الله تعالی رسول الله صلی الله علیه وسلم ته خطاب کوي او فرمایي: «يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلَابِيبِهِنَّ ذَلِكَ أَدْنَى أَنْ يُعْرَفْنَ فَلَا يُؤْذَيْنَ وَكَانَ اللَّهُ غَفُورًا رَحِيمًا»؛
(اې پیغمبره! خپلو مېرمنو، لوڼو او د مؤمنانو ښځو ته ووایه چې خپلې چادرۍ په ځانونو باندې راښکته کړي، ترڅو هغوی (له ناپاکو ښځو څخه) وپېژندل شي او د نااهلو خلکو له لوري ونه ځورول شي. الله تعالی تل بخښونکی او مهربان دی.)
له همدې امله، د ښځې حجاب او شرعي پوښښ په حقیقت کې یو شعار او نښه ده چې یوه مسلمانه، مؤمنه او باعفته ښځه له بدکاره ښځې څخه جلا کوي او د هغې د هویت نښه بلل کېږي.
که څوک د حجاب په اړه نازل شویو آیتونو ته وګوري، دا به درک کړي چې دغه آیتونه د ټولو اسلامي ټولنو په ګټه دي؛ ځکه چې د نر او ښځې ترمنځ د حیا او پاک لمنۍ اهمیت څرګندوي. دا آیتونه خلک عفت، حیا، او وقار ته رابولي، او دا ټول نېک او غوره صفتونه دي.
الله تعالی هر نارینه او ښځه په هغو اوامرو مکلف کړي چې د هغوی په وس کې دي. هغه حجاب چې د قرآن کریم آیتونه او د رسول الله صلی الله علیه وسلم احادیث پرې ټینګار کوي، او د مؤمنانو میندو او د صحابه کرامو رضی الله عنهم میرمنو هم هغه مراعات کاوه، د مسلمانې ښځې لپاره لازمي دی. دا حجاب ټول بدن، حتی مخ او لاسونه، له پردیو سترګو څخه پټوي.
رسول الله صلی الله علیه وسلم د حجاب او عفت د رعایت په اړه په یوه حدیث کې فرمایلي دي: «ښځه عورت ده، کله چې له کوره ووځي، شیطان او شیطان صفتان د هغې د دوکه کولو هڅه کوي. که هغه د کور په کونج کې پاتې شي او له کوره بهر ونه وځي، نو هغه الله تعالی ته نږدې وي.»
همدارنګه، په سنن ابوداود کې له حضرت عائشې رضی الله عنها څخه روایت دی چې هغې وویل: «موږ له رسول الله صلی الله علیه وسلم سره احرام تړلی و. کله چې سپرلۍ تېرېدلې، له موږ څخه به هرې یوې خپل نقاب په خپل مخ راښکته کړ، او کله چې هغوی تېر شول، موږ به نقاب لرې کاوه.»
د بې حجابۍ بدګڼې او ناوړه پایلې
حجاب نه اغوستل او د اسلامي پوښښ نه مراعات کول له هغو ګناهونو څخه دی چې په ښکاره ډول ترسره کېږي. رسول الله صلی الله علیه وسلم د دې ډول ګناه په اړه داسې فرمایلي دي: «زما ټول امت د بخښنې مستحق دی، پرته له هغه چا چې په ښکاره ګناه کوي.»
همدارنګه، د حجاب د نه اغوستلو ګناه یوازې په ښځه پورې محدوده نه ده؛ بلکې دا د فحاشۍ او بې عفتۍ سبب ګرځي چې په پایله کې ټول امت د دنیا او آخرت له عذاب سره مخ کوي.
مسلمانې ښځې باید حجاب او اسلامي پوښښ مراعات کړي او د هغو ښځو په ډله کې نه وي چې په ظاهره حجاب اغوندي، مګر په حقیقت کې بې حجابه دي. حجاب یوازې د بدن د غوښې پټول نه دي؛ بلکې باید ټول ظاهري او داخلي فتنې او عیبونه پټ کړي. هغوی باید له هغو ښځو څخه نه وي چې په اړه یې رسول الله صلی الله علیه وسلم وفرمایل: «د دوزخیانو دوه ډلې دي چې ما نه دي لیدلي: یوه ډله هغه خلک دي چې د غواګانو د لکۍ په شان درې (کوړه) ورسره دي او خلک پرې وهي، او بله ډله هغه ښځې دي چې جامې یې اغوستي، مګر په حقیقت کې بربنډې دي. هغوی نارینه وو ته لېوالتیا ښيي او هغوی ځان ته جذبوي. د دوی سرونه د اوښانو د بوکان په شان دي. هغوی به جنت ته داخل نه شي او د هغه بوی به حس نه کړي، حال دا چې د جنت بوی له ډېر لرې واټن څخه محسوسېږي.»
البته، دا هم باید هېر نه کړو چې نن سبا د شرعي حدودو په ځانګړې توګه د حجاب مراعات کول ډېر ګران او ستونزمن کار دی. رښتیني مسلمانان هغه دي چې بې له ځنډه دغو حدودو ته غاړه ایږدي او له خپل رب څخه اجر غواړي.
نن ورځ مسلمانې نجونې د خپل حجاب د ساتلو په برخه کې له ګڼو ستونزو سره مخ دي، مګر باید ووایو چې دا ستونزه تل شتون لري او ممکن مسلمانان په راتلونکي کې هم له دې ستونزو سره مخ شي؛ ځکه چې په نړۍ کې بې حجابي عامه شوې ده.
په ځینو اسلامي هېوادونو لکه مصر، مراکش، تونس، او کویټ کې د پوهنتونونو رئیسانو په خپلو پوهنتونونو کې د حجاب د منعې قانون تصویب کړی او د حجاب لرونکو ښځو او نجونو له ننوتلو څخه مخنیوی کوي.
که څه هم د دې لیکوال خبرې له ډېر پخوا سره تړاو لري، خو په دې ورځو کې د فکري جګړې او د اسلام د دښمنانو د زهرجنو تبلیغاتو اغېز په ځینو مسلمانو نجونو دومره ژور شوی چې له دې اسلامي سمبول او د عفت او پت له نښې څخه تښتي. هغوی فکر کوي چې اسلامي حجاب د دوی د پرمختګ او ودې په وړاندې خنډ دی او په بېلابېلو علمي او کلتوري برخو کې د هغوی د بریا او پرمختګ مخنیوی کوي.
په بله برخه کې به، ان شاءالله، هڅه وکړو چې د حجاب په اړه د دین ضد کسانو او مخالفانو شکونو او شبهاتو ته مفصل ځوابونه وړاندې کړو.
By محمد فاتح