لیکوال: محمد عاصم اسماعیلزهي
د طب له نظره د نکاح اهمیت او مقام (اوومه برخه)
د واده فردي او ټولنیزې ګټې
۱- د جنسي غریزې مهار، د عفت ساتنه او له ګناه او فساد څخه ژغورل کیدل
د انسان د خورا مهمو، پیاوړو او بنسټیزو غرایزو یوه یې هم جنسي غریزه ده. که دا غریزه پوره نه شي او یا یې په پوره کولو کې ستونزه پیدا شي، نو د انسان په شخصیت کې ګډوډي، بېثباتي او رواني ناارامي رامنځته کیږي. واده او د کورنۍ جوړول د همدې غریزې د ارضاء مشروع، سالمه، طبیعي او تر ټولو غوره او خوندي لاره ده. نکاح انسان د شیطان له دامونو، د شهوت له ناوړه غوښتنو، انحراف، او ګناه څخه خوندي ساتي.
الله تعالی په خپل مبارک آیت کې فرمایي: “هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ” ژباړه: «هغوی (مېرمنې) ستاسو لپاره جامې دي او تاسو (نارینه) د هغوی لپاره جامې یاست.» [۱] یعني څنګه چې جامه د انسان ستر پټوي، له بد نظر څخه یې ساتي او ښکلا وربښي، همداسې مېړه او ښځه د مشروع جنسي اړیکې له لارې یو بل د انحراف، ګناه او ناوړه لارو څخه ژغوري او عفت یې ساتي.
د دا ډول فتنو او مفاسدو د مخنیوي لپاره رسول الله صلیاللهعلیهوسلم فرمایلي دي: “إذا خطب إليكم من ترضون دينه وخلقه فزوجوه إلا تفعلوا تكن فتنة في الأرض وفساد عريض” ژباړه: «کله چې یو څوک د وادۀ په موخه ستاسې تر دروازې راشي، او دین او اخلاق مو یې خوښ شي، نو خپلې لوڼې ور واده کړئ. که دا کار ونه کړئ، نو پر ځمکه به پراخې فتنې او فسادونه رامنځته شي.» [۲]
۲- د استعدادونو وده او غوړېدل
واده د دې لامل کیږي چې د مېړه او ښځې خلاقیتونه، وړتیاوې او کامیابۍ لا مضبوطې شي، انساني او اخلاقي فضیلتونه په کې لا پیاوړي او فعلیت ته ورسېږي. کله چې له یو نارینه څخه د کور د سرپرست په توګه تمه کېږي چې د اړتیا پر مهال د خپلې کورنۍ ترڅنګ ودرېږي، نو دا تمه د هغه د میړانې، دفاع، او ځوانمردۍ روحیه نوره هم پیاوړې کوي.
همدارنګه، په ښځه کې د مور کېدو حالت او د دې مرحلې ستونزې، د ماشوم پالنې او کورجوړونې مسؤلیتونه د هغې روح ته کمال وربښي. ښځه د صبر، زغم او ایثار له لارې معنوي وده مومي او هڅه کوي چې د کور او کورنۍ د ښه مدیریت لپاره خپلو استعدادونو ته وده ورکړي، د ژوند د چارو پرمخ بیولو کې لا ډېره کامیابه واوسي.[۳]
۳- د نسل بقا
د واده د لويو ګټو له جملې یوه یې د بشریت د نسل بقا ده. الله تعالی د انسان د نسل دوام نکاح او واده پورې تړلی دی. ښایي د انسان په وجود کې د شهوت اېښودل هم همدې هدف ته راجع واوسي، ځکه که الله تعالی غوښتې وای، نو ښایي انسانان یې له شهوت پرته هم پیدا کړي وای؛ خو د دې لپاره چې د انسان نسل د دوام وړ واوسي، واده یې د الهي حکمت یوه برخه ګرځولې ده.
د ماشومانو زېږول د نسلونو تر منځ د تړاو سبب ګرځي، او د صالحو، دیندارو او نېک اولادونو روزنه د ټولنې په اصلاح او نېکمرغۍ کې ستر رول لري. دا چاره د انسان د پیدایښت له اساسي هدف، یعنې د خالق عبادت، سره په بشپړه توګه همغږې ده.
الله تعالی فرمایي: “يَا أَيُّهَا النَّاسُ اتَّقُواْ رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالاً كَثِيراً وَنِسَاء.” ژباړه: «اې خلكو له خپل هغه رب مو وډارشئ چې له يوكس نه يې پيدا كړئ او له هغه يې بيا جوړه ورته پيدا كړه او بيا يې له دغو دواړه ډېر سړي او ښځې خپاره كړل.» [۴]
همدارنګه په سوره بقره کې فرمایي: “نِسَآؤُكُمْ حَرْثٌ لَّكُمْ فَأْتُواْ حَرْثَكُمْ” ژباړه: «ستاسو ښځې ستاسي کروندې (د کرلو ځایونه) دي، نو خپلو کروندو ته مو چې په کوم ډول (طریقه) خوښه وي، راشئ.» [۵]
رسول الله صلیاللهعلیهوسلم فرمایي: “تزوجوا الودود الولود فإني مكاثر بكم الأمم يوم القيامة” ژباړه: «له داسې ښځو سره واده وکړئ چې میناناکې او زیاتې اولاد زېږوونکې وي، ځکه زه د قیامت په ورځ د نورو امتونو پر وړاندې ستاسې په زیاتوالي فخر کوم.» [۶]
دوام لري…
مخکنئ برخه
سرچینې:
[1] سوره بقره، آیت ۱۸۷
[2] الترمذي، الجامع الصحيح، ج ۳، ص ۳۹۴، حدیث ۱۰۸۴، دار إحياء التراث العربي– بیروت
[۳] پناهی، علي احمد، همسرداری، ص ۳۲، ۱۳۹۱هـ، دفتر نشر معارف – تهران
[۴] سوره نساء، آیه ۱
[۵] سوره بقره، آیه ۲۲۳
[۶] مسند احمد، ج ۳، ص ۱۵۸، حدیث ۱۲۶۳۴