الف: د روژې ځانګړي برکتونه او آثار د ټول کال لپاره
د دې مبارکې میاشتې له ځانګړتیاوو او برکتونو څخه یوه دا ده، چې که څوک دا میاشت د عبادت، اطاعت، تقوا او نېکو عملونو سره تېره کړي، نو انشاءالله به یې ټول کال په خیر او سکون کې تېر شي او د برکتونو څخه ډک ژوند به ولري.
حضرت شیخ سرهندي، مجدد الف ثاني رحمةاللهعلیه لیکلي دي: “مبارک رمضان د ټولو خیراتو او برکتونو جامع دی، او د لیلة القدر شپه، چې د دې مبارکې میاشتې خلاصه او روح دی، د دې میاشتې د مغز حیثیت لري، او خپله میاشت د هغې د پوست حیثیت لري. نو که څوک دا میاشت د ټولو نیکیو او حسناتو سره تېره کړي، د دې د خیر او برکت څخه به مالامال شي، او انشاءالله ټول کال به یې په سکون او د برکتونو په سیوري کې تېر شي.” (مکتوباتِ مجدد الف ثاني، مکتوب نمبر ۱۶۲، ج ۱، ص ۳۵۸)
نو راځئ چې د دې الهي تحفې او ارزښتناکې فرصـت څخه سمه ګټه واخلو، ترڅو دا میاشت زموږ د ژوند د بدلون سبب شي.
ب: د انسان په برخليک د رمضان اغېزې
د رمضان مياشت له برکت او رحمت څخه ډکه مياشت ده، دا مياشت دانسان په برخليک مستقيم اغېز لري. هر څوک چې له دې مياشتې څخه په سمه توګه ګټه پورته کړي، د خدای تعالی له رحمت څخه به برخمن شي، او د الله تعالی دا رحمت او ځانګړې پاملرنه به د ټول کال په اوږدو کې ورسره مل وي؛ خو که څوک له دې مياشتې سمه ګټه وانخلي او ځان د الله تعالی له رحمت څخه بې برخې کړي، نو ټول کال او تل به له الهي برکتونو څخه محروم پاتې وي.
لکه څنګه چې حافظ ابن رجب حنبلي په «لطائف المعارف» کې ليکي: «رمضان مياشتې ته رسېدل او پکې روژه نيول د هغه چا لپاره چې الله تعالی د روژې د نیولو توان ورکړی، يو ستر نعمت دی؛ هغه کس چې رمضان میاشت کې د رحمت وړ وګرځي، نو په رښتيا سره مرحوم دی (ټول کال او تل به د الهي رحمت تر سيوري لاندې وي او ژوند به يې له خير، برکت او ارامۍ ډک وي) او څوک چې له دې خير څخه محروم شي، نو محروم دی (ټول کال به له خير او نيکيو بېبرخې وي) او څوک چې د اخرت لپاره له دې مياشتې څخه د ځان لپاره یو څه ذخیره نه کړي، نو هغه کس ملامت دی.» [لطائف المعارف، ص ۲۸۰]
ج: رمضان، د بندګانو د سيالۍ ميدان
الله تعالی د رمضان مياشت د خپلو بندګانو لپاره د سيالۍ ميدان ګرځولی دی، هر څوک چې د دې مياشتې له ګټو څخه په سمه توګه استفاده وکړي او د هغه د اطاعت او رضايت په برخه کې تر نورو وړاندې شي، نو په دنيا او اخرت کې به کامياب او رستګار شي او تل به د الله تعالی له بېپايانه رحمتونو څخه برخمن وي؛ خو هغه څوک چې له دې ارزښتناک فرصت څخه ګټه پورته نه کړي، خپل عبادتونه او اطاعتونه په سمه توګه ترسره نه کړي او نيکیو ته پام ونه کړي، نو په ژوند کې به له الهي برکتونو څخه محروم شي او ستر زيان به وويني.
امام حسن بصري رحمهالله فرمايي: «الله تعالی د رمضان مياشت د خپلو بندګانو لپاره د سيالۍ ميدان ګرځولی دی، ترڅو په دې میاشت کې بندګان د الله تعالی د اطاعت او رضايت د حاصلولو په برخه کې له یوه او بل سره سیالي وکړي او له یوه او بل وړاندې شي، هر هغه ډله چې په دې سیالۍ کې تر نورو مخکې شوه نو بريالي شوه، او هغه ډله چې شاته پاتې شوه نو توان یې وکړ.» [لطائف المعارف، مخ: ۲۷۸]
مسلمان بايد له هر فرصت څخه ګټه پورته کړي؛ ځکه چې دې نړۍ ته د ازموينې لپاره راغلي دي، بې مقصده نه دي پيدا شوي. الله تعالی رمضان د جايزې، تحفې او د خپلو بندګانو لپاره د ګټې په توګه مقرره کې ده ترڅو د دې میاشتې له برکتونو څخه برخمن شي او د نیکو خلکو په ډله کې شامل شي.
د: د ګناهونو بخښنه
د رمضان مياشتې يو بل برکت د ګناهونو بخښنه ده. هر څوک چې د ايمان له مخې او د ثواب په نیت د رمضان روژه ونيسي، نو تېر ګناهونه به یې وبخښل شي.
حضرت ابوهریره رضياللهعنه روايت کوي چې رسول الله صلیاللهعلیهوسلم فرمايلي: «څوک چې د رمضان روژه د ايمان له مخې او د ثواب په نیت ونيسي، د هغه تېر ګناهونه به وبخښل شي. څوک چې د رمضان په شپو کې د ايمان له مخې او د ثواب په نیت په لمانځه ودرېږي، د هغه تېر ګناهونه به وبخښل شي. او څوک چې د قدر په شپه (شب قدر) د ايمان له مخې او د ثواب په نیت عبادت وکړي، د هغه تېر ګناهونه به وبخښل شي.» [صحیح بخاري، ج ۱، ص ۲۲۵]
هر بنده هيله لري چې ګناهونه يې وبخښل شي؛ نو که د رمضان روژه ونیسو او په کامله توګه یې آداب او شرايط رعایت کړو نو ګناهونه به مو وبخښل شي او هغه ډله کې به شامل شو چې له الهي رحمت څخه برخمنه د.
By محمد فاتح