لیکوال: ابو رائف
فراماسونري (برخه: ۳)
د فراماسونرۍ حقیقت
ډاکټر صابر طعیمه په خپل کتاب کې د فراماسونرۍ یو بل تعریف وړاندې کوي: «که د فراماسونرۍ تاریخ، د ښوونو کچې، رمزي کلمو، تشریحاتو او تفسیرونو ته وکتل شي، نو فراماسونري له پیله تر پایه پورې یو یهودي بنسټ دی.»[۱]
په هغه دایرة المعارف کې چې د «فراماسونري» تر عنوان لاندې په (۱۹۰۶ز) کال کې خپور شوی، راغلي دي: «هر محفل باید د یهودي معبد نښه وي او په حقیقت کې همداسې ده هم. هر استاد چې پر خپلې چوکۍ کېني، د یهودو د پاچا استازیتوب کوي او هر فراماسون د یهودي کارګر تمثیل ګڼل کېږي.»[۲] په یاد دایرة المعارف کې دا حقیقت هم تایید شوی چې هغه تخنیکي ژبه، نښې (سمبولونه) او مراسم چې په فراماسونرۍ کې کارول کېږي، په بشپړه توګه له یهودي اصطلاحاتو او دودونو سره سمون لري. ان تر دې چې د فراماسونرۍ په رسمي لیکونو او اسنادو کې درج شوې نېټې د عبري تاريخ او میاشتو پر بنسټ تنظیمېږي او همدارنګه په لیکنو کې یې عبري الفبا کارول کېږي.
که څه هم د هغوی ظاهري بڼې او تشریفاتي مظاهر د هغه ټولنیز چاپېریال له شرایطو سره سم بدلېږي چې پکې فعالیت کوي، خو ظاهري شعارونه یې تل همدا «ازادي»، «برابري» او «وروروالي» ده. [۳]
په «الرمزیة» کتاب (چاپ، ۱۹۲۸ز) کې راغلي دي: «د یهودي عنصر ستاینه او درناوی باید د هر فراماسون تر ټولو مهمه دنده وي؛ ځکه دې عنصر د پېړیو او نسلونو په اوږدو کې خپل نه بدلېدونکی الهي دود ساتلی دی.»[۴]
په یهودي دایرة المعارف کې د «ماسونیه» تر کلمې لاندې راغلي دي: «د فراماسونرۍ تخنیکي ژبه، اشارې نښې او مراسم ټول یهودي دي.»[۵]
د فراماسونرۍ یو «مشر عبدالحلیم الیاسخوري» وایي: «د فراماسونرۍ په ژورو کې اسراییلي فکر نغښتی دی او د هغې په تاریخ، دودونو، رمزونو او اسرارو کې د یهودي مقدسو اسطورو څرک ښکاره دی. فراماسونري په حقیقت کې یو یهودي بنسټ دی او له بشپړې یهودي سرچینې څخه را ټوکېدلی دی.»[۶]
له همدې امله فراماسونري په خپلو خوځښتونو، کړنو او د خپل ټول خوی او جوړښت په اوږدو کې یهودي رنګ او بڼه لري او ښکاره ده چې سلطنتي فراماسونري (الماسونیة الملوکیة) په خپلو اصولو، ښوونو، درجو او موخو کې ټول د هغه څه تقدیس ته اشاره کوي چې په تورات کې راغلي او د حضرت سلیمان علیه السلام د معبد د بیا رغونې موخه تعقیبوي.[۷]
په «اروپایي فراماسونري دایرةالمعارف» کې راغلي دي: «هر فراماسوني محفل باید د یهودي معبد پر الګو ولاړ وي، د هر محفل مشر د یهودي پاچاهۍ استازی وي او هر ماسون د یهودي شخص تجسد ګڼل کېږي.»[۸]
په «معجم الماسونیة والماسونیین» کې لیکل شوي دي: «پر هر انسان لازمه ده چې د فراماسونرۍ له غړیتوب مخکې په فکري او روحي ډول یهودیت ومني.»[۹]
له دغو ټولو شواهدو څخه په ښکاره توګه د فراماسونرۍ حقیقت څرګندېږي، هغه حقیقت چې ډېر خلک پرې غولېدلي دي. د هغو کسانو لپاره چې نور دلایل غواړي، دا بېلګه هم یادولای شو: د فراماسونرۍ د غړو په غونډو کې چې د دري دېرشمې درجې (۳۳ مې درجې) لوړ پوړي غړي پکې ګډون لري، دا ډول متن لوستل کېږي: «موږ به بېرته د سلیمان بن داود ټاټوبي ته ستانه شو او سپېڅلی معبد به یو ځل بیا ورغوو؛ هلته به تلمود ولولو او هر هغه څه به عملي کړو چې په وصیتونو او تړونونو کې راغلي دي او د اسرايیل د عظمت په لاره کې به له هېڅ ډول هڅو ډډه ونه کړو.»[۱۰]
همدارنګه د مصر په قاهرې ښار کې د طوسون پر سرک یو فراماسوني کلب شتون لري چې ټول وسایل او توکي یې د اسرايیلي شپږ اړخي ستوري نښه لري.
هلته داسې بیرغونه لږول شوي چې د اسرايیلو د دولسو قبیلو نښه څرګندوي او ټولې لوحې، سامانونه، خپرونې او اعلانونه یې د بریتانیایي او اسرايیلي رنګ او نښې لرونکي دي.[۱۱]
د دغو ټولو تعریفونو او توضیحاتو له مجموعې څخه جوتېږي چې یاد خوځښت یو «یهودي»، پټ او له رازه ډک حرکت دی، چې موخه یې د یهودیانو له لاسه وتلي هیبت او شوکت بېرته راګرځول او د «موعودې ځمکې» بېرته ترلاسه کول دي.
دا چې دوی ته د «ازادو بنایانو» نوم ورکړل شوی، لامل یې دا دی چې د دوی په باور یو ځل بیا به خپل مطلوب «کلبد» رغوي.
دوام لري…
مخکینۍ برخه | راتلونکې برخه
سرچینې:
۱. الماسونیة ذاک العالم المجهول، مخ: ۱۴۲.
۲. دسائس الماسونیة بین المسلمین، مخ: ۸.
۳. هماغه منبع.
۴. الماسونیة ذاک العالم المجهول، مخ: ۳۸۲.
۵. ابو حبیب، محمد ابن ناصر، أثر القوة الخفیة علی الماسونیة، مخونه: ۹، ۱۴۰۹هـ.ق.
۶. هماغه منبع.
۷. دسائس الماسونیة بین المسلمین، مخ: ۹.
۸. هماغه منبع.
۹. أثر القوة الخفیة علی الماسونیة، مخ: ۱۰.
۱۰. دسائس الماسونیة علی المسلمین، مخ: ۱۰.
۱۱. هماغه منبع.