محمد صلی الله علیه و سلم، نړیوال رهبر (دویمه برخه)

لیکوال: ابو مهاجر

محمد صلی الله علیه و سلم، نړیوال رهبر (دویمه برخه)

په انجیل کې زیري او ژمني

    همدارنګه انجیل د رسول الله صلی الله علیه وسلم د رسالت په اړه زيری ورکړی دی، هغه انجیلونه چې په اوسني عصر کې شتون لري؛ که څه هم په هغوی کې تحریف او بدلون راغلی دی؛ خو له دې سره سره بیا هم دوی رسول الله صلی الله علیه وسلم د بعثت زیری ورکوي، لکه څنګه چې د «یوحنا »په انجیل کې راغلي دي: عيسى علیه‌السلام وفرمایل: که له ما سره مینه لری، زما د احکامو ساتنه وکړئ او زه له پلار ( خدای د عیسوي عقیدې له مخې) څخه غوښتنه کوم چې هغه تاسو ته یو ډیر ستایل شوی پیغمبر درکړي.

    همدارنګه مسیح علیه السلام وفرمایل: په حقیقت کې ډیر احکام شته چې زه یې باید درته ووایم. مګر تاسو اوس د دې برداشت کولو ځواک نلرئ. خو کله چې د حق روح (محمد صلی الله علیه وسلم) راشي، هغه به تاسو ته د حق ټولو احکامو لارښوونه وکړي.

    په انجیل کې دا هم ویل شوي: “بارقلیط (احمد) به تر هغه نه راځي تر څو چې زه تللی نه یم نو کله چې هغه راشي، هغه به نړۍ ته د تېروتنو په اړه خبرداری ورکړي. او هغه د خپل ځانه خبرې نه کوي، مګر هغه څه به وايې چې (د خدای له خوا) يې اوري ، او خلکو ته حق ته لارښوونه کوي، او هغه د وحی له لارې د پېښو او غیبي مسائلو څخه خبر ورکوي.

    ابو موسی اشعري رضی الله عنه وايي: ما د حبشې له پاچا نجاشي څخه واورېدل چې ویل یې: زه شاهدي ورکوم چې محمد صلی الله علیه وسلم د خدای رسول دی او عیسی علیه السلام د هغه د نبوت خبر ورکړی دی. او که زه د هیواد او خلکو مسئول نه وای؛ زه د هغه خدمت ته تلم او بوټان مې یې په لاس کې ورسره ګرځول.

په زبور کې زيری

    امام بیهقي له وهب ابن منبه څخه روایت کوي چې وایي: خدای تعالی په زبور کې داود علیه السلام ته وحی وکړه او ویې ویل: ای داوود! بیشکه له تا وروسته به ډیر ژر یو پیغمبر راشي چې نوم به یې «احمد» او «محمد» وي، هغه ریښتینی دی، زه به هيڅ کله د هغه څخه ناراضه نه شم او هیڅکله به زما نافرماني ونه کړي، د هغه مخکیني او راتلونکي ګناهونه ما بخښلی دی.

    حضرت داود (عليه السلام) فرمايلي دي: ” او هغه به له سمندر څخه سمندر ته او له سیندونو څخه  ځمکې ته ورشي او جزیرې به د هغه په ​​​​وړاندې سقوط وکړي او د ده دښمنان به ماته خورې. او د فارس پاچاهان د ده درناوی کوي او امتونه د هغه اطاعت کوي، او هغه مظلوم انسان د ظالمانو له لاس څخه ژغورې چې هیڅ مرستندوی نه لري هغه پر غریبانو او مسکینانو مهربان دی، او هر شېبه هغه ته درود او رحمت لیږل کیږي.”

د اشعیاء علیه‌السلام له لورې  زيری

    هغه د رسول الله صلی الله علیه وسلم نوم واخیست او اعلان یې وکړ او ویې ویل: ای محمده!  ما ستا امر د ستاینې وړ ګرځولې دی، ای پر رب باندې ګرانه! ستا نوم د تل لپاره شتون لري.»

    هغه دا هم وویل: زموږ لپاره به یو زوی پیدا شي چې عجیب انسان به وي او په اوږه به یې د نبوت مهر وي او هغه به لوی شخص وي، حکومت به یې سالم او سوله ییز حکومت وي او داوود علیه‌السلام ځاي ناستې وي (د نبوت وارث او دا به د هغه ملکیت وي).

    او په بل روایت کې وایي: ماته وویل شول چې پورته شه او وګوره څه وینئ؟ ومې ويل چې دوه سپاره وينم چې يو يې په خره او بل يې په اوښ سپور دى، يو يې بل ته وايي: پرېږده چې د بابل بتان له خاوندانو سره سمندر ته وغورځول شي. علما وايي: پر اوښ حضرت محمد صلى الله عليه وسلم سپور او بل يې مسيح دى او د حضرت محمد صلى الله عليه وسلم په وجه د بابل بتان په ځمکه راپرېوتل (او له منځه ولاړ).

د حضرت شمعون عليه السلام له لورې زيری

    د خدای  پېغمبرخبري شمعون (عليه السلام) ته راغلي دي: خدای (ج) دلایل د فاران غر (مکه) ته (یعنی محمد صلی الله علیه وسلم او قرآن) راوړل او اسمانونه او ځمکه د هغه (محمد صلی الله علیه وسلم) او د هغه د امت له تسبیح څخه ډک شول.

    په دې روايت کې د نبوت ځای (فاران غر په مکې مکرمه) ټاکل شوې ده، او په مکه مکرمه کې له ابراهیم خلیل او د هغه زوی اسماعیل ذبیح علیه السلام څخه وروسته له رسول الله صلی الله علیه وسلم پرته بل پیغمبر نه و. د بني اسرائيلو د خبر له مخې د حجاز ځمکې ته د مکې په لور يو پيغمبر رالېږل شوی دی) په عربو کې مشهور دی. او حزقیل پيغمبرد یهودیانو د ګواښلو په وخت کې د محمد صلی الله علیه وسلم د امت يې وستايل او ویې ویل: خدای به دوی په تاسو غالب کړي، او د دوی په منځ کې به یو پیغمبر راولیږل شي، او یو کتاب به ورته نازل شي. او ستاسو د غاړو مالک به شې، نو دوی به تاسو ذلیل کړي. او د بني قراز خلګ(بني قراز: ربیعه او مضر قبیله د عدنان اولاده ده او دا ټوله د قراز بن اسماعيل اولاده دي) او د نورو قبيلو يوه ډله به راشي او ورسره به پرښتې وي. په اسونو سپاره وې او په وسلو سمبال وې، هغوی به تاسې له ټولو خواوو څخه محاصره کړي، په پای کې به دوزخ ته ننوځي. او دا اثار په مکرر ډول ثابت شوي دي چې ملائکې په جهاد کې له سپینو اسونو سره د مسلمانانو مرستې ته راغلې دي او قرآن کریم هم د جګړې په صحنو کې د ملائکو د لښکر د شتون یادونه کړې ده.

د حضرت دانیال علیه السلام  زیری

    وروسته له دې چې حضرت دانیال علیه السلام الله تعالی ته دعا وکړه او ویې ویل: د بني اسرائيلو راتلونکی به څنګه وي؟ ، هغه وايي: ماته یوه فرښته د ځوان په بڼه راښکاره شوه او ویې ویل: السلام علیکم ورحمة الله وبرکاته! لوى څښتن فرمايي: له بني اسرائيل د خپلې نافرمانۍ امله زه په غوسه شوم، له ما پرته يې د نورو معبودانو عبادت کاوه، له علم وروسته جهالت ته او له حقه وروسته باطل ته تللي دي. نو ما په دوی باندې بخت النصر بادشاه مسلط کړ، هغه سړي ووژل، ښځې او ماشومان یې بندیان کړل، بیت المقدس یې وران کړ او د هغوی کتابونه یې وسوځول، او څوک چې د بخت النصر نه وروسته راشي، د هغوی سره به هم همداسې وکړي، زه د دوی څخه راضي نه یم. د هغوی ګناهونه هم نه بخښم. نو دوی به همیشه زما د قهر او غضب لاندې وي تر څو چې زه د مریم زوی مسیح راولیږم او بالاخره د حضرت زکریا، یحیی علیه السلام د وژلو او د حضرت عیسی علیه السلام د ځورولو له امله زما لعنت او غوسه د دوی په برخه شي؛ نو دوی به همیشه په لعنت، ذلت، فقر او بدبختۍ کې ژوند کوي تر څو چې زه له بني اسماعیل څخه یو پیغمبر راولیږم. هغه پېغمبر چې هاجر ته يې زيری ورکړل شوې وه ، هغه ته به وحي راولېږم او نومونه به يې وركوم او په تقوا او پرهېزګارۍ به يې سينګار كړم او خير به يې شعار جوړ كړم، صداقت او وفاداري به يې په طبيعت كې وي. کلک هوډ د هغه کردار او  سنتونه يې لارښود دی، زه به د هغه لپاره یو ځانګړی کتاب جوړ کړم چې د پخوانیو کتابونو تصدیق وکړي، د دوی ځینې احکام منسوخ کړي او زه به هغه یو شپه خپل لوري ته بوځم ترڅو هغه ځان ته نږدې کړم او زه ورته سلام وکړم او وحی راولیږم. بیا به زه هغه په ​​خوښۍ سره خپلو بندګانو ته ولیږم. هغه امانتدار دی او زما د حکمونو پیروي کوي او په نرمه وینا او ښه تبلیغ سره خلک توحید ته دعوتوي هغه بد اخلاق نه او بدې خبرې نه کوي او په بازارونو کې خپل غږ نه پورته کوي او پر هغه چا مهربانه دی چې ایمان یې راوړی او د دښمنانو سره جنګېږي. نو په خپلو خبرو سره زما توحيد سره بندګانو ته بلنه ورکوي او زما له آيتونو يې خبروي. بیا یې خپلوان هغه ردوي او ځوروي یې.

    لنډه دا چې د اسلام له پېغمبر صلی الله علیه وسلم څخه مخکې له عربو څخه په پرله پسې ډول د پیغمبر د ظهور خبرونه اورېدل کېدل او راهبانو په دې اړه له تورات او انجیل څخه زيرې ورکول او حضرت سلمان فارسی رضی الله عنه د عودیه (د روم یو ښار دی) کشيش په وینا خبر ورکوي چې هغه ورته وویل: د حنیف ابراهیم علیه السلام په دین باندې د پیغمبر رالیږل د عربو سره نږدې دی، د هغه د هجرت ځای هغه ځمکه ده چې د دوو “حاره” ترمنځ موقعیت لري. او د دې دوو “حاره” تر مینځ د خرما ونې شتون لري ، چې د نبوت يوه نښه يې دا ده، چې ډالۍ خوري او خيرات نه قبلوي او د نبوت مهر يې د دواړو اوږو په منځ کې ايښودل شوى دى.

“حاره” هغه ځمکه ده چې تورې ډبرې لري، او د مدینې منورې ښار د دوو ختیځو او لویدیزونو ترمنځ موقعیت لري.