د ښه ژوند لپاره ارزښتناکه قرآني لارښوونې (لومړۍ برخه)

لیکوال: امان الله “مختار”

د ښه ژوند لپاره ارزښتناکه قرآني لارښوونې (لومړۍ برخه)

سریزه

خدای تعالی انسان له ټولو ښکلاوو او ځانګړتیاوو سره پیدا کړی او هغه ته یې دا عزت ورکړی چې خپل برخلیک په خپله خوښه وټاکي. دا ځانګړنه انسان د “اراده لرونکي مخلوق” په توګه معرفي کوي.

دا ځانګړنه هغه ته اجازه ورکوي چې خپل او د نورو ژوند تنظیم کړي او نړۍ، د اوسېدو لپاره مناسب ځای وګرځوي. پر دې سربیره انسان د دې پراخې نړۍ یو باعزته او کلیدي مخلوق ګڼل کیږي او د «اشرف المخلوقات» په لقب سره د هغه پر اوږو لوی مسوولیتونه اچول شوي دي. خو د انسان په دغه لاره کې خنډونه هم شته، که له هغو څخه غافل او ناخبر پاتې شي، کېدای شي کندو ته سقوط وکړي او بالاخره ژوند یې په ستړيا سره پای ته ورسېږي.

په هرصورت، د هر انسان په زړه کې د عقل او فکر رڼا شته چې هغه له تیارې څخه رڼا ته رسوي. مهربان او عالم خدای، اسماني کتاب رالیږلی ترڅو د انسان ژوند تنظیم کړي او کمال او هوساینې ته یې هدایت کړي. دا کتاب په تیاره کې د څراغ په څیر، له بې لارۍ څخه انسان ژغوري او زړونه په روښانه میثاق سره حق ته راوباسي.

کله چې یو څوک دا کتاب په خپلو لاسونو سره لمس کړي او د هغه په موضوعاتو کې غور وکړي، له ستړیا څخه به خلاص شي او د امید او اطمینان باغ ته به ورسیږي. او په پسرلي کې د ګل په څیر، خپل ژوند به د ښکلا او خوښۍ څخه ډک کړي او د خپلو هیلو په لور، په ټینګ او ډاډمن ګامونو سره به حرکت وکړي. په حقیقت کې په دې سپیڅلي کلام کې پټه پوهه او حکمت لکه د شپې په زړه کې د رڼا په څیر، انسان سره د ارامتیا او ځان پوهنې په لټون کې مرسته کوي.

دغه کسان یو پیاوړی شخصیت لري چې د زمانې د اندیښنو له امله نشي ماتیدلی او د ژوند د بېلابېلو شرایطو او حالاتو سره په خورا هوښیارۍ سره تطابق کوي. د دوی دغه ځواک او انرژي له خورا قوي ځای څخه سرچینه اخلي چې کولای شو هغه د “قرآن لوړ ځواک” وبولو. او پایله کې، دغه خلک د ژوند په بېلابېلو اړخونو کې بریالي کیږي.

دوی له ننګونو او ستونزو څخه کار اخلي او هغه د زېنو په توګه کاروي او د نېکمرغۍ او روحي او معنوي هوساینو په لور پورته کیږي.

په بلې خوا کې هغه ډله ده چې د دې «ژوند ورکوونکي کتاب» څخه یې مخ اړولی دی. هغه ډله چې خپل ژوند یې په ماديت سره تباهۍ ته کش کړی دی، هغه تباهي چې له هغې څخه وتل خورا ستونزمن دی.

هغه پوښتنه چې دلته باید وپوښتل شي دا ده چې د دغو دوو ډلو د پلویانو او مخالفانو تر منځ توپیر څه دی او اصلاً د دوی په کار کې ستونزه چیرته ده؟

 د ځوانانو د ناکامۍ او خپګان په برخه کې معمول مفکوره تر ډېره حده اقتصادي ستونزې ګڼل کیږي، یعني اوس مهال ډیری فکر کوي چې پیسې او شتمني راټولول د ځوانانو اصلي اندېښنه ده او وايي: که ځوانان په دې برخه کې بریالي نه شي، کیدای شي سخت رواني زخمونه ورته پیدا شي. تر یوه حده دا ممکنه ده او د منلو وړ ده، خو دا ناشونې ده، چې ټول ځوانان یوازې د پیسو او مادي اسانتیاوو په خاطر بې تفاوته او خپه وي.

شتمني نشي کولی یو څوک نېکمرغه کړي (هغه نېکمرغي چې په هغه کې ارامتیا وي). پداسې حال کې چې کولای شي هوساینه راوړي خو ارامتیا نه راوړي، ارامتیا د هوساینې څخه توپیر لري. یعني داسې کسان هم شته چې ژوند یې په ډېرو لږو وسایلو سره نېکمرغه کړی دی.

 هغه ډله چې ژوند فتح کوي او هغه ډله چې نشي کولی د مادي ستونزو له کوچنیو څپو څخه د خپل ژوند بیړۍ وژغوري په مینځ کې یو شی مشترک دی؛ هغه د ژوند کولو لاره ده. هغه خلک چې د ځان لپاره یې غلطه لاره غوره کړه له ستونزو کړاوونو سره مخ شول او هغه خلک چې د ژوند سمه لاره او اصل یې غوره کړ، بریالي شول او د نېکمرغۍ لاره یې وموندل.

نو د دې لپاره چې یو نېکمرغه او خوشاله ژوند ولرو باید خپل:

۱- انفرادي ژوند

۲- کورني ژوند

۳-ټولنیز ژوند

د هغه لارښوونو سره عیار کړو چې د ښه ژوند کولو لپاره موږ ته یوه رغنده لارښوونې راکوي چې د زلالو اوبو او د ژوند د درملنې د نسخې په څیر دي. نو په دې لیکنه او د هغې په لړۍ کې هڅه کوو چې پر دې حیاتي لارښوونو لیکنې وکړو چې هغه کسان چې ژوند یې ورک کړی او سرګردانه ګرځي بېرته ښه ژوند ته راوګرځي. ان شاء الله

ادامه لري…