(رسنۍ او نرمه جګړه (شلمه برخه

لیکوال: م. فراهي توجګي

(رسنۍ او نرمه جګړه (شلمه برخه

په تېره لیکنه کې مو د نرمې جګړې د مفهوم او تعریف پر اهمیت بحث وکړ، په دې څېړنه کې به په ډله ییزو رسنیو کې د نرمې جګړې پر طریقو او تاکتیکونو بحث وکړو.

دا یو نه انکار کیدونکی حقیقت دی چې د دریمې نړۍ په نامه ټولنې او هیوادونه د نرمې جګړې په ډګر کې دي. داسې جګړه چې د خلکو د افکارو او د زړونو د رضایت ترلاسه کولو له لاري د ولسونو باورونه بدل کړي.

د «رسنیو د پوهې لپاره» په کتاب کې ارشمیدس ویلي دي: « ما ته په نړۍ کې د اتکا یو ټکی راوښیاست چې د هغه په واسطه نړۍ ته حرکت ورکړم.»

مارشال مک لوهان، د “Global Village” یا د «نړیوال کلي» تیورۍ بنسټ ایښودونکی، چې د ډله ایزو اړیکو د زیږون راهیسې د رسنیو په ټولو برخو کې یې د پښو نښان لیدل کیږي، په دې باور دی چې: “که ارشمیدس ژوندی وای، هغه به رسنیو ته اشاره کړې وای او ویل به یې چې: زه ستاسې سترګي، غوږونه، اعضاء او مغزونه د اتکا د ټکي په توګه کاروم او نړۍ ته چې څنګه غواړم حرکت ورکوم.

که څه هم ارشمیدس نن ژوندى نه دى، خو ظاهراً لويديځ د هغه پر پل باندې پښه ږدي او د رسنيو له لارې يې د خلکو نظرونه په لاس کې نیولي او هر لوري ته يې چې زړه وغواړي، اړوي، او دا یعني د عامه افکارو مرییتوب او غلامي.

لویدیځ د خپلو موخو د ترلاسه کولو لپاره د نرمې جګړې په څیر بېلابیل میتودونه کاروي. په نرمه جګړه کې د بېلابېلو طبقو د نفوذ لپاره د رسنیو، فرهنګي او علمي وسایلو په کارولو سربېره، له بېلابېلو نورو تاکتیکونو کار اخیستل کېږي، چې ځینې یې په لاندې ډول دي:

1. ټاپه وهل: د همدې تکتیک پر بنسټ رسنۍ بېلابېلې کلمې په مثبتو او منفي صفتونو بدلوي او بېلابېلو اشخاصو یا بنسټونو ته یې منسوبوي.

2. شخصیت وژنه: په نرمه جګړه کې، د سختې جګړې خلاف، فزیکي ترور د کرکټر ترور ته ځای نیسي. کله چې د یوه کس په فزیکي توګه وژل ناشووني وي، د رسنیو د نظام او هر ډول تاکتیکونو په کارولو سره لکه: مبالغه کول، شیطان جوړونه او داسې نورو تاکتیکونو له لاري هڅه کیږي چې یو شخصیت ووژني او په دې توګه د خلکو کرکه د هغه سره زیاتوي او د خلکو محبوبیت د هغه سره کموي. .

3. مبالغه او اغراق کول: مبالغه کول د خیالي واقعیت د ثابتولو لپاره یوه لاره ده. د رواني جګړې ماهرین دا تخنیک په ځانګړو حالاتو او پیښو کې کاروي. غربیان د خپلو تکنولوژیکو لاسته راوړنو په مبالغه کولو او د اسلامي نړۍ د هیوادونو د ناکامیو په اغراق سره تل هڅه کوي چې د غربي تمدن په مقابل کې د مسلمانانو مورال کمزوری کړي.

4. زړونو ته ډار او بېره اچول: په دې تکتیک د دښمن د ځواکونو تر منځ د وېرې او ډار رامنځته کول د هغوی د مورال او د هغوی د ارادې د کمزوري کولو لپاره کارول کېږي. په داسې حال کې چې اورېدونکي په بېلابېلو لارو ګواښي او وېروي، د نرمې جګړې کارپوهان دوی ته دا احساس ورکوي چې ښايي د دوی په لاره کې ډېر احتمالي خطرونه او ستونزي وي او په دې توګه د دوی لپاره له ستونزو او کړاوونو ډکه راتلونکې رنګوي.

5. تضاد او شخړه رامنځته کول: دا د هغو تاکتیکونو څخه دی چې د نرم جنګ په بهیر کې مهم او ګټور دي. داسې چې د مدافعینو او ملاتړو په منځ کې د تضاد په واسطه د بل لوري ځواک کمزوری کوي. په مخالف محاذ کې د اختلاف او تفرقې رامنځته کول د تفرقې او ګډوډۍ لامل ګرځي او مخالف د خپلو پلويانو د ټولنې په داخلي ستونزو کې بوختوي او په دې توګه يې واک او انرژي کمېږي او ځواک يې ختمېږي. .

6. لرې کول (سانسور): په دې تاکتیک کې هڅه کیږي چې د نرمې جګړې د نورو تاکتیکونو لپاره مناسب فضا چمتو کړي، په ځانګړې توګه د شایعاتو خپرول، ترڅو د خپل نفوذ ساحه زیاته کړي. په دې تکتیک کې، د خبر د یوې برخې په لرې کولو او د بلې برخې په خپرولو سره، پوښتنې او ابهام رامینځته کوي، په دې توګه، دوی د مختلفو اوازو او شایعاتو د تولید لپاره بنسټ چمتو کوي.

7. انسانیت له منځه وړل او شیطانیت سره نښلول؛ د نرمې یا سختې جګړې پر مهال پر دښمن د برید د توجیه کولو یوه تر ټولو اغېزمنه لار دا ده چې د انسانیت مرتبه له هغه څخه واخیستل شي، کله چې مخالف له خپل انساني رتبې څخه ټیټ شي او د اورېدونکو په ذهن کې د شیطان په توګه راڅرګند شي، د دې شیطان پر وړاندې هر ډول تاوتریخوالی توجیه کیدی شي.

۸. د ناورین وړاندوینې چمتو کول؛ په دې تکتیک کې، د جعلي احصایو او د رواني جګړې د نورو میتودونو په کارولو سره، د تعمیم، ټوټه ویلو، شیطانيت سره نښلول او داسې نورو په ګډون، ویجاړونکي وړاندوینې وړاندې کوي ترڅو دوی د لیدونکو حساسیت زیات کړي او د دوی د غوښتنو او اهدافو پر بنسټ د دوی فکرونه هدایت کړي.

۹. تعمیم: دا پدې مانا ده چې د هغه څه یو ګونګ او مبهم انځور وړاندې کوي چې دوی غواړي هغه وښودي، مګر دوی نه غواړي چې اوریدونکي په ریښتیا پوه شي؛ له همدې امله د ډیرو مفاهیمو اصلي محتوا چې د لویدیځو رسنیو لخوا نشر شوي او په ټولنه کې خپریږي نه څېرل کیږي.

د کورنیو او بهرنیو سیاستونو په دواړو برخو کې د غربي رسنیو تولیدات له مفاهیمو ډک دي لکه نړیوالتوب، ډیموکراسي، ازادي، بشري حقونه او داسې نور. دا هغه مفاهیم دي چې د ځانګړي تعریف او توجیه پرته کارول کیږي ترڅو لیدونکي په ځانګړي شرایطو کې قانع کړي.

10. لوی درواغ؛ دا لرغونی تاکتیک، چې اوس هم په پراخه کچه کارول کیږي، په عمده توګه د مخالف ذهن ته د ډارولو، غولولو او ګډوډولو لپاره کارول کیږي.

دا د جګړې د نرمو میتودونو یوه برخه ده چې لویدیځ یې د هویت د له منځه وړلو لپاره کاروي ترڅو د دوی له لارې خپلو اهدافو ته ورسیږي.