ليکوال: ابو رائف
فراماسونري (برخه: ۲۰)
د ماسوني محفل زينه (سُلَّم صعود)
د ماسوني محفل زينه «د صعود زينه يا سُلَّم صعود » بلل کېږي. په لرغونو تمدونونو کې د زينې د ارزښت دلیل دا و چې د لوړ الهي عالم او انسان ترمنځ د اړيکې نښه او وسيله ګڼل کېده؛ همدارنګه د روحي او معنوي لوړوالي سمبول وه او له اوو اسمانونو د تېرېدو نښه هم ګڼل کېده، چې انسان یې په وسیله خدایانو ته ورسېږي او له دنیاوي نړۍ څخه خلاصون ومومي.
زينه په عمومي ډول په يهودي او په ځانګړي ډول په ماسوني تفکر کې خاص مقام لري. دا زينه چې «د يعقوب زينه» نومېږي، درې پلې لري او فرښتې به پرې پورته او ښکته کېدې، د انسان د تکاملي پړاوونو، ايمان، هيلې او احسان په برخه کې د هغه د روحي لوړوالي سمبول دی.[۱]
همدارنګه زينه د ماسوني ايينونو د يوه ايين نښه ده او د ماسون د دويمې مرتبې، يعنې د «اهل صنعت» مرتبې ته د رسېدو څرګندونه کوي.
په بل عبارت دا زينه د ماسون د هغې هڅې سمبول دی چې غواړي لومړی له مادي نړۍ او وروسته له کيهاني نړۍ څخه ځان خلاص کړي او په پای کې لوړ روحاني عالم ته ورسېږي.[۲]
د پيش بند (مئزر) او سپينو دستکشو شعار
ماسوني پيش بند (مئزر) د يو ډول سپين رنګه جامې نښه ده چې د فکر او عمل د پاکوالي څرګندونه کوي. ماسون یې اغوندي او له همدې لارې د ماسونیانو په منځ کې د کېناستلو حق تر لاسه کوي، په دې باور چې دا پيش بند د هغوی د جامو ساتونکی او د کاري وسايلو لېږدونکی دی. دا کار د حضرت سليمان عليه السلام د کلبد له کارګرانو سره د تشبيه له مخې ترسره کېږي، ځکه ويل کېږي چې هغوی به هم همدې پيش بندونو ته ورته جامې اغوستې.
سپينې دستکشې چې نوو ماسوني غړو ته ورکول کېږي د هماغه سپين پيش بند سمبول لري: د طهارت او پاکوالي نښه ده او هغه ژمنې ور په يادوي چې د ټولنې پر وړاندې یې منلې دي.[۳]
د چاکوش (شاقوف) شعار
«چاکوش» په ماسوني سمبول پېژندنه کې د ځواک او واکمن ریاست نښه ده او هغه اله ده چې د محفل مشر یې په وسیله د غونډو پيل او پای اعلانوي؛ همدارنګه د برابرۍ او عدالت سمبول هم ګڼل کېږي. په عين حال کې د تاوتريخوالي او وران کارۍ نښه هم ده؛ ځکه چې د وحشيانه وژنې د وسيلې په توګه کارول شوې ده. ويل کېږي چې «حيرام ابيف صوري» هم پرې وژل شوی و.[۴]
د مالج (مِسطرين) شعار
مالج يا مسطرين هغه اله ده چې په ودانیزو چارو کې د ډبرو د يوځای کولو او نښلولو لپاره کارېږي. د ماسوني باور له مخې دا اله د ورورولۍ او مينې سمبول دی چې ټول ماسونيان باید د سليماني کلبد د ودانولو لپاره سره یو موټي کړي.[۵]
ادامه لري…
مخکینۍ برخه | راتلونکې برخه
سرچينې:
[۱]. الموسوعة المصورة للرموز التقليدية، مخونه: 16، 34.
[۲]. دلالات الرموز والأرقام المقدسة في الفكر الماسوني، مخ: 214.
[۳]. الرموز الماسونية، مخ: 425.
[۴]. الموسوعة المصورة للرموز التقليدية، مخ: 259.
[۵]. الرموز الماسونية، مخ: 50.