لیکوال: ابو عائشه
په اسلام کې د امنیت ارزښت (یوویشتمه برخه)
روڼوالی:
اسلام د امنیت د ترلاسه کولو لپاره ډیری حل لارې لري چې انسان پرې کولای شي د خپل ځان او ټولنې امنیت تضمین کړي. موږ دلته هڅه کوو ځینې هغه لارې او وسیلې بیان کړو چې د امنیت په تأمین کې مهمه ونډه لري.
د اسلام له نظره د امنیت د تحقق لارې:
د انسانانو له اوږدمهاله هیلو څخه یوه هم په ژوند کې امنیت او هوساینه ده. امنیت دومره مهم او حیاتي ارزښت لري چې د ټولنې هر وګړی یې غواړي، او له زړه څخه هیله کوي چې په داسې چاپېریال کې ژوند وکړي چې د امنیت نعمت ولري. له امنیت پرته ژوند به خورا ستونزمن، سخت او ګواښونکی وي. په داسې ځای کې چې امنیت نه وي، ښوونه او روزنه، کسب او کار، پانګونه او تجارت او حتی تحقیق او تفحص ممکن نه وي. قرآن کریم په ډېرو ځایونو کې امنیت د خدای لخوا یو ستر نعمت ګڼلی، او بندګان یې هڅولي چې د دې ستر نعمت د ترلاسه کولو لپاره هڅې وکړي او هغه سمه لار تعقیب کړي چې دې هدف ته رسېږي.
د امنیت د تأمین په اړه، بشري ټولنې نن همدا اندېښنه لري چې څنګه د امنیت بنسټ او دوام رامنځته کړي. په بل عبارت، څنګه کولای شو چې د امنیت مفکوره له نظري مرحلې څخه عملي پړاو ته واړوو، او په فردي او ټولنیزو فعالیتونو کې یې بنسټیزه کړو، څو په پایله کې یوه داسې ټولنه رامنځته شي چې خلک پکې د شخصي، ټولنیز او د نورو سره د تعامل په ټولو برخو کې د امنیت احساس وکړي.
د امنیت د تأمین لپاره مهم لاملونه په اسلامي ټولنه کې
۱) په الله تعالی ایمان
ایمان په لغت کې د “امن” له ریښې څخه اخیستل شوی، او په ګڼو معناوو کې کارېږي لکه: تصدیق، امنیت، تسلیم او منل. د مؤمنانو ایمان، صالح اعمال او علم د اسلامي ټولنې په امنیت کې مهمه ونډه لري. دین د انسان د ژوند په امنیت کې ډېره مرسته کوي، او د “خدای توکل” په پیاوړي کولو سره د انسان د بېوسۍ احساس کموي. کله چې انسان باور وکړي چې خدای د ټولو اړتیاوو پوره کوونکی دی، نو د خوندیتوب او امنیت احساس به وکړي؛ ځکه چې خدای د خپلو بندګانو لپاره د خوندیتوب او امنیت سرچینه ده.
د دنیا او آخرت د امنیت د لاسته راوړلو اساس او بنسټ په خدای ایمان او نېک عمل دی، چې خدای تعالی په ګڼو آیتونو کې بیان کړي. که د ایمان کلمه د لغت له مخې وڅېړو، وبه وینو چې دا کلمه له امان څخه اخیستل شوې ده؛ نو ایمان یعنې امنیت، اطمينان، سکون او اعتماد. کله چې بنده په ایمان کې زیاته ونډه ولري، د هغه امنیت هم زیاتېږي. الله جل جلاله په دې اړه فرمايي:
«فأي الفريقين أحق بالأمن إن كنتم تعلمون الذين آمنوا ولم يلبسوا إيمانهم بظلم أؤلئك لهم الأمن وهم مهتدون»
(نو که تاسو پوهېږئ، چې له دغو دوو ډلو څخه کوم یو د امن ډېر مستحق دی؛ هغه کسان چې ایمان یې راوړی او خپل ایمان یې له شرک سره نه دی ګډ کړی، هغوی ته امنیت او راحت دی. همدغه خلک دي چې هدایت شوي دي.)
بل مهم لامل:
چې په اسلامي ټولنه کې امنیت تضمینوي، د اسلامي شریعت پلي کول دي؛ ځکه چې په اسلامي ټولنه کې د دین ساتنه فرض ده او دا د مسلمان د ژوند له اساسي اړتیاوو څخه ده. د اسلام مبارک دین خپلو پیروانو ته تل د ښو او مناسبو اعمالو توصیه کوي او له هغو کارونو یې منع کوي چې د خلکو امنیت او هوساینه ګډوډوي.
د اسلامي شریعت پلي کول:
د الله تعالی د اوامرو اطاعت او د بدۍ مخنیوی دی. مسؤلین باید هڅه وکړي چې د خلکو ژوند د الهي لارښوونو مطابق کړي او د اسلام احکام او قوانین په خپل ژوند کې تطبیق کړي. د اسلامي شریعت یوه ځانګړنه دا ده چې د هغې په پلي کولو سره د انسان ژوند له امنیت او اطمینان څخه ډکېږي. امنیت په اسلامي شریعت کې د مشورې، توبې، هجرت، د کفارو پر وړاندې جهاد، په خدای توکل او د هغه په احکامو د اطاعت په واسطه ترلاسه کېږي. د اسلام ټول آداب غوره دي، ځکه چې د ژوند او مرګ وروسته امنیت، راحت او ډاډ ورکوي، او له الله څخه لرې پاتې کېدل د وېري لامل ګرځي. خدای تعالی موږ ته په خپلو ښکلو الفاظو کې ویلي:
«ألا بذکر الله تطمئن القلوب»
(پوه شئ چې زړونه یوازې د الله په یاد ډاډ مومي.)