لیکوال: ابو رائف
فراماسونري (برخه: ۲۶)
حيواني سمبولونه او ماسوني دلالتونه (دوام)
(۴) د ژېړې پروانې سمبول
په لرغونو تمدنونو کې د پروانې سمبول ګڼ او بېلابېل دلالتونه لري.
د چینایانو په اند پروانه د تلپاتې ژوند او دوامداره هوساینې نښه ده. د یونانیانو په اند د بقا او روح نښه ده؛ همدارنګه د ښکلې او غولوونکې ښځې سمبول يې هم ګڼي. په عیسویت کې د بیا را ژوندي کېدو نښه ده. د جاپانیانو ترمنځ د ناپوه ښځې د غولولو او خیانت کوونکې معشوقې سمبول بلل کېږي.[۱]
د ماسوني فکر له مخې پروانه پر انساني ذهنونو د تسلط او کنترول سمبول دی، په ځانګړي ډول د هغو رسنيزو او تلويزيوني پروګرامونو له لارې چې ماشومانو ته ځانګړي شوي وي. [2]
(۵) د باز سمبول
باز د لرغونو تمدنونو له سپېڅلو سمبولونو څخه ګڼل کېږي، چې د ځواک، تېزبینۍ او د لید د شدت نښه ده. خو د عیسوي عقیدې له مخې د حضرت مسیح علیه السلام او قدیس «یوحنا انجیلي» سمبول بلل کېږي.
په ماسوني تفکر کې باز د ځواک، زړورتیا او د موخو د ترلاسه کولو په لار کې د استقامت نښه ده او د نړۍ په ګڼو لویو شرکتونو کې د نښان (لوګو) په توګه ترې کار اخیستل کېږي.
د ماسوني باز په یوه سمبولیک انځور کې لیدل کېږي چې په یوه پنجه کې یې «۱۳ غشي» نیولي دي، چې د جګړې او ځواک سمبول دی او په بله پنجه کې «۱۳ د زیتون څانګې» نيولې دي، چې د نړیوالې سولې نښه بلل کېږي.[3]
(۶) د بوم (جغد) سمبول
سره له دې چې جغد په لرغونو تمدنونو کې د شپې، تیاره نړۍ، شر او مرګ سمبول بلل کېده، خو په عین حال کې د حکمت او پوهې نښه هم وه.
جغد (بوم) د لرغوني روم په تمدن کې د حکمت د الهې «مینروا» چې د « ژوپیتر» لور ده، سمبول بلل کېږي؛ دا هغه الهه ده چې په تیاره کې د شیانو د لیدلو وړتیا لري.
خو د ماسونیانو په اند جغد د هغوی له تر ټولو مهمو او ځانګړو سمبولونو څخه دی؛ ځکه دوی ځانونه په دې سیاره کې د حکمت او معرفت یوازیني څښتنان ګڼي.
یاد سمبول همدارنګه پر نړیوالو ملتونو د ماسونیانو اقتصادي واکمنۍ ته اشاره کوي. د جغد سمبول د نړۍ په ګڼو لویو شرکتونو کې د نښو (لوګوګانو) په توګه کارل شوی دی.
په ماسونرۍ کې دا عقیده د سومري دودونو او د هغوی د خدای «مولوخ» تر اغېز لاندې رامنځته شوې ده؛ مولوخ د اور خدای او د جادو پاچا بلل کېږي. همدارنګه د «بوهمین گروو» (Bohemian Grove) په سیمه کې، چې په کالیفورنیا ایالت کې د یوه پټ ځای نوم دی، د بوم یوه ستره مجسمه شتون لري، چې د نړۍ ستر او بانفوذه شخصیتونه په هغه ځای کې سره راټولېږي او د شیطان د تقرب لپاره شیطاني مراسم او مناسک ترسره کوي.[3]
دا ټول د فراماسونرۍ د هغو دلالتونو او نښو یوه برخه ده چې د حیواناني صفاتو او ځانګړنو پر بنسټ طرحه شوې دي.
ادامه لري…
مخکینۍ برخه
سرچينې:
[1]. دلالات الرموز والأرقام المقدسة فی الفکر الماسونی، مخ: ۲۲۷.
[1]. الموسوعة المصورة للرموز التقلیدیة، مخ: ۸۰.
[2]. الرموز فی الفن والأدیان والحیاة، مخ: ۲۰۳.
[3]. دلالات الرموز والأرقام المقدسة فی الفکر الماسونی، مخ: ۲۲۶.