د روژې مُبارکه میاشت د نیکو اعمالو میاشت!

لیکوال: سید مصلح الدین

د روژې مُبارکه میاشت د نیکو اعمالو میاشت!

په دې مُبارکه میاشت کې لوی خدای جل جلاله د ځمکې او آسمانونو سفره(دسترخوان) خپروي او خپل بندګان ورته رابولي، هغه څوک چې له الهي مُحبت څخه ډک وي د هغه بلنه مني او د هغه په ​​سفره(دسترخوان) کې ناسته کوي، دا بندګان د خدای جل جلاله میلمانه دي چې د دوی لپاره د خدای جل جلاله سره پاتې کېدو څخه لویه خوښي بله نشته.

روژه له منیّت(غرور) څخه د جلاوالي میاشت ده، او دا د فکر کولو میاشت ده چې تاسو باید د نورو په اړه فکر وکړئ، که هغه ملګري وي یا اجنبي، د ځان څخه مخکې د دوی حالت ته پام وکړئ.

دا میاشت له ځمکې څخه د خلاصون او آسماني کېدو انسان ته زده کړه ورکوي.

هغه مخلوق چې په ورځني ژوند کې ډوب او سرګردانه وي او د خپل ورک شوي کس په لټه کې وي، سهاري(پېشلمیو) او افطار(روژه ماتي) د خدای جل جلاله دروازې ته ځي او له هغه څخه د خپل کړکېچن حالت څخه د خلاصون غوښتنه کوي او خپل ورک شوی کس چې په حقیقت کې پخپله خدای جل جلاله دی، کرځول غواړي.

روژه د یو بل سره د مهربانۍ، له غیبت څخه ډډه کولو، له درواغو څخه د ځان ساتلو، د نامناسبو کلمو له ویلو څخه پرهېز  او نورو ته تکلیف نه رسول دي(ځان پالنې) میاشت ده، چې دغه مهم جز باید روژه نیونکي تر نورو ډېر په پام کې ونیسي.

د روژې مُبارکه میاشت یوازې د لوږې او تندې د زغملو لپاره نه ده، دا د خلکو لپاره یو فرصت دی چې خپل باطن او ظاهر ته وګوري او یو ځل بیا د نیکو کارونو او بدو کارونو څخه د ځان ساتلو یادونه وکړي.

روژه د انسان جوړونې میاشت ده او روژه د انسان د مادي اړتیاوو لکه د اوبو او خواړو انحصار او په غیر مادي اړتیاوو لکه هوا او حرص باندې د برلاسي کېدو په خاطر عمل کول دي.

روژه د خدای جل جلاله د میلمه پالنې، بخښنې او مهربانۍ میاشت ده او موږ د مسلمانانو په توګه باید په دې میاشت کې په ځان کې د بښنې او مهربانۍ د سیرت د پیاوړتیا لپاره هڅې وکړو.

د روژې مُبارکه میاشت د مطلوبو اخلاقو د پاملرنې فرصت دی، د یو کامل انسان او مؤمن کېدو فرصت دی چې خپل زړه د خدای جل جلاله مُحبت ته تسلیم کړو او خپل زړه له هر ډول انحصار څخه وباسو.

 هو! د روژې د مُبارکې میاشتې فلسفه د لوږې او تندې له زغملو څخه زیاته ده، روژه د قرآنکریم د نزول میاشت ده، داسې قرآن چې د ژوند درسونه یې د آیتونو له مخې زده کوي، خو افسوس چې موږ  د دا آسماني کتاب لکه څنګه چې د ارزښت وړ دی زده کړه نه کوو.

په قرآنکریم کې الله جل جلاله موږ ته ګام په ګام د ژوند کولو سمه لار او د خدمت سمه لار راښيي، په قرآنکریم کې الله تعالی جل جلاله فرمایي: (زما بنده چې ماته یو قدم مخته راشي، زه به زر قدمه مخته ورشم) خو موږ ټولو دا جملې څو څو ځله لوستي، څو څو ځله مو اورېدلي دي، خو څومره مو پرې عمل کړی، باید بېرته خپل ځان ته را وګرځو او له ځان سره صادق واوسو.

رمضان د رمضاء له کلمې څخه اخیستل شوې چې د سختې تودوخې(سوځېدلو) معنیٰ لري، ځکه چې پدې میاشت کې د انسان ګناهونه بخښل کېږي، دغه د روژې مُبارکه میاشت بلل کېږي.

روژه په انسان کې د الله تعالی جل جلاله د خوښې اعمالو په تقویه کولو سره د روح او ذهن د سکون او سلامتیا بنسټ جوړوي او همدارنګه بدن ته د استراحت په ورکولو سره د بدن روغتیا ته ګټه رسوي.

د مسلمانانو د عقیدې له مخې د قدر شپه چې په هغه کې د انسانانو تر ټولو ستره معجزه قرآنکریم په رسول الله صلی الله علیه وسلم نازل شوی دی د روژې په میاشت کې ده.

په ټوله کې، رمضان د اسلام اصلي رُکن دی چې په یو ډول د دوی د عقیدې لپاره د مسلمانانو د کلنۍ تجدید لامل کېږي. د روژې په مُبارکه میاشت کې مسلمان د خپل روح د پاکولو لپاره د قرآنکریم تلاوت کوي، لمونځ کوي او له خپلو ګناهونو څخه توبه باسي او په ټولنه کې اړو کسانو ته هم سخاوت ورکوي. د روژې بله ګټه دا ده چې د بدن په روغتیا اغېزه لري نو دا د بدن د پاکولو پروسه ګڼل کېږي.

برسېره پر دې، د روژې مُبارکه میاشت د نړۍ ګوټ-ګوټ مسلمانان سره متحد کوي او دوی هڅوي چې د اسلامي نظریاتو سره ژوند وکړي نو ښه دا ده چې د دې میاشتې په قدر او کرامت پوه شو او له هغې څخه اعظمي ګټه پورته کړو.

وروستۍ خبره!

روژه د مسلمانانو لپاره ډېره ګټوره میاشت ده. د روژې له عبادت څخه موخه په مسلمانانو کې د قدر، روحانیت، صبر او سخاوت پیدا کول دي.