په اسلام کې د ښځې مقام (دریمه برخه)

لیکواله: ام عائشه

په اسلام کې د ښځې مقام (دریمه برخه)

معاصرې ټولنې او له ښځو سره دوه مخی او منافقانه چلند

د ښځو په وړاندې د معاصرو چلندونو د بحث په دوام کې باید دې ته پام وکړو چې په غربي نړۍ او اروپا او هغو ټولنو کې چې اکثراً د ښځو د حقونو د دفاع ادعا کوي او په ټولنیزو ډګرونو کې د ښځو د فعال حضور او په ټولنیزو فعالیتونو کې د هغوی د غیر محدود ګډون غوښتنه کوي. ظاهرا د شفقت او مهربانۍ، رحم او خواخوږي، خير غوښتنې او زړه سوی له مخې غواړي چې ښځې له کوره بهر راووځي او دوی ټینګار کوي چې ښځې په کوڅو او بازارونو، سوداګریزو او صنعتي مرکزونو، کرنې او مالدارۍ، دفترونو او هنري کارونو لکه فلم او تیاتر، نندارو، سپورتونو او د بدن جوړونې، او پوځي کمپونه او اډو کې باید د نارینه وو سره څنګ په څنګ حرکت وکړي، او د ښځو د فعالیتونو ساحه باید د نارینه وو څخه جلا نه وي.

که دغه د مهربانۍ او غوښتنې که په غور وڅیړل شي او د دغو ټولنو فعالیت او له ښځو سره د هغوی چلند په اساسي او بنسټیزه توګه وڅیړل شي، موږ به د دوی دوه ګونی او منافقانه، غیر واقعیت او ناسم چلند ومومو؛ په دې کې د صداقت او حقیقت بوی نشته او په اصل کې دا ټولې غوښتنې چې ظاهراً د ښځو د دفاع او ساتنې تر عنوان لاندې راپورته کېږي، د لاندې دوو عواملو پایلې دې:

د فحشا او بې نظمۍ خپرېدل: دا هغه مهم لامل دی کوم چې دا ټولنې د ښځو دفاع ته اړ کړې او د دې ټولنو تیورۍ پوهان په شهواني انګیزو سره، د عياشو خلکو له غوښتنو سره سم د ژوند په ټولو ورځنيو چارو کې د بېګانه نارينه او ښځو د ګډون غوښتنه کوي.

په دې کې شک نشته چې په دغو ټولنو کې د ښځو له شتون او ګډون څخه د دوی اصلي موخه د ښځو د مقام درناوى او د هغوی مقام ته د ارزښت ورکولو او د هغوی د لوړ مقام درناوى نه دی. بلکي دا يوازې د نارینه وو د نفس تسکین او د ښځو له شتون څخه ناوړه ګټه اخیستل او د یو ډول نفسي ګټو او خوند تر لاسه کول دي. دا یو نه منل کېدونکی حقیقت دی او هغه څه چې واقعاً په دې ټولنو کې پیښیږي د دې باطني کینې او خياثت ښکارندویي کوي چې په هغه کې هیڅ رحم او شفقت نشته.

حرص او اسراف: په پورتنیو ټولنو کې هر څوک د خپلې سرمایې زیاتولو لیوني دي. په دې ټولنو کې ارزښتونو، اخلاقي معیارونو، انساني اخلاقو اسراف او شتمنۍ ته لاره هواره کړې ده. مادي شیان د ژوند لومړنی او وروستی هدف دی. همدا لامل دی چې په دې ټولنو کې د کورنۍ مشر تر هغه وخته پورې د خپلو لګښتونو او نفقې برابرولو ته زړه نه ښه کوي چې ښځه او لور یې په هره ممکنه طریقه کار وکړي او پیسې وګټي. دا ډول ښځې او نجونې باید د خپل ژوند او اړتیاوو د ترلاسه کولو لپاره لارو او بازارونو، ورکشاپونو او کروندو ته مخه کړي. له بلې خوا، ډېری سوداګریز مسولين او د تولیدي ورکشاپونو او سوداګریزو ملکیتونو مالکین د بازار د ودې او د پیرودونکو راجلبولو لپاره د ټیټ معاش سره ښځینه کاري ځواک کاروي.

دوی د یوې ښځې ښکلا او ظرافت، کوم چې خالق د میړه د ذهن د آرامۍ او پاک ژوند لپاره پيدا کړې، د مادي موخو د پوره کولو لپاره، د ډېرو پیسو لاسته راوړلو، بازار ته وده ورکولو او د دوی سوداګرۍ ته وده ورکول په موخه کاروي؛ له همدې امله دوی د خپلو توکو او محصولاتو د معرفي کولو لپاره په اعلاناتو او سوداګریزو پیغامونو کې د ښځو زړه راکښوونکي انځورونه کاروي. په بل عبارت هغه څه چې نن سبا په ختيځ او لويديځ په تېره بيا په پرمختللو هېوادونو کې د ژوند په ډګرونو کې د ښځو د ونډې او شتون په توګه تر سره کېږي، له ظلم، تېري او بې عدالتۍ، د ښځو له سپکاوي پرته بل څه نه دي.

اوس باید دې ټکي ته پام وشي چې د ښځې د دندو او د ژوند د طریقې د بیانولو لپاره، د هغې د نیکۍ او فضیلت د پېژندلو او هغه څه ته چې د ښځې د خوشحالۍ او وقار، ودې او پرمختګ سبب کېږي، باید له کومې سرچینې څخه کارواخلو؟ اصولاً د پریکړې کولو او په دې اړه د نظر څرګندولو لپاره باید کوم مرجع او سرچینې ته وسپارل شي؟

ادامه لري…