مېرمنو ته د رسول الله صلی الله علیه وسلم سپارښتنې (لومړۍ برخه)

لیکواله: ام سعدیه

مېرمنو ته د رسول الله صلی الله علیه وسلم سپارښتنې (لومړۍ برخه)

لڼدیز:

د مېرمنو اړوند مسایل او په کورنۍ او ټولنه کې د هغوی موقف مختلف اړخونه لري. هغه اسلامي فکر او دستورات چې د رسول الله صلی الله علیه وسلم په سنتو او سیرت کې څرګندیږي، دې مسئلې ته له بېلابېلو اړخونو پام کوي. د مسلمانې ښځې د رښتیني شخصیت ظهور او د درانه رسالت، الهي او انساني مسوولیتونو د ترسره کولو او د رښتیني کمال ته د رسېدو لپاره ضروري ده چې له افراطي او تفریطي نظریاتو څخه ډډه وشي او هغه نظر واضح شي چې صحیح، فطري او د دیني لارښوونو پر بنسټ ولاړ وي.

له هغه ځایه چې الله جل جلاله رسول الله صلی الله علیه وسلم د نمونې (اُسوې) په توګه معرفي کړی دی، تر څو مؤمنان د هغه له قول، عمل او سلوک څخه درس واخلي، ښځې هم د هغه مبارک په سپارښتنو کې ځانګړی ځای لري. رسول الله صلی الله علیه وسلم، چې د بشریت کامله اُسوه ده، د ښځو په اړه له بېلابېلو زاویو بحث کړی دی. که د رسول الله صلی الله علیه وسلم سپارښتنې په پام کې ونیول شي، په کورنیو کې به آرامتیا راشي او د کورنۍ د غړو د ودې او غوره‌والي زمینه به برابره شي.

سریزه

ثنا او صفت د الله جل جلاله لپاره ده چې رب‌العالمین دی. د هغه شکر ادا کوو او له هغه څخه مرسته غواړو. له هغه څخه بښنه او هدایت غواړو او د خپلو پليدو باطنو او بدو اعمالو په اړه هغه ته پناه وړو. څوک چې خدای جل جلاله د هغه لارښوونه وکړي، هیڅوک به هغه ګمراه نه کړي؛ او څوک چې خدای جل جلاله  ګمراه کړي، نور به د هغه په هدایت کې بریالي نشي.

زه شاهدي ورکوم چې بل معبود نشته، پرته له یوه الله جل جلاله  چې هیڅ شریک نه لري. او شاهدي ورکوم چې محمد صلی الله علیه وسلم د هغه بنده او رسول دی.

الله جل جلاله فرمایي:

«يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلا تَمُوتُنَّ إِلَّا وَأَنْتُمْ مُسْلِمُونَ» (آل عمران: ۱۰۲)
“اې هغو کسانو چې ایمان مو راوړی! د تقوا او پرهېزګارۍ حق ادا کړئ او د الله جل جلاله  (د حکم له مخالفت) څخه ډډه وکړئ؛ او د اسلام له دین پرته له دې دنیا څخه مه ځئ.”

د دې آیت له مخې پر هر مسلمان (که هغه ښځه وي یا نر) لازمه ده چې خپله هڅه وکړي او د قرآن په لارښوونو عمل وکړي. خو له بده مرغه، نن‌سبا ښځې د مادیاتو په جال کې دومره راګیرې دي چې خپل اساسي مقام، وظیفه او رسالت یې هېر کړی دی. د نن ورځې ډېری ښځو د خپل ژوند هدف او موخه شهرت او تجمل ټاکلی دی، او زیات وخت یې په سینګار کولو یا د هغه په چمتو کولو تېریږي.

دلته مطلب د پاکۍ او ښکلا انکار نه دی، بلکې موخه د ارزښتونو درک او د افکارو پراخوالی دی. د نن ورځې مسلمانې ښځې هېره کړې ده چې پر ځمکه د خدای جل جلاله  خلیفه ده او هغه مسئولیت چې د هغې پر اوږو اېښودل شوی، باید په سمه توګه ترسره کړي.

په نننۍ نړۍ کې د ښځو د ښوونې او روزنې لپاره په نړیواله کچه ډېر تبلیغات او فعالیتونه ترسره کېږي، خو موږ پوهېږو چې دا زده کړې یوازې د عیاشیو او مادیت لپاره دي. د دغو هڅو پایله یوازې درانه لګښتونه، سیالۍ، بې ګټې اندېښنې، او تر ټولو مهم، د قیمتي ژوند ضایع کول دي.

هره مسلمانه ښځه چې د حیرت په دښته کې ډوبه شوې وي، او د یوې ښه اُسوې په لټه کې وي، باید د رسول الله صلی الله علیه وسلم سپارښتنو ته غاړه کیږدي. هغه باید د خپل ځان په اصلاح او د نیکو، ایماندارو او ژمنو اولادونو په پالنه کې زیار وباسي، ترڅو اسلام یو ځل بیا خپل لوړ مقام ته راوګرځي او د تنګې دنیا له مادیتونو څخه د خدای او د رسول الله صلی الله علیه وسلم مینې ته مخه کړي.

د ښځو لپاره د رسول الله صلی الله علیه وسلم سپارښتنې

۱. د خاوند په غوره کولو کې د ښځې حق

له حضرت ابوهریره رضي الله عنه څخه روایت دی چې رسول الله صلی الله علیه وسلم وفرمایل:

«کونډه تر هغه پورې چې له هغې سره مشوره نه وي شوې او پېغله تر څو چې د هغې اجازه نه وي ترلاسه شوې، باید واده نشي.»
صحابه کرامو وویل: “یا رسول الله! د پېغلې د اجازې نښه څه ده؟” هغه وفرمایل:
«د هغې چوپتیا د هغې اجازه ده.»

د دې حدیث له مخې، ښځه حق لري چې د خپل راتلونکي ژوند ملګری په خپله خوښه وټاکي او کولی شي مرکچي ته مثبت یا منفي ځواب ورکړي.

نو، زما خور جانې، ستا د ژوند د راتلونکي ملګري د انتخاب لومړنی معیار باید دینداري او ښه اخلاق وي. بیا دې نورو ځانګړتیاوو ته پام وشي، لکه شتمني، ښکلا، ټولنیز حیثیت او نور. خو که یوازې د دنیا مادیتونه په پام کې ونیسې او هغه چا ته مثبت ځواب ورکړې چې له دین او اخلاقو سره علاقه نه لري، نو پوه شه چې دا انتخاب به تا په راتلونکي کې له ستونزو سره مخ کړي؛ ځکه چې داسې شخص ستا حقونه نه پېژني او ممکن ستا سره ښه چلند ونه کړي.

د حضرت حسن بن علي رضي الله عنهما دې قیمتي نصیحت ته پام وکړه. یو سړي له هغه څخه پوښتنه وکړه:

«زه یوه لور لرم، ستاسو په اند چا ته یې ورکړم؟»
هغه وویل:
«هغه چا ته یې ورکړه چې له خدایه وېرېږي. که له هغې سره مینه ولري، هغه به ونازوي، او که مینه ورسره ونه لري، پر هغې به ظلم ونه کړي.»

ادامه لري…