د ناهیلۍ پایلې او لاملونه او د هغې سره د مبارزې لارې (اتمه برخه)

لیکوال: عبدالمجید دوستي

د ناهیلۍ پایلې او لاملونه او د هغې سره د مبارزې لارې (اتمه برخه)

۲. د راتلونکي څخه لاس مینځل 

د ناهیلۍ بله اغېزه د راتلونکي څخه ناامېدۍ او د نامعلوم راتلونکي (خو نېکمرغه) څخه هېله پرېښودل دي. انسان تر هغه وخته هېله لري او زړه یې له ښه سباګانو سره تړلی وي چې هیجان، انګیزه او ځواک پکې موجود وي. خو کله چې مایوسه شي او ذهن یې د زمانې له کړاوونو سره مخ شي، د ژوند له هغه واحد انتخاب (چې هېله او خوشبیني ده) څخه ناامېده کېږي. دا ورته مهمه نه ده چې سبا به څه کېږي. یوازې نفس کاږي، مخ پر وړاندې ځي او ځان د وخت جریان ته تسلیموي.

په داسې حال کې چې د انسان راتلونکی د هغه د هڅو او هیلو پایله ده. د هغه هره هڅه او فعالیت په راتلونکي کې ثمر ته رسېږي، او له دې څخه بریا او هوساینه لاسته راځي. کله چې یو څوک له دې ستر ارزښت څخه لاس واخلي، ځان په یوه کونج کې حصار کړي او د راتلونکي رسۍ پرېږدي، په حقیقت کې یې ځان ته تر ټولو سخت او ویجاړونکی ګوزار کړی دی.

هغه زخم چې نورو د شا لخوا پرې په چړو وهلی وي، مالګه پرې اچوي او زخم ته د روغېدو اجازه نه ورکوي. په حقیقت کې، د ژوند تر ټولو لویې ستونزې یوازې هغه مهال زغمل کېږي، چې په امید او هیلې سره یې درملنه وشي. د بدلون لپاره د راتلونکي په اړه هیلې درلودل هغه ځواک دی چې انسان د خپګان له پیچلو مرحلو تېروي او هغه ته دا ځواک ورکوي چې بېرته ولاړ شي او خپلې لارې ته دوام ورکړي.

کله چې راتلونکی زموږ پر اوږو بار وي، موږ باید دا ونه پرېږدو چې دغه بار زموږ لاسونه وتړي او موږ د ناهیلۍ او ناکامۍ په زندانونو کې بند کړي. د ناهیلۍ ته تسلیمېدل او د دې بد شیطان په وړاندې اقدام نه کول د روښانه راتلونکي په وړاندې د بې پروايي او سستۍ لامل ګرځي. دا عمل انسان د ناکامۍ او ستړیا په بدبویه کندو کې غورځوي او هر وار یې سر لا ژورو ته ډوبوي.

د ناهیلۍ یوه اغېزه دا ده چې انسان په ژوند کې د داسې بې‌ثباته او له ستونزو ډک حالت سره مخ کېږي. له دې ستونزو تېریدل په حقیقت کې بریا ګڼل کېږي او د ناامیدۍ او ناکامۍ له لوړو غرونو د خلاصون لومړی ګام دی.

کله چې یو کس ناهېلي شي، حتی تر ټولو غوره فرصتونه هم د هغه په وړاندې بې‌اغېزې ښکاري. د هغه روښانه راتلونکی د ناهیلۍ تیزو وړانګو لاندې سوځي او د وجود انرژي یې ورو ورو ختمېږي. د ژوند په اوږدو کې ناهیلۍ ته تسلیمېدل د ستونزو نه حل کېدو لامل کېږي. خو د دې ستونزې سره د مقابلې په برخه کې د خلکو توپیر څرګندېږي. هغه څوک چې ځواکمنه او فولادي اراده لري، د ستونزو په وړاندې سر نه ټیټوي.

ادامه لري…