په اسلام کې د ښځې مقام (اووه پنځوسمه برخه)

لیکواله: ام عایشه

په اسلام کې د ښځې مقام (اووه پنځوسمه برخه)

له بهرنیانو څخه د مسلمانو ښځو تقلید

له بده مرغه، غربي فاسدو رسنیو د ځینو مسلمانو ښځو په افکارو ژوره اغېزه کړې ده. کله چې یوه مسلمانه ښځه په تلویزیون یا انټرنیټي شبکو کې د یوې ښځې حرکات، چلند او د هغې د جامو اغوستلو څرنګوالی ویني او شیطان یې په سترګو کې ښایسته کړي، نو هغې ته د تقلید کولو فکر پیدا کېږي. دا ښځه د هغې ښځې په څېر کېږي چې له هر باد سره خوځېږي او هره ورځ یو نوی حرکت، پوښښ او کړنلاره غوره کوي. مګر هغه نه پوهېږي چې دا ښځه څوک ده او د تلویزیون پر پرده یې د راڅرګندېدو موخه څه ده؟

هغې ته دا هم نه معلومېږي چې هغه ښځه چې د تمدن، فرهنګ او ښاري ژوند په نوم خپل حجاب او عفت له لاسه ورکوي، په حقیقت کې ټولنې ته دا وایي: “زه د دې لوړ مقام او حیثیت وړ نه یم؛ زه یوازې د پیر او پلور لپاره یوه مینځه یم.”

له بده مرغه، نن ورځ که د دې نامناسب تقلید په اړه څه وویل شي، نو ځینې خلک یې یوازې “موډ او فېشن” بولي او وایي چې دا کارونه هر څوک کوي.

د حجاب ارزښت او تاریخي بېلګې

په هغه وخت کې چې غلامي په نړۍ کې عامه وه، د باعزته او آزادو ښځو او غلامو ښځو (چې د مال په څېر پیرودل او پلورل کېدې) ترمنځ توپیر د جامو په ډول کې څرګندېده. باعزته او آزاده ښځه تل په حجاب او ستر کې وه، خو غلامې ښځې یا مینځې د حجاب او ټیکري د اغوستلو حق نه درلود؛ ترڅو له آزادو ښځو سره توپیر څرګند پاتې شي او څوک د هغوی په پېژندلو کې تېروتنه ونه کړي.

کومه ښځه چې د خدای جل جلاله له حکمونو سرغړونه کوي، هغه ځان له خدای تعالی لرې کوي او په ګناهونو سره خپل زړه توروي. دا ډول ښځه د خدای تعالی د بندګۍ له نېکمرغۍ او آرامۍ څخه ځان د شهوتونو او نفسي غوښتنو خطرناکې کندې ته غورځوي.

د بې حیایۍ پایلې

هغه ښځې چې د بې عفتۍ او بې حیایۍ لاره خپله کړې ده، په حقیقت کې ځانونه ژوندي ښخوي. هغوی د داسې ښځو تقلید کوي چې د خپلو نفسي غوښتنو غلامانې دي؛ که دا ښځې نڅاګرې وي، فلمي لوبغاړې وي، یا په سوداګریزو اعلانونو کې له خپلې عفت او حیثیت څخه ناوړه استفاده کوي.

هغه کسان چې د ښځو په وړاندې حقایق درواغ ښیي، ښېګڼې بدۍ ګڼي، بې حجابي ښکلا بولي او عفت ظلم او افراطیت ګڼي، په حقیقت کې د ښځو قبرونه کيندي. هغوی ښځې وسوسه کوي چې د خپلو پښو پر زور ودرېږي او د نورو نه اړ کېدو په نوم، هغه بازارونو ته وځي چې د دوی لپاره مناسب نه دي.

دوی غواړي ښځې د پلار، مېړه یا ورور له ملاتړ څخه بې برخې کړي او د کورنۍ له احتیاجه خلاصې کړي. خو په حقیقت کې دوی ښځې د بدبختۍ او هلاکت کندې ته غورځوي.

ګرانې خورې!

کله چې مهربان رب ستا لپاره بېلګې او نمونې ټاکلې دي او هغوی یې په خپل سپېڅلي کتاب کې در پېژندلې دي، نو څه اړتیا ده چې د غربي یا نورو ملتونو د لوڅو او بې پردو ښځو تقلید وکړې؟

الله سبحانه وتعالی فرمايي:
«وَضَرَبَ اللَّهُ مَثَلًا لِّلَّذِینَ آمَنُوا امْرَأَتَ فِرْعَوْنَ إِذْ قَالَتْ رَبِّ ابْنِ لِی عِندَکَ بَیْتًا فِی الْجَنَّةِ وَنَجِّنِی مِن فِرْعَوْنَ وَعَمَلِهِ وَنَجِّنِی مِنَ الْقَوْمِ الظَّالِمِینَ * وَمَرْیَمَ ابْنَتَ عِمْرَانَ الَّتِی أَحْصَنَتْ فَرْجَهَا فَنَفَخْنَا فِیهِ مِن رُّوحِنَا وَصَدَّقَتْ بِکَلِمَاتِ رَبِّهَا وَکُتُبِهِ وَکَانَتْ مِنَ الْقَانِتِینَ»

(او الله تعالی د مؤمنانو لپاره د فرعون ښځه بېلګه ګرځولې ده، کله چې هغې وویل: “ربه! ما ته له ځان سره په جنت کې کور جوړ کړه او د فرعون او د هغه له کړنې څخه مې وژغوره او د ظالمانو له ډلې څخه مې خلاصه کړه.” او همدارنګه د عمران لور مریم، چې خپله لمن یې پاکه وساتله او موږ په هغې کې خپل روح پو کړ. هغې د پروردګار خبرې او د هغه کتابونه تصدیق کړل او د خدای جل جلاله د حکمونو اطاعت کوونکې وه.)

د اسلام غوره بېلګې

زما ګرانې خورې! ستا تر ټولو غوره او ښې بېلګې آسیه د فرعون مېرمن، مریم د عمران لور، د مؤمنانو مېندې، او د صحابه کرامو او تابعینو صالحې او عالمانې ښځې دي. د هغوی د ژوند ډول او څرنګوالی مطالعه کړه ترڅو د نېکمرغۍ او کامیابۍ لوړې درجې ترلاسه کړې.

زه هغو خویندو ته چې د غربي رسنیو د تبلیغاتو تر اغېز لاندې راغلې دي وایم: تاسو له هرچا تقلید وکړئ، خو یو ځل د اسلام احکامو او لارښوونو ته مراجعه وکړئ. قرآن او حدیث ولولئ او په دواړو کې خپل ځای او مقام ولټوئ. خپل ځان په بشپړ ډول د شریعت تابع وګرځوئ ترڅو په اسلام کې د ښځېتوب، مورتوب، خورتوب او لورتوب خوند تجربه کړئ. لکه مخکې مو وویل، اسلام هر یوه ته ځانګړي حقوق، ګټې او ارزښتونه ورکړي دي.

له کور څخه بهر د ښځې مسؤلیت

ښځو ته د رسول الله صلی الله علیه وسلم د فرمان لنډیز داسې دی:
په تاسو باندې د نړۍ د کوم کس خدمت کول واجب نه دی. تاسو له هر ډول مسئولیت څخه آزادې یاست. د هیچا مسئولیت ستاسو پر غاړه نه دی. یوازینی شی چې له تاسو غوښتل کېږي، دا دی چې په کور کې پاتې شئ، د خپل مېړه اطاعت وکړئ او خپل ماشومان وروزئ.

په دې معنی، تاسو د ټولنې معمار یاستۍ. د ټولنې د پرمختګ او ودې بنسټ ستاسو په لاس کې دی. رسول الله صلی الله علیه وسلم تاسو ته دا لوړ مقام درکړی دی. اوس تاسو ته اختیار دی چې د عزت مقام غوره کړئ او که د ذلت او ګمراهۍ مقام، کوم چې زموږ په عصر کې ډېری ښځې پرې اخته دي.

نو څرګنده شوه چې مسلمانه ښځه باید له سختې اړتیا پرته بازارونو ته له ورتګ څخه ډډه وکړي، د کور چارې ترسره کړي او د قرآنکریم او د رسول الله صلی الله علیه وسلم لارښوونو او سپارښتنو ته پام وکړي.

ادامه لري…