لیکوال: عبیدالله "نیمروزی"
علامه سید ابوالحسن ندوي رحمه الله (نولسمه برخه)
د «رابطة العالم الاسلامية» رالېږل شوی پلاوی
«رابطة العالم اسلامي» مؤسسې ته دې خدای اجر ورکړي؛ ځکه چې هغه ما ته افغانستان ته د تګ فرصت او چمتووالی برابر کړ او د هغه هڅې او ټینګار زما پر ډېرو عذرونو، بوختیاوو او د دې خوب د تحقق په لاره کې په پراته خنډونو، برلاسي اوغالب شول. له همدې امله دغې مؤسسې افغانستان، ایران او د لوېدیځې اسیا ځینو عربي هېوادونو ته د سفر لپاره یو پلاوی جوړ کړ او د مجلس دوه غړي، د رابطة العالم الاسلامي بنسټ ایښودونکي د پلاوي د غړو په توګه او ډاکټر عبدالله عباس ندوي یې د منشي او زما ځانګړي همکار او معاون په توګه وټاکه. البته هغه دوه مشهور غړي شیخ سعدي یاسیني له بیروت او شیخ حنیفه محمد حنیفه له سیلان څخه د ځینو دلایلو له امله ونشو کولی هندوستان ته سفر وکړي.
له همدې امله د بنسټ عمومي منشي د سعودي عربستان د شوری د مجلس غړی او د جدې په پاچا عبدالعزیز پوهنتون کې د اسلامي ثقافت استاد، مشهور لیکوال احمد محمد جمال انتخاب کړ، چې یوه مناسبه او د پام وړ ټاکنه وه. هغه د یکشنبې په ورځ د ۱۹۷۳ کال د جون په دریمه نیغ په نیغه له مکې څخه کابل ته روان شو او زموږ سفر د ځینو دلایلو له امله د دوشنبې تر ماسپښین پورې وځنډېد.
د دغه مؤسسې د دارالانشا د عمومي منشي ښاغلي شيخ محمد صالح قزاق په مشرۍ د دغې غونډې او د پروګرامونو د ترتيبولو په اړه د افغانستان له رسمي مقاماتو او په کابل کې د سعودي له سفارت سره اړيکه نيولې وه او هيله يې څرګنده کړه چې دغه هيئت به په دې برخه کې خپل ماموريت په ښه توګه ترسره کړي. د افغانستان حکومت دغه پلاوي ته چې د سترې اسلامي مؤسس استازیتوب یې کاوه، ښه راغلاست ووېل او په مهربانۍ سره ومنل شو. دا مؤسسه چې د اسلامي هېوادونو بې شمېره ستر عالمان او مفکرین او لیکوالان یې غړیتوب لري، په داسې ښار کې موقعیت لري چې د مسلمانانو په زړونو کې لوړ مقام لري. پاچا فیصل، د دوو سپېڅلو جوماتونو خادم او د اسلامي پیوستون ستر ارمانجن د هغې څارنه کوي.
افغان حکومت ټینګار درلود چې پلاوی دې د دوی په سخاوتمندانه مېلمستون کې وي او د پوهنې وزارت د حکومت په استازیتوب عمل کوي او ماموریت ته اسانتیاوې برابروي او د غونډو او لیدنو لپاره پلانونه جوړوي؛ ځکه افغانان په میلمه پالنه د میلمه په کوربه توب مشهور دي. د سعودي عربستان سفارت هم دغه ښه غوښتنه په مننې او قدردانۍ ومنله.
په کابل کې
د دوشنبې په ورځ د جون په ۴ مه ماسپښین مهال موږ په یوه افغان الوتکه کې له ډیلي څخه افغانستان ته سفر وکړ. کله چې اعلان کوونکي اعلان وکړ چې الوتکه کابل ته نږدې ده، نوم یې په غوږونو کې شور او ولوله او په زړونو کې یې جوش او شوق پیدا کړ. په ځايي وخت مازدیګر پنځه بجې الوتکه د کابل په هوايي ډګر کې ښکته شوه. هوا د ډیلي د خراب موسم په پرتله نرمه وه. په دې کتنه کې د سعودي عربستان سفیر، د ښاغلي شیخ محمد احمد شبلي پخوانی ملګری او محترم ورور، چې پخوا په ډهلي کې د سعودي عربستان سفیر و او د ده او د هند د مسلمانانو ترمنځ متقابله مینه او دوستي موجوده وه، ښاغلي علي هم حضور درلود؛ په دغه پلاوي کې د سفارت لومړي سکرتر ښاغلي فوزان، احمد محمد جمال، د کابل پوهنتون د شرعیاتو پوهنځي رئیس ښاغلي غلام محمد نیازي، د ښوونځیو او دیني زده کړو رئیس ښاغلي شیخ محمد اسلام تسلیم، د افغانستان د پوهنې په وزارت کې د کابل د دارالحفاظ مدیر سید محمد یعقوب هاشمي، د شرعیاتو د پوهنځي استاد عبدالرب رسول سیاف چې د پوهنې وزارت نوموړی د پلاوي د ژباړونکي په توګه ټاکلی وو او د کابل یو شمېر علما، پوهان او باوري کسان زموږ هرکلي ته راغلي وو.
موږ په کابل هوټل کې پاتې شوو او دا د دې پلاوي نېکمرغي وه چې څلوېښت کاله وړاندې په دغه هوټل کې حضرت مولانا سید سلیمان ندوي، علامه محمد اقبال لاهوري او سر مسعود هم مېشت شوي وو. د دې توپیر سره چې د هوټل ودانۍ بیا رغول شوې او ډیری سینګارونه په کې کارول شوي دي. د اتاق کړکۍ چې زه په کې وم د امیر عبدالرحمن غازي مقبرې ته پرانیستل کېډه. هغه د انګریزانو په جنګونو او په لرې پرتو سیمو کې د اسلام په خپریدو کې غوره او د ستاینې وړ دریځ درلود. په دې توګه، د هغه ځلانده تاریخ او ښه وختونه زموږ په ذهنونو کې ژوندي شول.
ادامه لري…
