ام المؤمنین حضرت عائشه رضی‌الله عنها ښه وپیژنو (لومړۍ برخه)

لیکوال: عبیدالله نیمروزی

ام المؤمنین حضرت عائشه رضی‌الله عنها ښه وپیژنو (لومړۍ برخه)

پرته له شک که وغواړو مترقي او پرمخ تلونکې جامعه ولرو، باید ښو او سالمو تربیتي لارو ته توجه وکړو. دا ښې او سالمي لاري، ښو او سالمو میندو ته اړتیا لري، میندي هغه څوک دې چې د ماشوم او راتلونکو نسلونو د سمي تربیې اصلې کار یې تر غاړې دی. که موږ وتوانیږو چې ښې، په ښه تفکر او آند  سالمي میندي ولرو، تر ډیره به مو د سرلوړې او سالمي جامعې په تشکیل کې ګام پورته کړی وي. که چیرته میندي د راتلونکو نسلونو لپاره له ښه تفکر او پروګرامونو برخورداره نه وي، یقیناً چې ټولنه به له ډېرو مشکلاتو سره مخ شي؛ چې په لمړۍ ځل به خپلو میندو ته مشکل جوړونکي وي، ځکه چې داسي ځامن یې ټولنې ته وړاندي کړي دي؛ بناً ضرور ده چې د پرمخ تلونکي او هڅه کونکې جامعې د لاس ته رواړلو لپاره، د ایثارګرو، متدینو او متعهدو میندو په فکر کې شو. ننۍ ډیري خبرې  په تربیتي مواردو و… کې د میندو پر ناتوانۍ او ضعیف والي دلالت ویل کیږي، چې تر یو بریده د ځینو میندو د روحیې د له مینځه تلو سبب هم ګرځیدلي دي.

 آیا رېښتیا هم همدارنګه ده؟ آیا د بشریت د تاریخ په پاڼو کې، داسي ښځې نشو پیدا کوای، چې د ټولنې رهبري یې په لاس کې وه؟

باید یقين ولرو چې د بشریت د تاریخ په مختلفو ادوارو کې، زمري صفته ښځې موجودي وي، چې د زرګونو سړیو لارښونه او تربیه یې کوله.

 داسي د زمرې په شان ښځي هم وې چې  ښه نوم یې په اسماني کتابونو کې د الله جل جلاله  سره د ډیري مینې، صلابت، قاطعیت، او عشق په تناسب ثبت شوي دي. داسي زمري صفته ښځې لکه «مریم، آسیه، خدیجه، عائشه، فاطمةالزهرا و…» چې د بشریت لپاره نوموتي او افتخار جوړونکي وي. کوم څوک کولای شي چې د حضرت آسیه د شجاعت، عشق، ایثار او محبت انکار وکړي، هغه وخت چې فرعون د هغې په بدن میخونه ټک وهل؟ څومره عجیبه  او جالبه صحنه ده، کله چې دا له ستره عزتمنده ښځه د خدای تعالی ګاونډي‌توب د دنیا په عیش، نوش او راحتۍ غوره کوي او د شکنجو او سختیو په مینځ کې وایې: «رَبِّ ابْنِ لِي عِندَكَ بَيْتًا فِي الْجَنَّةِ »(تحریم ۱۱) ترجمه: ای پروردګاره جوړ کړه زما لپاره ستا په ګاونډ کې، کور په جنت کې. تاریخ څنګه کولای شي چې دا صحنې له خپلو پاڼو لرې کړي؟ بشریت څنګه کولای شي، داسې صحنې چې د ډیرو سړیو له لاسه هم نه راځې، له یاده وباسي؟

ښکاره ده چې د رسول اکرم ﷺ د بعثت په وخت کې ښځو غوره حصه د اسلام په کامیابۍ، اسلامي دعوت او په ځمکه د اسلام تسلط کې درلوده.

 آیا تاریخ به د اسلامي دعوت د سرلاري حضرت خدیجة الکبری بنت خویلد موقف هېر کړي؟ او یا به د عمار مور، حضرت سمیه، د اسلام د لاري لمړنۍ شهیده چې تر مرګه په اسلام ثابته پاتې او شهیده شوه، حیرانونکی موقف له یاده وباسي؟

یا به د هغي پېغلي نجلۍ په نوم د حضرت اسماء، چې په ذات النطاقین مشهوره وه موقف نیول هېر کړي؟ او یا د ام‌عمارة او نسیبه موضع نیول د احد په غزوة کې؟ یا د ام‌سلیم موقف د حنین په ورځ؟ او د مؤمنانو د میندو مواقف، (د رسول الله صلی علیه وسلم د مبارکو بی بی یانو) د رسول الله ﷺ د ژوند او حتیٰ پس له وفات یې له یاد یوسې؟  پرته له شک مسلمانه ښځه د اسلام په لومړیو کې، هغه مور وه چې شهادت غوښتونکي اولادونه یې زیږول. ناویانې وې چې خپل خاوندان یې فدایې او سرتیرو عملیاتو ته هڅول. مؤمنې ښځې وي چې شخصاً به یې د خداي په لاره کې رسا ګډون کاوه. بي بي وه چې قران کریم یې حفظ کاوه، د حضرت ﷺ مبارک احادیث به یې روایت کول، او په دینې علومو کې فقیه او پوهه وه، په بصیرت او روڼتیا به یې خلګ د خدای دین ته دعوت کول، امر باالمعروف او نهې عن المنکر به یې کوو، هو! د هغي بي بي په اړه خبرې کوو چې د کَونینو پروردګار د هغې په سبب د مؤمن او منافق، مغرض او مخلص، موحد او مشرک تر مینځ جدایې برقراره کړه، او د خپل نوراني کلام مبارک آیاتونه یې د هغې د ژوند واقعې ته اختصاص کړل.

هو! غواړو د مؤمنانو مور، د رسول الله ﷺ د مبارکې بي بي، د رسول اللهﷺ د وخت معلمه او مربي، د مشرکینو او منافقینو د سترګو خار، د حضرت عائیشه صدیقه طاهره رضی‌الله‌عنها یاد ولیکو. باید ووایو او تل ولیکو او خپل قلم ته ووایو چې ولیکه. ولیکه ای قلمه! زما د مور جاني په اړه، د توحید، عرفان او اخلاص یې ولیکه.

 ای قلمه!  د مهرباني مورکۍ لطف، صفا، صداقت، عطوفت او رشادت ولېکه.

ای قلمه! ولیکه د هغې له سیاسیت زړورتیا او شجاعت یې.

 ریښتیا څومره پوهیږئ چې دا مهربانه مور زموږ پر غاړه څه حق او دَین لري؟  آیا خپل اولادونه مو د هغې په اخلاقو، رفتار، اعمالو، او حتیٰ له مبارک نوم سره یې اشنا کړي دي؟ باید ومنو چې نن ورځ ډیرئ خلګ د مسلمانانو نه د هغې له نوم، صفاتو، اخلاقو او لوړ مقام سره یې بلدتیا نلري؛ دا لوی ظلم دی چې د اسلامی امت ځوانان له خپلې مور سره بیګانه دي، او هیڅ توجه یې د هغې نیکو اوصافو ته نه ده کړي او هغه یې د اسوه او نمونې په عنوان ټولني ته نده ورپیژندلي.

بناً پر موږ لازمه ده چې ددې مبارکې بي بي د شخصیت په اړه تحقیق او تفحص کولو سره، د اندک وخت په ورکولو دا د مهمو مطالبو سلسله تعقیب کړو.