لیکوال: عبدالحي لیان
شیطان پرستي (څلرویشتمه او وروستۍ برخه)
د شیطان پرستۍ سمبولونه
سمبولونه هغه وسایل دي چې په عامه کلتور باندې ژوره اغېزه کوي. له هغه ځایه چې سمبولونه لوړ هنري ظرفیت لري، پر خلکو، په ځانګړې توګه پر ځوانانو، ډېره اغېزه لري. شیطان پرستان د خپلو ځانګړو موخو لپاره، چې د استعمارګرو ملاتړ ترلاسه کوي، له بېلابېلو سمبولونو څخه کار اخلي او د هغوی په واسطه شیطان پرستۍ ته بلنه کوي.
دا شیطاني سمبولونه په پراخه کچه په جامو، بوټانو، هارونو، لاس بندونو، رنګونو، د خوب خونې داخلي ډیزاین، د لوبو وسایلو او نورو کې شتون لري. هر سمبول لیدونکو ته یو ځانګړی پیغام وړاندې کوي.
د شیطان پرستۍ د سمبولونو معرفي کولو دمخه
د شیطان پرستۍ د سمبولونو د معرفي کولو مخکې، اړینه ده چې پر دوو مهمو ټکو تمرکز وشي. د دغو ټکو له پامه غورځول د دې فرقې د غلطې پېژندنې، ناسم تحلیل او یا د دې دین د ناغوښتلې پراختیا سبب ګرځېدلای شي:
لومړی ټکی
شیطان پرستان ډېری هغه سمبولونه، چې په نورو دینونو او مسلکونو کې ریښې لري، نن ورځ د خپلو ګټو او اهدافو لپاره کاروي. ډېری هغه سمبولونه، چې اوس د شیطان پرستۍ په نوم پېژندل کېږي، په اصل کې د دې دین سره تړاو نه لري، بلکې شیطان پرستانو دا سمبولونه ځان ته ځانګړي کړي دي.
د دې چالاکۍ موخه د شیطان پرستۍ د دین د ژورو ریښو ښودل او خپلو پیروانو ته د اعتماد ورکول دي. ځینې دغه سمبولونه د مصر او یونان په لرغونو تمدنونو کې ریښې لري، او ځینې نور یې د ختیځو تمدنونو پورې اړه لري.
لکه څنګه چې “آنتوان لاوي” په خپل کتاب کې د “کالي” او “شیوا” نومونه یاد کړي، چې د هندوانو او یوګیانو په منځ کې ځانګړی ځای لري او د هندوانو د خدایانو له ډلې شمېرل کېږي. ده دغه نومونه د شیطان نومونه بللي دي او هغوی یې شیطان ګڼلي دي.
په دې دین کې د «ماسون» او «کابالا» ځینې سمبولونه هم کارول کېږي. که څه هم شیطان پرستي د یهودي عرفان او فراماسونري محصول ګڼل کېږي، خو باید په پام کې ونیول شي چې نن ورځ شیطان پرستي ځان د ځانګړو دودونو، سمبولونو، بنسټونو، او په یوه کلمه کې، یو خپلواک تاریخي جریان معرفي کوي.
دویم ټکی
څرنګه چې سمبول پخپله یو پیاوړی او نفوذ لرونکی وسیله ده، او د څرګندو او متنوعو سمبولونو درلودل یو نه بدلېدونکی ځواک ګڼل کېږي، نو شیطان پرستۍ ته د نورو دینونو او جریانونو د سمبولونو منسوبول د دې انحرافي عقیدې د خپرولو غیر مستقیمه هڅه ده او په ناغوښتي ډول یې مرسته کوي.
له همدې امله، زموږ موخه په دې لیکنه کې یوازې هغه سمبولونه دي چې نن ورځ شیطان پرستان د خپلو اهدافو لپاره کاروي.
هغه سمبولونه چې شیطان پرستان یې د ځان د معرفي کولو لپاره کاروي په لاندې ډول دي:
۱. بافومت (Baphomet)
دا سمبول د “بافومت” په نامه یوه وزه یا پسه دی، چې د “یوحنا د مکاشفاتو” په کتاب کې ښکر لرونکي حیوان ته ورته دی. په مصري افسانو کې، دا د عقل او حکمت د خدای په توګه معرفي شوی. بافومت ته د سفالګرۍ د څرخ له لارې د انسان د خلقت نسبت ورکړل شوی دی.
بافومت د دوه جنسي ځانګړتیاوو او د زېږون سمبول ګڼل کېږي. د هغه دواړو اړخونو کې دوې سپوږمۍ دي؛ یوه توره “ګبورا” او بله سپینه “چسد”، چې د رڼا او تیارې د ترکیب نښه ګڼل کېږي. البته، شیطان پرستان دا دوه سپوږمۍ د لطف او عدالت سمبولونه ګڼي.
د هغه د ښکرونو ترمنځ شعله د شیطان د نبوغ او هوښیارۍ نښه ده. دوی باور لري چې همدغه شیطان و چې آدم او حوا علیهما السلام یې د معرفت ونې ته لارښوونه وکړه.
البته، لکه څنګه چې وویل شول، د دې سمبول یو واحد تأویل د واقعیت څخه لرې دی. بافومت کېدای شي په یهودیت کې د قربانۍ وزې سمبول وي، چې یو مقدسه وزه ده، او د زوړ عهد (تورات) له مخې، دا وزه اسحاق ته قرباني شوه. شیطان هم د انسان د لارښوونې او د معرفت ونې ته د هغه د رسېدلو قرباني شو. د دې وضاحت سره، وزه د آدم لپاره د شیطان د سترې قربانۍ سمبول کېدای شي.
۲. سرچپه پنځه اړخیز ستوری او د وزې سر (Inverted Pentagram)
پنتاګرام، چې د ونوس سمبول دی، د ښځو د ښکلا او شهواني مینې الهه ګڼل کېږي. د دې سمبول کارونه له هغه وخت راهیسې پیل شوه چې لئوناردو دا وینچي د “Vitruvian Man” نقشه جوړه کړه، او دا د انسان د اصالت او اومانیزم نښه شوه. په شیطان پرستۍ کې، پنتاګرام سرچپه شوی او د وزې سر (د بافومت سر) هم ورسره یو ځای شوی دی.
د پنتاګرام او بافومت د ترکیب سمبول، د “کرولي” او “لاوي” د شیطان پرستۍ څرګندونکی نښه ده. شیطان د “انسان پالنې”، “د هوسونو اصالت” او “د بشر د لذت پالنې” سمبول ګڼل کېږي. له همدې امله، دا نښه په پراخه توګه په شیطان پرستۍ کې کارول کېږي. د دې د کارولو بېلګې:
-
الف) په جامو کې دا نښه د هغو کسانو لخوا کارول کېږي چې د شیطان د کلیسا رسمي غړي وي، او د نښې رنګ د غړیتوب درجه ښيي.
-
ب) د شیطان پرستۍ په مراسمو کې دا نښه د محراب په سر کې نصب کېږي.
۳. ۶۶۶ یا FFF
شپږ سوه شپږشپیته (۶۶۶) شمېره او د انګلیسي FFF (چې د شپږم توري متناظره شمېره ده) د انجیل د یوحنا د مکاشفاتو له مخې د “شیطان شمېره” ګڼل شوې ده. د مکاشفاتو په یو آیت کې لیکل شوي:
“او ما یو بل ځناور ولید چې له ځمکې راپورته شو، د وري په څېر ښکرونه یې درلودل او د اژدها په څېر یې خبرې کولې. دا ځناور خلکو ته امر وکړ چې لومړی ځناور عبادت کړي… او څوک چې پوهه لري د ځناور شمېره وشمېري؛ ځکه چې دا د انسان شمېر دی، او شمېره یې ۶۶۶ ده.”
۴. سرچپه صلیب (Upside Down Cross)
سرچپه صلیب د شیطان پرستانو لپاره د مسیحیت پر وړاندې د دښمنۍ او سپکاوي نښه ده.
۵. ښکر لرونکی لاس (Horned Hand)
په دې سمبول کې دوې ګوتې پورته ښودل شوې دي، چې د بافومت د وزې ښکرونه ښيي. دا سمبول کله ناکله د “Hail Satan” (“سلام دې وي پر شیطان”) عبارت سره کارول کېږي.
یاده دې وي چې دا سمبول په نورو ځایونو کې هم کارول کېږي، چې د شیطان پرستۍ سره هېڅ تړاو نه لري. د بېلګې په توګه:
-
د جګړې د استقامت لپاره، د سیاستمدارانو او جګړه مارانو لخوا د “W” (د “WAR” لومړی توری) په توګه کارول کېږي.
په هر صورت، د دې سمبول غالب کارونه په شیطاني مراسمو کې لیدل کېږي.