لیکوال: ابو رائف
فراماسونري (برخه: ۲۲)
د یوې دایرې په منځ کې د یو بل پر وړاندې د دوو سترګو شعار
د یوې دایرې په منځ کې د یو بل پر وړاندې د دوو سترګو شعار د لرغونو تمدنونو، په ځانګړي ډول د «چیني تاويېزم» فلسفه کې چې د (یانګ ـ یین) سمبول دی، له مهمو نښو څخه ګڼل کېږي.
د «یانګ» کلمه د رڼا، نارینه توب، مثبتوالي، تودوخې، لمر، اوبو او اسماني ځواکونو معنا لري او د «یین» کلمه د تیارو، ښځېوالي، ردوالي، یخنۍ، رطوبت، د ځمکې ځواک او د دې نړۍ د مادي اړخ معنا څرګندوي.
د دې لیدلوري له مخې د ژوند ټولې بڼې د همدې دوو ځواکونو له همغږۍ څخه راپیدا کېږي؛ هغه دوه ځواکونه چې پر انسانانو واکمن ګڼل کېږي، یعنې: د « خیر خدای» او د « شر خدای».
همدارنګه دغه دوه نښې په نړۍ کې د متضادو چارو ترمنځ د تکامل او همغږۍ څرګندونه کوي، چې د هغوی له لارې توازن او کمال رامنځته کېږي او همدا دلالتونه د شیطان پرستو ماسونیانو په باورونو کې هم شتون لري.[۱]
د لاس د دوو ګوتو شعار (خنصر او سبابه)
دا شعار تر ډېره د شیطان پرستو ماسونیانو ترمنځ کارول کېږي، په ځانګړي ډول په مراسمو، جشنونو، د موسیقۍ په کنسرتونو او په ځانګړي ډول د راک موسیقۍ په کنسرتونو کې.
خنصر او سبابه د شیطان د دوو ښکرونو نښه بلل کېږي. ویل کېږي چې خنصر د شیطان سمبول دی او سبابه د مسیح دجال نښه ده.
دا دواړه په ګډه د هغوی ترمنځ د تړون او موافقې سمبول ګڼل کېږي، هغه تړون چې موخه یې د نړۍ غولول او فساد خپرول دي.[۲]
د جمجمې او دوه هډوکو شعار
د جمجمې او هډوکو نښه د مرګ یادونه کوي او څرګندوي چې د ماسونیانو ژوند لنډ دی؛ له همدې امله باید د ماسونیت د موخو د ترلاسه کولو لپاره په دوامدار او چټک ډول کار وکړي.
یاده نښه دوه معناوې لري:
(لومړی) د خبرداري لپاره کارول کېږي او د زهري موادو نښه ده. دا نښه د کیمیاوي موادو او نورو خطرناکو توکو پر سر د خبرداري په توګه نښول کېږي.
(دویم) تاریخي معنا لري او سمندري غلو ته اشاره کوي.
یاده نښه د یوه لرغوني ماسوني ـ یهودي سازمان رښتینی شعار دی چې د «جمجمه او هډوکو سازمان» په نوم پېژندل کېږي او په (۱۸۳۰ز) کال کې رامنځته شوی دی.[۳]
د انسان د نارینه جنسي غړي شعار
یاد شعار د نړیوال صهیونيستي ماسونیت تمایل څرګندوي او موخه یې دا ده چې په خلکو، په ځانګړي ډول په ځوانانو کې فحشا، زنا او بې حده ازادي خپره کړي.[۴]
پایله
د پورته ذکر شوو مواردو پر بنسټ لاندې پایلې ترلاسه کېږي:
(۱) د سترګو شعار د جاسوسي او ترهګریز سازمان نښه ده، چې د ادم وایس هاوپت له خوا رامنځته شوی دی.
(۲) د لاس د دوو ګوتو شعار د شیطان او مسیح دجال نښه ده او د دوی ترمنځ د نړۍ د غولونې او فساد تړون ښيي.
(۳) د جمجمې او دوو هډوکو شعار د یوه ماسوني ـ یهودي سازمان سمبول دی.
ماسونیت په شدت سره د ملتونو او لرغونو تمدنونو (په ځانګړي ډول د فرعوني او چیني تمدنونو) د شعایرو اغېز منلی او دغه نښې یې د خپلو نړیوالو پلانونو مطابق بدلې کړې دي؛ په ځانګړې توګه د سترګو او د یو بل پر وړاندې د دوو سترګو نښې.
همدارنګه ماسونیت د «دوو ګوتو شعار» او د «جمجمې او هډوکو» شعارونه د خپلو ځانګړو معناوو له مخې رامنځته کړې دي.[۵]
دغه نښې او د هغوی تر شا اهداف موږ ته دا پیغام راکوي چې باید د ماسوني افکارو د نفوذ په اړه په خپل ژوند او د اسلامي امت په ژوند کې زیات تدبر وشي او نوی نسل له دې پټو خطرونو څخه خبر کړل شي.
ادامه لري…
مخکینۍ برخه
سرچینې:
[۱]. البنعلي، یوسف، عبّاد الشیطان أخطر الفرق المعاصرة، مخ: ۱۴۸، المکتب الإسلامي، اتم چاپ، ۱۴۲۵هـ ق، بیروت، لبنان.
[۲]. دلالت الرموز والأرقام المقدسة في الفكر الماسوني، مخ: ۲۱۹
[۳]. سیریج، فلیپ، الرموز فی الفن –الأیادیان- الحیاة، مخ: ۲۴۵، د عبدالهادي عباس ژباړه، دمشق، لومړی چاپ، ۱۹۹۲م.
[۴]. هماغه ماخذ، مخ: ۲۵۵.
[۵]. دلالت الرموز والأرقام المقدسة في الفكر الماسوني، مخ: ۲۱۹