حضرت فیروز دیلمي رضی الله عنه (اوولسمه برخه)

لیکوال: زید

حضرت فیروز دیلمي رضی الله عنه (اوولسمه برخه)

د احادیثو ځینې کتابونه چې د حضرت فیروز دیلمي رضي الله عنه حدیثونه یې ذکر کړي دي

ډېرو سترو امامانو او محدثينو په خپلو کتابونو کې د حضرت فيروز ديلمي رضي الله عنه حديثونه او مناقب ثبت کړي دي. خو د متن د اختصار او د ټولو کتابونو د ذکر کولو د نه اړتیا لپاره، ځینو ته به اشاره وکړو:

• امام ابو عبدالله، محمد بن اسماعیل بخاري رحمه الله په “الجامع الصحیح” کې.

• امام مسلم ابن حجاج نیشابوري رحمه الله په “صحیح مسلم” کې.

• امام ابوداود، سلیمان ابن اشعث سجستاني رحمه الله په “سنن ابي داود” کې.

• امام ابو عیسی محمد ابن عیسی ترمذي رحمه الله په “سنن ترمذي” کې.

• امام ابو عبدالرحمن احمد ابن شعیب نسايي رحمه الله په “سنن النسائي” کې.

• امام ابن ماجه محمد بن یزید قزویني رحمه الله په “سنن ابن ماجه” کې.

• امام احمد بن ابی بکر بن اسماعیل البویصري رحمه الله په “إتحاف الخيرة المهرة بزوائد المسانيد العشرة” کي.

• امام تقي الدین ابو الفتح محمد بن علي بن وھب بن مطیع قشیري چې په ابن دقیق العید رحمه الله مشهور دی، په “الإلمام بأحاديث الأحكام” کې.

• امام احمد بن حسین بن علي بن موسی ابوبکر بیهقي رحمه الله په “سنن بیهقی” کې.

• امام حافظ بن عمر دارالقطني رحمه الله په “سنن الدارقطنی” کې.

د حضرت سیدنا فیروز دیلمي رضي الله عنه وفات

د حضرت فيروز ديلمي رضي الله عنه د وفات دقيقه نېټه معلومه نه ده، خو د سیرت او تاریخ په ټولو کتابونو کې راغلي دي چې هغه د حضرت سيدنا عثمان رضي الله عنه د خلافت پر مهال په یمن کې وفات شوی دی، لکه څنګه چې امام ابن سعد رحمه الله هم په خپل کتاب “طبقات” کې ذکر کړی دی.

دا د داسي ستر سړي او قهرمان ژوند و، چې خپل په غښتلتیا او زړورتیا سره وتوانید چې د علم، جهاد، دعوت او عزیمت په میدان کې وځلیږي، او د خدای او رسول صلی الله علیه و سلم رضایت لاسته راوړي.

د اسلام د دغو مشرانو او رهبرانو د ژوند د څېړلو اصلي موخه د دوی له ژوند سره سمون او د هغوی له عملي ژوند سره ځان برابرول دي او موږ باید د هغوی ځانګړنې او صفات په خپل ژوند کې پلي کړو.

الله تعالی دې ټول اسلامي امت ته د عمل کولو توفیق ورکړي.