وخت کې اړینه ده چې اوږده او پراخه جامه واغوندې ترڅو ټول بدن او ښکلا یې پټ پاتې شي.
د قرانکريم په دريو آيتونو کې کورونه ښځو ته منسوب شوي دي. په داسې حال کې چې که موږ د قضیې ظاهر ته وګورو نو معلومه به شي چې کورونه خاوندانو پورې اړه لري، – والله اعلم – شاید د آیتونو معنی دا وي چې ښځې باید په کورونو کې د پاتې کیدو هڅه وکړي او دا نسبت او اضافت د اړین والې معنی ورکړي. دا پدې مانا ده چې ښځې دي د دې پر ځای چې بهر ته لاړې شي، هڅه دي کوي چې په کور کې پاتې شي چي دا اضافت د مالکیت په معنی نه ده. او هغه درې آيتونه چې کورونه په کي ښځو ته منسوب شوي دي، عبارت دی له:
۱. «وَقرْنَ في بيُوتِكنَّ»؛
په خپلو کورونو کې پاتې شئ.
۲. «وَاذْكُرْنَ مَا يُتْلَى فِي بُيُوتِكُنَّ مِنْ آيَاتِ اللَّهِ»؛
هغه څه چې تاسو ته ستاسو په کورونو کې د خدای له آیتونو او حکمتونو څخه لوستل کیږي، یاد کړئ.
۳.«لَاتُخْرِجُوهُنَّ مِنْ بُيُوتِهِنَّ»؛
دوی له خپلو کورونو څخه مه شړئ.