لیکوال: محمد عاصم اسماعیلزهي
د حج حکمت، فلسفه او اسرار
شپاړلسمه برخه
شبهې یا نیوکې او په وړاندې یې ځوابونه؛
لومړی نیوکه؛ ولې حج ته ځی او روپۍ مو پیسه داره عربو ته ورکوی؟ ولې یې د خپلې سیمې غریبانو ته نه ورکوی؟
دلخوش از آنیم که حج میرویم *** غافل از آنیم که کج میرویم
کعبه به دیدار خدا میرویم *** غافل همینجا کجا میرویم
حج به خدا جز به دل پاک نیست *** شستن غم از دل غمناک نیست
الف: د حج سفر شاوخوا یوه میاشت وخت نیسي، له هغه وخته چې یو څوک له خپل ښاره د مکې په لورې حرکت کوي او بیا تر هغه وخته چې بیرته خپل ښار ته راګرځي، نو ټول سفر یې په همدې یوه لګښت ترسره کیږي.
په دې لګښتونو کې؛ د حج د سفر ځانګړي وسایل (ځانګړی بکس، احرام او…) ویزه، په ښاري موټرو کې تګ او راتګ (له ښار څخه تر هوايي ډګر او بیا برعکس او همداشان د مکې او مدینې ترمنځ ۴۰۰ کیلومټره فاصله او د همدې یوې میاشتې په ترڅ کې د هوټل او حرم ترمنځ تګ او راتګ) د الوتکې کرایه، حرم ته په نږدې هوټلونو کې یوه میاشتنۍ استوګنه او بیا پکې درې وخته ډوډۍ او میوه، په منا او عرفات کې خیمه او نور خدمات، د قربانۍ د سهم پېرل او همداشان د حجاجو د کاروان خدمات او نورل ټول لګښتونه چې په دې یوې میاشتې کې ورته اړتیا پیدا کیږي، شامل دي.
په یوه ساده حساب سره پوهېدای شو، چې دا ټول لګښت د حاجیانو د سفر مصرف کیږي او که لږ هم د انصاف په سترګه ورته وګورو نو دا بهر هېواد ته د یوه میاشتني سفر تر ټولو کم لګښت دی، چې اداء کیږي.
په ۱۴۴۰ کال کې د امنیت لپاره د ۱۷ زره عسکرو، درې زره نظامي وسایطو استخدام، د مکې د ښاروالۍ له لوري د خدماتو لپاره د ۲۳ زره کارګرانو، چې اکثریت یې بهرنیان دي، ګمارنه، د ۱۵۶ روغتیايي مرکزونو چمتو کول، چې تر ۳۰ زره ډېر پرسونل پکې بوخت وي، یوازې د دې لګښتونو یوه کوچنۍ برخه ده.
ب: کوم کسان چې حج کوي، نو صدقې او زکات هم ورکوي؛ ځکه حج او زکات داوړه د اسلام ارکان دي.
د یوه رکن اداء کول د بل هغه د ترک دلیل نشي کېدای، مخالف افراد د ناپوهۍ او یا قصد له مخې حج او زکات یو د بل په وړاندې راولي او د انتخاب لپاره یوازې یو غوراوی پرېږدي؛ دا چې یا له فقیرانو سره کمک او یا هم حج، خو البته چې یو فرد په یوه وخت کې هم کولای شي حج وکړي او هم صدقه وکړي، د دې دوو ترمنځ هېڅ ټکر نشته.
هغه کسان چې په حج باور نه لري، هغوی بیا په زکات هم باورمن نه وي، نو هغوی باید داسې نیوکې له سره ونکړي.
ج: هغه کسان چې د حج په سفر نیوکه کوي، ولې په ورته ټینګار سره د نورو خارجي سفرونومخالفت نه کوي، لکه؛ ترکیې، ټایلنډ او اورپا او نورو سیمو ته؟
ولې په ودونو کې د پیسو بې صرفې لګښت باندې نیوکه نه کوي، چې یوازې د څو محدودو ساعتونو لپاره لګول کیږي؟
که چېرته تاسو له یوه داسې چا څخه چې بهرني سفرونه کوي او یا هم د لوړې بیې موټر لري، وغواړی چې پیسې یې دا یې مصرف نه کړي، نو که ډېر درنښت مو وکړي دا به درته ووايي، چې خپله پانګه مې ده او هر ډول مې چې زړه وي مصرفوم یې، پر تا څه اړه لري؟
نو حاجي چې بیت الله ته ځي، هم همداسې ویلای شي، چې خپله شتمني مې ده، پر تاسو څه اړه لري؟
د: د حج د پیسو یوه برخه د قرباني لپاره تخصیص شوې وي، چې بیا د همدې قربانیو غوښې غریبانو (مثلا، ځینې افریقايي هېوادونو) ته استول کیږي، هماغه هېوادونه چې غربي تاړاکګرو یې شتمنۍ لوټ کړې او اوس ورته وايي، چې خدای چېرته دی، چې غږ مو واروي. ( العیاذبالله)
هـ : په ۲۰۱۹ کال یوزاې د عاشقانو د ورځې په مناسبت ۲۰.۷ میلیارده ډالره پیر او پلور شوی، یوازې په یوې ورځې.
محلدین ولې په دې ورځ نه وايي، چې دا پیسې دې فقیرانو ته ورکړل شي، ګواکي چې یوازې د حج په ورځو کې فقیران وږي وي؟!
په ۲۰۱۷ میلادي کال کې له حج او عمرې څخه د یوه کال (۳۵۵) ورځو په لړ کې د عربستان ټوله ګټه ۱۲ میلیارده ډالره وه، خو په امریکا کې د ولنټاین د یوې ورځې دارمد د ټولۍ نړۍ د حاجیانو د یوه کال له ګټې څخه زیاته وه. یو بل وحشناک او ډارونکی جشن په امریکا کې د (هاولوین) تر عنوان لاندې ترسره کیږي، چې په ۲۰۱۹ کال شاوخوا ۱۸۰ میلیون کسانو پکې ګډون کړی و او تقریبا ۸ میلیارده او ۸۰۰ میلیونه ډالر یې د ترسره کېدو لګښتونه شوي.
ولې څوک د هالوین او لسګونو نورو ورته مواردو لګښتونه نه حسابوي، چې د دې نمانځنو پر ځای فقیرانو ته ورکړل شي؟ تر اوسه نه درته معلومه شوې، چې د فقیرانو لپاره زړه خوږی یوازې د اسلام د دښمني لپاره تبلیغ دی او بس؟!
که هالوین اسلامي جشن وای، نو همدا یې د رد لپاره کافي دلیل و او بیا به یې پر ماشومانو باندې د رواني اثر، د تحجر او وحشت د ترویج ادعا کېده او فقیرانو ته یې د لګښتونو د ورکړې خبرو به یې غوږونه کاڼه کړې وه، خو دا چې هاولوین غربي جشن دی، نو ستونزه نه لري او ډېر ښه هم دی!
جالبته نکته دا ده، چې د ګارډین ورځپانې د راپور پر اساس د ۲۰۰۸ او ۲۰۱۳ کلونو ترمنځ ۳۳ ډلو ته ۲۰۶ میلیونه ډالر ورکړل شوي، تر څو د اسلام او مسلمانانو خلاف د نفرت او وېرې حس ایجاد کړي.
که چېرته همدا ۲۰۶ میلیونه ډالر په افریقا کې د لوږې د له منځه وړلو لپاره مصرف شوې وای، څومره پایلې به یې وې؟! خو د اسلام دښمنانو له نظره یوازې د حج په پیسو غربت له منځه وړل کېدای شي.
دوام لري…
By محمد فاتح