د ښځې د پیدایښت موخه
په اوسني عصر کې د اسلام مخالفین د ښځې موضوع را پورته کوي، ترڅو په خپل ناسم ګمان کې دا مظلوم موجود د اسلامي شریعت له منګولو څخه خلاص کړي، له لګول شویو قیوداتو څخه یې آزاده کړي، او په پای کې عامه افکار او ذهنیتونه د اسلام پر ضد را وپاروي. هغوی داسې ښيي چې ښځې په اسلام کې له هر څه محرومې دي؛ مګر دوی په خپله هېر کړي دي چې د غربيانو او غیر مسلمانو په نظر کې د ښځې عزت او کرامت څومره دى. له همدې امله، په دې څېړنه کې به د اسلام او لوېدیځ تمدن ترمنځ د ښځو حقوق پرتله کړو.
په پیدایښت او معنوي او فزیکي اړخ کې، ښځه د نارینه په څېر له ورته جوهر څخه پیدا شوې او دواړه جنسونه په ماهیت او جوهر کې یو شان دي. د نارینه او ښځې په حقیقت او ماهیت کې هېڅ توپیر نشته. قرآن کریم په واضح ډول فرمایي: «یَا أَیُّهَا النَّاسُ اتَّقُوا رَبَّکُمُ الَّذِی خَلَقَکُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا»
(اې خلکو! د خپل رب څخه ووېرېږئ، هغه ذات چې تاسو یې له یوه نفس څخه پیدا کړي یاست او له همدې نفس څخه یې د هغه ښځه پیدا کړه.)
په بل ځای کې فرمایي: «هُوَ الَّذِی خَلَقَکُم مِّن نَّفْسٍ وَاحِدَةٍ وَجَعَلَ مِنْهَا زَوْجَهَا لِیَسْکُنَ إِلَیْهَا»
([الله تعالی] هغه ذات دی چې تاسو یې له یوه نفس څخه پیدا کړل او له همدې نفس څخه یې د سکون او ارامتیا لپاره د هغه ښځه هم پیدا کړه.)
له همدې امله، په پیدایښت کې ښځه د نارینه په څېر له ورته جوهر څخه جوړه شوې ده. د نر او ښځې د ماهیت د يووالي او ورته والي نظريه یوه قرآني نظریه ده چې په واضح ډول د قرآن له آیتونو څخه ترلاسه کېږي.
هر کله چې قرآن د هغو کمالونو او لوړو ارزښتونو خبره کوي چې انسانان یې ترلاسه کولی شي، ښځې هم د نارینه وو سره مساوي ذکر کوي: «إِنَّ الْمُسْلِمِینَ وَالْمُسْلِمَاتِ وَالْمُؤْمِنِینَ وَالْمُؤْمِنَاتِ وَالْقَانِتِینَ وَالْقَانِتَاتِ وَالصَّادِقِینَ وَالصَّادِقَاتِ وَالصَّابِرِینَ وَالصَّابِرَاتِ وَالْخَاشِعِینَ وَالْخَاشِعَاتِ وَالْمُتَصَدِّقِینَ وَالْمُتَصَدِّقَاتِ وَالصَّائِمِینَ وَالصَّائِمَاتِ وَالْحَافِظِینَ فُرُوجَهُمْ وَالْحَافِظَاتِ وَالذَّاکِرِینَ اللَّهَ کَثِیرًا وَالذَّاکِرَاتِ أَعَدَّ اللَّهُ لَهُم مَّغْفِرَةً وَأَجْرًا عَظِیمًا»
(الله جل جلاله د مسلمانو نارینه وو او مسلمانو ښځو، مؤمنانو نارینه وو او مؤمنو ښځو، فرمانبردارو نارینه وو او فرمانبردارو ښځو، رښتینو نارینه او رښتینو ښځو، صبر کوونکو نارینه وو او صبر کوونکو ښځو، له خدایه وېرېدونکو نارینه وو او له خدایه وېرېدونکو ښځو، صدقه ورکوونکو نارینه وو او صدقه ورکوونکو ښځو، روژه نیوونکو نارینه وو او روژه نیوونکو ښځو، پاک نفسه نارینه وو او پاک لمنو ښځو، او هغه نارینه چې الله ډېر یادوي او هغه ښځې چې الله ډېر یادوي، د دوی (ټولو) لپاره بخښنه او لوی اجر چمتو کړی دی.)
په دې مبارک آیت کې اسلام او ایمان، اطاعت او خیرات، صبر او عاجزي، روژه او پرهېزګاري، عفت او ډېر ذکرونه د نارینه او ښځینه لپاره په مساوي ډول ذکر شوي دي. له دواړو جنسونو څخه هر یو غواړي چې دغه مقامونه او درجات ترلاسه کړي او د نږديوالي او روحانیت لوړو پوړونو ته ورسیږي.
By محمد فاتح