په اسلام کې د ښځې مقام (نهه دېرشمه برخه)

لیکواله: ام عایشه

په اسلام کې د ښځې مقام (نهه دېرشمه برخه)

هلکانو ته پر نجونو ترجیح ورنکړو

له حضرت عبدالله بن عباس رضي الله عنهما څخه روایت دی چې رسول الله صلی الله علیه وسلم وفرمایل:
«څوک چې د لور څښتن شو، هغه یې ژوندۍ ښخه نکړه، سپکاوی یې ونکړ او پر هغې یې خپل زوی غوره ونه ګڼلو، خدای جل جلاله به هغه جنت ته داخل کړي.»

په دې حدیث کې درې شرطونه ذکر شوي دي چې که څوک یې پوره کړي، د جنت لیاقت او واک به ترلاسه کړي:

• خپله لور د جاهلیت د زمانې د خلکو په څېر ژوندۍ ښخه نکړي؛

• د هغې سپکاوی ونکړي، هغه بې ارزښته ونه ګڼي؛ بلکې د هغې په قدر پوه شي او د هغې د ښوونې، روزنې او تأدیب هڅه وکړي؛

• خپل زوی ته پر لور ترجیح ورنکړي.

دا موضوع به لاندې په تفصیل سره تشریح کړو.

د جاهلیت په دوره کې به خلکو هلکان د نجونو په نسبت غوره ګڼل او هغوی ته به یې لومړیتوب ورکاوه، تر دې حده چې ځینو به د نجلۍ د زېږېدو له امله پر خپلو مېرمنو غوسه کېدل او یا به یې له همدې وجې پرېښودلې. د جاهلیت په زمانه کې خلک د زامنو لرلو ته ډېر لېوال وو؛ ځکه چې هلکانو به د جګړو او نښتو په وخت کې د هغوی مرستې ته وردانګل او له هغوی سره به اوږه په اوږه د دښمن پر وړاندې جنګېدل.

کله چې د اسلام ځلانده لمر خپلې وړانګې خپرې کړې او ټوله نړۍ یې روښانه کړه، ټولو ته یې د نجونو د روزنې فضیلت څرګند کړ او د هغه اجر او ثواب زیری یې ورکړ چې خدای جل جلاله یې پالونکو او روزونکو ته ورکوي. اسلام له نجونو سره ښېګڼه او مهربانۍ، خدای تعالی ته د نږدې کېدو او تقرب یوه لاره ګرځولې ده؛ هغه لاره چې مسلمان نارینه او ښځې له دوزخ څخه ژغوري او جنت ته یې رسوي.

له همدې امله، دا مناسبه نه ده چې د هلک او نجلۍ ترمنځ توپیر وشي؛ ځکه چې دواړه د الله تعالی له لوري ډالۍ دي. پر نجونو د هلکانو د غوره والي سرچینه د جاهلیت زمانې له تیارو څخه ده، او له بده مرغه د هغې اغېزې او پایلې لا هم په ځینو خلکو کې شتون لري، که څه هم دا آثار او اغېزې په ځینو کې کمې او په ځینو نورو کې ډېرې دي، او دا د دوی د ایمان په کمزورتیا او قوت پورې اړه لري.
بله مسئله چې د نجونو مور او پلار باید ورته پام وکړي، دا ده چې د هلکانو او نجونو ترمنځ باید تبعیض ونه شي؛ ځکه چې که نجونې تبعیض ته پام وکړي، دا به د مور او پلار په وړاندې د دوی د کرکې او حسادت سبب شي. ځینې پلرونه او میندې د خپلو زامنو او لوڼو ترمنځ تبعیض کوي، په داسې توګه چې د ورور په زړه کې د خور نافرماني او کرکه راپاروي. البته، داسې پلرونه او میندې هېر کړي چې باید د خپلو اولادونو ترمنځ عدالت وکړي.

هلکانو ته پر نجونو د ترجیح ورکولو اغېزې او پایلې
باید په دې پوه شو چې د همدې بې ځایه ترجیح ورکولو له امله، هر کال زرګونه نجونې خپل خوږ ژوند له لاسه ورکوي او له ژونده بې برخې کېږي. دا د جاهلیت د زمانې له نښو څخه یوه ده. د هند د ښځو او ماشومانو وزیرې، مانیکا ګاندي، د دوشنبې په ورځ د «NDTV» خبري چینل ته وویل:
«هره ورځ دوه زره نجونې د مور په رحم کې وژل کېږي؛ ځینې یې د زېږون سره سم، یو بالښت د دوی په مخ کېښودل کېږي او وژل کېږي.»

البته باید ووایو چې دا جاهلانه دود یوازې په غربي هېوادونو او نورو غیر اسلامي هېوادونو کې نه شته، بلکې کله کله په اسلامي هېوادونو کې هم داسې خلک شته چې د نجونو د زېږېدو له امله خپه کېږي. د کابل په روغتونونو کې یو شمېر ډاکټران وايي:
«ښځې د لور د زېږولو له امله د مېړه او د هغه د کورنۍ د غړو له خوا ځورول کېږي او سپکاوی یې کېږي.»

تر دې حده چې ځینې ښځې د نجلۍ د زېږون پر مهال له هغې سره هېڅ ډول لېوالتیا نه ښيي او د هغې په تړاو په بشپړه توګه بې رغبتي او بې غوري کوي؛ ځکه چې هغوی د خپلې کورنۍ لخوا د ملامتۍ لاندې راځي. په داسې حال کې چې ښځه د لور په زېږون کې هېڅ رول نه لري، او دا الله سبحانه وتعالی دی چې چا ته وغواړي زوی یا لور، یا دواړه ورکوي، او یا هم ځینو ته هېڅ یو نه ورکوي.

ادامه لري…