لیکوال: عبدالحمید "ګرګیج"
د درود ویلو فضایل او برکات (څلورمه برخه)
حضرت ابو طلحه انصاري رضي الله عنه روایت کوي چې یوه ورځ د رسول الله صلی الله علیه وسلم مبارک مخ داسې ځلانده او روښانه ښکاریده چې د خوښۍ نښې پرې له ورایه څرګندې وې. صحابه کرامو عرض وکړ:«ای د خدای رسوله! نن ستاسو مبارک مخ د خوښۍ او رڼا څخه ډک دې.» حضرت وفرمایل: «زه به څنګه خوشحاله نه شم، کله چې جبرائیل علیه السلام خبر راکړ چې زما له امت څخه څوک چې پر ما یو ځل درود و وایي، الله تعالی به یې په په اعمالنامه کې لس نیکۍ زیاتې کړي، لس ګناهونه به یې له منځه یوسي او لس درجې به یې لوړې کړي.»
په بل روایت کې راغلي چې په دې ورځ د رسول الله صلی الله علیه وسلم ځلانده څېره له خوښۍ او خوشالۍ ډکه وه. صحابه کرامو رضی الله عنهم وپوښتل:«یا رسول الله! نن ورځ ستاسو په مبارک مخ کې د پخوا په پرتله خوښي او خوشحالي برېښي.» حضرت ځواب ورکړ:«ولې داسې دې نه وي، جبرائیل علیه السلام ماته خبر راکړ چې الله تعالی یوه پرښته ټاکلې ده چې د قیامت تر ورځې پورې چې څوک پر ما درود ووایي، هغه ملائکه یې په ځواب کې وایي: “او درود دې وي پر تاسو”.
عن ابن مسعود قال: قال رسول الله صلی الله علیه وسلم:«ان اولی الناس بی یوم القیامة اکثرهم علی صلاة»؛ ژباړه: له ابن مسعود رضی الله عنه څخه روایت دی چې رسول الله صلی الله علیه وسلم وفرمایل: د قيامت په ورځ ماته تر ټولو نږدې خلک هغه دي چې پر ما ډېر وایي.
علامه سخاوي رحمه الله په “قول بدیع” کې له “الدار المنتظم” څخه نقل کړی چې له رسول الله صلی الله علیه وسلم څخه روایت دی چې:«له تاسو څخه هرڅوک چې پر ما زیات درود شریف ووایي، د قيامت په ورځ به ما ته نږدې وي.» همدارنګه له حضرت انس رضي الله عنه څخه روایت دی چې دقیامت په ټولو پړاوونو کې به ماته تر ټولو نږدې هغه څوک وي چې ډېر یې پر ما درود شریف ویلی وي.
همدارنګه له رسول الله صلی الله علیه وسلم څخه روایت شوی دی چې فرمایي:«پر ما ډېر درود ووایاست؛ ځکه چې په قبر کې به له تاسو څخه لومړۍ پوښتنه همدا وي.» په بل حدیث کې راغلي:«پر ما ډېر درود ویل به د صراط پله په تیارو کې د روښانتیا وسیله وي او که څوک غواړي چې عملونه یې د میزان په تله کې ښه وتلل شي، نو پر ما دې ډېر درود ووایي.»
د حضرت انس رضي الله عنه څخه په یوه حدیث کې راغلي دي:«څوک چې په دنیا کې پر ما ډیر درود ووایي، هغه به د قیامت په ورځ له ویرې او وحشت څخه وژغورل شي.» همدارنګه په “زاد السعید” کې راغلي چې رسول الله صلی الله علیه وسلم فرمایلي دي:«څوک چې پر ما ډېر درود وايي، هغه به د خدای د عرش تر سیوري لاندې وي.» علامه سخاوی هم د رسول الله صلی الله علیه وسلم څخه نقل کړی چې فرمایي:«دری کسان به د قیامت په ورځ د الله تعالی د عرش تر سیوري لاندې وي، داسی ورځ چی د هغه د سیوري پرته بل سیوری نه وي: لومړی هغه څوک چی د یو مصیبت ځپلي کس تکلیف لرې کړي؛ دوهم، هغه څوک چې زما سنت ژوندی و ساتي؛ او دریم هغه څوک چې ما ته ډیر درود واستوي.»
په بل حدیث کې علامه سخاوي له عبدالله بن عمر رضي الله عنهما څخه نقل کړی دی چې رسول الله صلی الله علیه وسلم وفرمایل:«خپلې ناستې او غونډې په درود ویلو سره ښایسته کړئ؛ ځکه چې د قيامت په ورځ به پر ما درود ويل ستاسو لپاره رڼا او روښنایي وي.» علامه سخاوي له «قوت القلوب» څخه نقل کړی دی چی د کثرت درود شریف لږه اندازه دری سوه ځله دې او حضرت گنګوهي رحمه الله به هم خپلو ارادتمندانو ته ویل چی لږ تر لږه دې درې سوه ځله درود ووایي.
امام مستغفري رحمه الله له رسول الله صلی الله علیه وسلم څخه نقل کړی:« څوک چې په ورځ کې سل ځله پر ما درود ووایي، د هغه سل حاجتونه به پوره شي؛ دېرش حاجتونه د دنيا او پاتې نور د آخرت.»
له ابن مسعود رضی الله عنه څخه روایت دی چې رسول الله صلی الله علیه وسلم وفرمایل:«د الله جل جلاله لپاره ډېرې پرښتې شته چې په ځمکه ګرځي او زما د امت سلامونه ما ته رسوي.» دا مضمون ډېرو صحابه کرامو روایت کړی دې. علامه سخاوي هم له حضرت علی (رض) څخه روایت کړی دی چې ملائکې د خدای په حکم د ځمکې پر سر ګرځي او زما د امت سلامونه راته رسوي. همدارنګه د حضرت امام حسن رضی الله عنه له طریقه نقل دې چې په هر ځای کې چې یاست پر ما درود ووایاست؛ ځکه چې ستاسو درودونه خامخا ماته رسېږي. حضرت انس رضي الله عنه هم نقل کړی چې رسول الله صلی الله علیه وسلم وفرمایل:«هر څوک چې پر ما درود ووایي، هغه درود به ما ته ورسیږي او زه به یې په بدل کې هغه ته درود و استوم او پر دې سربېره به لس نیکۍ د هغه لپاره ولیکل شي.» په “مشکوه” کې له ابو هریره رضي الله عنه څخه روایت دی چې رسول الله صلی الله علیه وسلم وفرمایل:«پر ما درود ووایاست؛ ځکه چې ستاسو درودونه به ما ته ورسیږي.»
ادامه لري…
By محمد فاتح