لیکوال: ابو رائف
فراماسونري (برخه: ۲۸)
د شمعدان او شاهي امساوو نښې او دلالتونه
د فراماسونرۍ د نښو او اشارو د پېژندنې په برخه کې يو بل مهم بحث هغه نښې او سمبولونه دي چې د ځانګړو شيانو لکه شمعدان او شاهي امساوو پر بنسټ طرحه شوي دي.
(۱) د «اووه شاخه شمعدان» سمبول
دغه نښه چې په ښکاره ډول له سولې سره د مينې سمبول معرفي کېږي؛ د صهيونيستي اسراييلو د دولت رسمي نښه ده او د فراماسونرۍ په تفکر کې هم ځانګړی ځای لري.
په ماسوني تفکر کې اووه شاخه شمعدان د هغو غړو شمېر ته اشاره کوي چې له قانوني پلوه د هغوی په شتون کې د ماسوني محفل غونډه رسمي بڼه خپلوي. خو د شاهي ماسونانو په نزد، د دغه شمعدان اووه څراغونه هغو اوو کلونو ته اشاره کوي چې حضرت سلېمان عليه السلام پکې د «لوی معبد (هیکل عظیم)» ودانول بشپړ کړل.
همدارنګه د شمعدان رڼا د « سکينه نور» سمبول ګڼل کېږي؛ هغه رڼا چې په اخرت کې به له هغې پرته بله هېڅ رڼا شتون نه لري.[1]
شمعدان هغه نښه ده چې د قدس په هیکل او د يهودانو په ټولو کنیسو (عبادت ځايونو) کې لګول شوې ده. د دغې شمعدان جوړول يهودي صنعتګر «بصلئیل بن اوري» ته منسوبېږي. بصلئیل بن اوري د يهودا د حور لمسی و. د هغه نوم د خروج په سفر (۳۷/ ۱۷-۲۲) کې ياد شوی دی: «او بصلئیل بن اوري هغه لوښي چې پر مېز ايښودل کېدل(صحاف لوښي) جامونه او کاسې چې د تويولو لپاره کارېدې، له خالصو سرو زرو جوړ کړل او شمعدان يې د خالصو زرو له يوې ټوټې څخه جوړ کړ؛ ستنه(پايه)، ساقه، جامونه، غوټۍ او ګلان ټول یې د سرو زرو وو…[1]»
(۲) د «دوو مارانو او امسا» شعار
د د دوو مارانو د امسا شعار په دې دلالت کوي چې ماسوني سازمان د نړۍ په کچه د روغتيا، طب او درملنې پر بنسټونو تسلط لري او د طب او درملنې د نښان په توګه کارول کېږي؛ حال دا چې د دې سمبول اصلي او لرغونی مفهوم تحريف شوی دی. په اصل کې یاده نښه د «اسکلپیوس امسا» ته منسوبه ده، چې د يوناني اساطيرو د طب او شفا خدای و. د هغه امسا يوازې له يوې لکړې او يو مار څخه جوړه وه، چې پر هغې را تاو شوی و؛ خو وروسته یې معنا بدله شوه او د «هرمس» امسا ته منسوبه شوه، چې د زيوس زوی او د يونانيانو له سترو خدايانو څخه و.
هرمس په يوناني اساطيرو کې د خدايانو د خوړو برابرونکی، تر بلې نړۍ پورې د مړو ارواحو لارښود او بيا يې بېرته ځمکې ته را لېږونکی، د دروغجنو او فرېبکارو خدايانو خدمتګار، د خدايانو استازی او د مسافرو لارښود بلل شوی دی. د هغه امسا دوه وزرونه او دوه ماران لري، چې له دوو مخالفو لورو پرې را تاو شوي دي او د ښکاره تضاد سمبول ګڼل کېږي، چې په لاندې ډول تعبيرېږي:
لومړی مار: د بنسټ اېښودنې، درملنې او خير نښه ده.
دويم مار: د ورانۍ، تباهۍ، زهرو او شر نښه ده.[3]
پایله
(۱) اووه شاخه شمعدان د صهيونيستي اسراييلي دولت رسمي نښه او هغه سمبول دی چې په ټولو هیکلونو او يهودي کنیسو (عبادت ځايونو) کې لګول شوی دی.
(۲) د دوو مارانو امسا د ماسوني سازمان د نړيوالې روغتيا، صحت او درملنې پر بنسټونو د تسلط نښه ګڼل کېږي او د دې امسا لرغونی مفهوم (چې د يونان د لرغونو اساطيرو د طب او د شفا خدای «اسکلپیوس» امسا ته منسوب و) تحريف شوی دی.[4]
دوام لري…
مخکینۍ برخه
سرچینې
[1]. جنزبرج، لوییس، أساطیر الیهود، ص: ۱۵۴-۶ ، ژباړه: حسن حمدی السماحی، دارالکتاب العربی، دمشق، قاهره، لومړۍ چاپ، ۲۰۰۷م.
[2]. دلالات الرموز والأرقام المقدسة فی الفکر الماسونی، ص: ۲۹۹.
[3]. کورتل، آرثل، قاموس أساطیر العالم، ص: ۱۴۰، ژباړه: سهی الطریحی، دار نینوی، دمشق، سوریه، ۱۴۳۰ه.ق.
[4]. دلالات الرموز والأرقام المقدسة فی الفکر الماسونی، ص: ۲۳۰.