د الله توره «خالد بن ولید رض» ژوند ته لنډه کتنه (اووه څلوېښتمه برخه)

لیکوال: زید

د الله توره «خالد بن ولید رض» ژوند ته لنډه کتنه (اووه څلوېښتمه برخه)

 د بیت الله شریف زیارت کول

 حضرت سيدنا خالد بن وليد رضي الله عنه له ډيرې مودې وروسته د عراق په خاوره کې جګړه پای ته ورسوله او هوډ يې وکړ چې له خپل نازولي او ټپي بدن سره د رب العالمين دربار ته ولاړ شي او له هغه څخه خپل اجر او ثواب ترلاسه کړي.

 حضرت خالد رضی الله عنه د دولسم هجري قمري کال د ذوالقعدې په ۲۵مه د حضرت عاصم بن عمرو په واسطه د حیرې ښار ته اسلامي لښکر ولېږه او خپله یې د څو کسو ملګرو سره  په پټه او په ډېرې چټکۍ  سره د مکې معظمې ښار په لور روان شول؛ دوی و توانیدل چې مکې مکرمې ته په رسېدو او د حج  مناسکو له ادا کولو وروسته بېرته حیرې ښار  ته راستانه شي او د اسلام له لښکر سره یو ځای شول.

 حضرت خالد رضی الله عنه د مسلمانانو د خلیفه له لوري ملات کړل شو

 د حضرت سيدنا خالد بن وليد رضي الله عنه د حج د سفر په اړه هيڅوک خبر نه وو، تر دې چې حیرې ښار ته راستون شو او مجاهدينو يې خریل شوي  سرونه وليدل او پوه شول چې د حج په سفر تللى دى. کله چې دا خبر چې سیدنا خالد رضي الله عنه مکې ته تللی او د اسلام لښکر  یې یوازې پرېښی و، سیدنا صدیق اکبر رضی الله عنه ته ورسېد، ډېر غمجن شو؛ ځکه هغه پوهیده چې رومیان، ایرانیان او عراقیان به په هر وخت کې پر مسلمانانو برید وکړي؛ له همدې امله حضرت ابوبکر صدیق رضی الله عنه لومړی په یوه لیک کې سیدنا خالد بن ولید رضی الله عنه ته د هغه د پرله پسې فتوحاتو او د بیت الله د حج د مبارکۍ پیغام ولېږه، بیا یې ملامت کړ او ویې ویل چې باید له سیمې څخه د حج لپاره نه وای وتلی.

 سيدنا خالد بن وليد رضي الله عنه هم دا خبره ومنله او د اسلام د لښکر په وړاندې يې خپل مسئوليت درک کړ او له دې وروسته يې خپل لښکر يوازې نه پرېښود.

له دې څخه څرګندېږي چې د رسول الله صلی الله علیه وسلم صحابه کرامو د خلیفه د حکم او اطاعت ته څومره اهمیت ورکول. سیدنا خالد بن ولید رضی الله عنه سره له دې چې پخپله یو قومندان او سر لښکر وو او ډېر ملاتړي یې درلودل او کولی یې شوای چې د خلیفه ملامتي بابېزه ګڼلی وای او هغه یې نه وای اورېدلی ، خو بیا هم په پاک او عاجز زړه سره اطاعت یې پرځان واجب ګڼل کې او د اسلام د يوه سرتيري په څېر يې سر ټيټ کړ او د اسلامي خليفه نوي حکم ته يې انتظار وکړ.

 څومره به ښه وي چې مسلمانان همدا اوس هم د خپل امیر او خلیفه پیروي وکړي او له نافرمانۍ او پټو کارونو څخه لاس واخلي.

 حقیقت دا دی چې د دغو مشرانو ژوند د ټولنې د ټولو غړو لپاره یو درس او مثال دی. که موږ له دې مشرانو څخه یو الهام واخلو، ډاډه اوسئ چې موږ به د بریا او خوښۍ لاره ومومو او خپل منزل ته به ورسیږو؛ ځکه چې دا ټول مشران د محمد صلی الله علیه وسلم د ژوند او عملي چلند سمبول او ملګري دي.

ادامه لري…