شيبې له روژې سره (څوارلسمه برخه)

ليکوال: مهاجر عزیزي

شيبې له روژې سره (څوارلسمه برخه)

د روژې میاشت، برکتونه او فرصتونه

څه ډول له رمضان څخه ډېره ګټه واخلو؟

رمضان ځانګړې او برکتي میاشت ده، چې الله تعالی خپلو بندګانو ته د لویې ډالۍ په توګه ورکړې ده. دا میاشت استثانايي فرصت دی چې الله تعالی غواړي د هغې په وسیله خپل بندګان ځان ته ورنږدې کړي، بښنه ورته وکړي او ځانګړی رحم او مهرباني ورباندې وکړي، په همدې دلیل په دې میاشت کې هر نېک عمل د نورو میاشتو په پرتله څو برابره اجر لري. په دې اړه له پېغمبر صلی الله علیه وسلم څخه مشهور حدیث رانقل شوی دی، چې په ښکلې بڼه په رمضان کې د اعمالو اهمیت او فضیلت بیانوي.

سلمان فارسي رضی‌الله‌عنه روایت کړي چې رسول الله صلی الله علیه وسلم د شعبان میاشتې پر وروستۍ ورځ په خطبه کې داسې وفرمایل: «ای خلکو! سترې میاشتې پر تاسو سیوری غوړولی، له برکت ډکه میاشت چې په هغې کې یوه داسې ده چې تر زرو میاشتو غوره ده، الله تعالی د دې میاشتې روژه واجب کړې او په دې کې یې د شپې قیام مستحب بللی دی. څوک چې په دې مباشت کې یو نېک عمل ترسره کړي، لکه په نورو میاشتو کې یې چې یوه فریضه ترسره کړې وي او څوک چې په دې میاشت کې یوه فریضه ادا کړي، د هغه چا په څېر دی چې له رمضان پرته یې په نورو میاشتو کې اویا فریضې ادا کړې وي.»

سبحان الله! په رمضان کې د یوې فریضې ادا کول په نورو میاشتو کې له ۷۰ فریضو سره برابره ده، څومره لوی اجر، آیا بیا هم غواړو چې په دې میاشت کې غافل پاتې شو؟

هو، رمضان د معنوي ګټې اخیستنې او الله تعالی ته د نږدې کېدو فرصت دی، هغه څوک نېکمرغه دي چې له دې برکتي میاشتې اعظمي ګټه اخلي او د نېکو اعمالو او ډېرو عباداتو په ترسراوي ځان الهي رحمت ته نږدې کوي. په مقابل کې ډېر کسان شته چې د رمضان پر راتلو سربېره په ځان کې بدلون نه رامنځته کوي او له دې بېساري فرصت څخه د توبې او الله تعالی ته د ورګرځېدو لپاره غافل پاتې کېږي.

له بده مرغه ځينې کسان د رمضان شپې په بې‌ګټو کارونو او دنیوي چارو لکه د فیلمونو په لیدلو او لوبو تېروي، د جمعې په لمونځونو لکه تراویح کې ګډون نه کوي، شپه په لټۍ کې سبا کوي او ځینې وخت حتا د سهار لمونځ هم په خپل وخت نه ادا کوي، د ماسپښین او مازیګر لمونځونه هم ډېر وخت ترې قضا کېږي، دا تر ټولو لوی محرومیتونه دي، هغه محرومیت چې نه یوازې د رمضان له برکتونو لرې کېږي، بلکې الله تعالی ته د نږدې کېدو بې‌بدیله فرصتونه هم له لاسه ورکوي.

راځئ په دې مبارکه میاشت کې په عاجزانه توبې، خالص عبادت او نېکو اعمالو سره ځانونه، الهي بې‌پایه رحمت ته نږدې کړو او له دې زرین فرصت څخه اعظمي ګټه واخلو.

په رمضان میاشت کې د اسلافو او د امت د صالحانو وضعیت

راځئ چې په رمضان کې د اسلافو او د امت د صالحانو له حالت څخه خبر شو او ووینو چې هغوی دا له برکتو ډکه میاشت څه ډول تېروله او د رمضان له بېساري فرصت څخه یې څنګه ډېره ګټه اخیستله.

د امام شافعي رحمه‌الله په اړه په یوه روایت کې راغلي چې د رمضان په مبارکه میاشت کې یې خپل ټول وخت د قرآن کریم تلاوت ته ځانګړی کاوه او په دې میاشت کې یې ۶۰ ځله قرآن کریم ختماوه. دا په دې معنا ده چې هغه به هره ورځ دوه ځله د قرآن کریم ختم کاوه. دا د رمضان له فرصتونو څخه د اعظمي ګټې اخیستلو غوره بېلګه ده، که موږ هم هره ورځ یوه ځل قرآن کریم نه شو ختمولی، لږ تر لږه کولی شو چې څو برخې یې تلاوت کړو او له برکتونو یې برخمن شو.

امام ابن جوزي رحمه‌الله په رمضان میاشت کې د امام بخاري رحمه‌الله د حال په ستاینه کې لیکي چې د دې میاشتې په لومړۍ شپه به یې یاران او شاګردان له هغه سره راټولېدل. نوموړي به هغوی ته لمونځ ورکاوه، په هر رکعت کې به یې د قرآن شل آیتونه تلاوت کول، تر دې چې د شپې په اوږدو کې به یې قرآن ختماوه. دا طریقه په دې میاشت کې قرآن او عبادت ته د هغه د ځانګړي اهتمام ښودونکی دی.

له معاصرو علماوو څخه هم مولانا رشید احمد ګنګوهي رحمه الله مهمه بېلګه ده. هغه له ۷۰ کلنۍ په لوړ عمر کې رمضان په ډېر زیار او کوښښ تېراوه. د ماښام تر لمانځه وروسته یې د شپږو رکعتونو پرځای شل رکعته لمونځ ادا کاوه او په دې موده کې به یې د قرآن دوه برخې تلاوت کولې. رکوع او سجدې یې دومره اوږدې وې لکه هېر کړي یې چې وي او د ماخوستن تر لمانځه وړاندې یې د قرآن څو برخې هم تلاوت کولې. د تروایح تر لمانځه وروسته یې لږ دمه کوله او بیا کابو درې ساعته د تهجدو په لمانځه بوختېده. همداراز د ماسپښین تر مانځه وروسته به یې تر مازدیګره د قرآن کریم تلاوت کاوه.

دا روایتونه له رمضان میاشتې څخه په ګټه اخیستنه کې د اسلافو او صالحانو د راسخ قصد او ډېر زیار ښودونکي دي. هغوی په بشپړه توګه له دې زرین فرصت څخه ګټه اخیسته او په عبادت، د قرآن په تلاوت او تهجدو یې ځان الله تعالی ته نږدې کاوه.

راځئ موږ هم له دې بېلګو څخه درس واخلو او رمضان په عبادت او تقوا تېر کړو، چې له بې‌پایه برکتونو یې برخمن شو.

ادامه لري…