په اسلام کې د ښځې مقام (پنځه پنځوسمه برخه)

لیکواله: ام عایشه

په اسلام کې د ښځې مقام (پنځه پنځوسمه برخه)

په ښځو باندې د زور زیاتي او تېري په وړاندې د دولتونو پاتې راتلل

دولتونه د هغو ښځو د شمېر د زیاتېدو په وړاندې، چې د تېري او ځورونې ښکار شوي دي، بې وسه دي. د ۲۰۰۴ زېږدیز کال د اکتوبر په میاشت کې د «العالم الدبلوماسي» مجلې د ښځو په اړه لاندې دردوونکي معلومات خپاره کړل:

• په جرمني هېواد کې هر څلور ورځو کې درې ښځې وژل کېږي.

• په انګلستان کې هر درېیو ورځو کې یوه ښځه وژل کېږي.

• په فرانسه کې هر پنځو ورځو کې یوه ښځه وژل کېږي؛ یعنې دا په هره میاشت کې په اوسط ډول شپږ ورځې کېږي.

• په هسپانیه کې هر څلور ورځو کې پر یوې ښځې کورنی تېری ترسره کېږي.

د بښنې نړیوال سازمان د راپور لنډیز په ډاګه کوي چې د نن ورځې جګړه د ښځو پر وړاندې د تاوتریخوالي د حدودو ټاکل او مشخص کول دي. له همدې امله، په اروپا کې د کورني تاوتریخوالي قربانیان شپږ سلنه ښځې دي، چې هر کال د دې آفت له امله خپل ژوند له لاسه ورکوي؛ یعنې هره ورځ په اوسط ډول دوه مېرمنې خپل ژوند له لاسه ورکوي.

په متحده ایالاتو کې هره ورځ پر ۱۹۰۰ ځوانو نجونو جنسي تېری کېږي، چې شل سلنه یې د پلرونو لخوا تر تېري لاندې نیول کېږي. په امریکا کې هر کال یو میلیون ماشومان په قصدي توګه سقط کېږي، او په انګلستان کې هره اونۍ ۱۷۰ ځوانې نجونې د زنا له لارې حامله کېږي.

د ۲۰۰۳ زېږدیز کال د شمېرو له مخې، په ۲۰۰۰ کال کې په هسپانیه کې هر پنځو ورځو کې یوه ښځه د خپل مېړه لخوا وژل کېده، او په برتانیا کې هره اونۍ دوه مېرمنې د خپل مېړه لخوا وژل کېدې.

د ښځو په اړه دا غربي احصایې او ارقام دومره وحشتناک او وېروونکي دي، چې نږدې ده ماشومان یې له وېرې بوډا شي؛ نو د اسلام په وړاندې د دوی دا ادعا چیرته ده چې وايي اسلام د ښځو د فزیکي سزا اجازه ورکوي؟

ولې په دې حقایقو او ارقامو تبصره نه کوي؟ ایا د دوی زړونه تړل شوي؟ د دوی سترګې او زړونه تړلي دي، او د (ښځو پر وړاندې د جرمونو او ظلمونو) احصایې یې له پامه غورځولي دي او د اسلام پر وړاندې یې د کرکې او کینې تر پوښ لاندې نیولي دي.

دا احصایې پخپله ښيي چې د فساد او تباهۍ ځالې، که څه هم ظاهري بڼه یې ښکلې، زړه راښکونکې او ځلانده ده، مګر له دننه څخه په بشپړه توګه خرابې او شړېدلې دي.

په جګړو کې د ښځو پر وړاندې تاوتریخوالی

د جګړو پر مهال د ښځو پر وړاندې تاوتریخوالی په یوه جدي ناروغۍ بدل شوی دی. ډېری وختونه، ډله‌ییز جنسي تېري له مخکې پلان شوي وي او په داسې جدي توګه ترسره کېږي چې د جګړې لپاره هېڅ وسلې ته اړتیا نه لري.

د بشري حقونو د ساتنې سازمان د شمېرو له مخې، په عراق کې د ۲۰۰۳ کال د جګړې پر مهال او له هغه وروسته، څلور سلنه ښځې او نجونې د جنسي تېري ښکار شوې، چې د ځینو عمرونه یې له اتلسو کلونو کم وو.

په بوسنیا او هرزګوینا کې د پنځو میاشتو جګړو او نښتو په ترڅ کې، چې په ۱۹۹۲ کال کې رامنځته شوې، له ۲۰ زرو څخه تر ۵۰ زرو پورې ښځې د جنسي تېري لاندې ونیول شوې.

د بښنې نړیوال سازمان د راپور له مخې، په ۱۹۹۲ کال کې د کوزوو په ځینو کلیو کې د صربستان ځواکونو په دېرشو تر پنځوسو سلنه ښځو جنسي تېری وکړ، چې ځینې یې امیندواره شوې.

دا ظلم د چا لخوا شوی؟ ایا دا بل څه دي پرته له دې چې د متمدنو اروپایانو د لاسونو کار وي؟ هغوی، چې د ښځو د آزادۍ او حقونو ادعا کوي، ایا دا ټولې ستونزې د متمدنې نړۍ په بشپړ لید او اورېدو کې نه دي پېښې شوې؟

د ښځو هغه حقونه چې غربيان یې اعلانوي، چیرته دي؟ د ښځو آزادي چیرته ده؟ د ښځو عزت چیرته دی؟ او له دې پورته، دوی غواړي چې مسلمانې ښځې د خپلو ښځو په څېر لوڅې او بې‌حجابه وي، شراب وپلوري، یا دا چې په ساحل کې لوڅې او بربنډې ګرځي. لکه څنګه چې د دوی مفکرین وايي: په ټولنه کې د تسلط لپاره تر ټولو اسانه لاره دا ده چې ښځې فاسدې کړي او آزادې یې پرېږدي.

د بریتانیې د یوې نوې څېړنې له مخې، په سلو کې اووه دېرش ښځې د خپلو مېړونو یا ملګرو لخوا مجازات کېږي. په فرانسه کې رپوټونه ښيي چې هر کال له یو میلیون څخه زیاتې ښځې له تنبې او سزا سره مخ کېږي.

ادامه لري…