د الله تعالیٰ توره(خالد بن ولید رضي الله عنه) ژوند ته لنډه کتنه (درې ویشتمه برخه)

لیکوال: زید

د الله تعالیٰ جل جلاله توره(خالد بن ولید رضي الله عنه) ژوند ته لنډه کتنه (درې ویشتمه برخه)

د تبوک په غزوه کې حضرت خالد رضي الله عنه

«تبوک» څه شی دی او چېرته موقعیت لري؟

تبوک د یوې لویې سیمې نوم دی چې د مدینې ښار شمال لویدیځ لوري ته په بشپړه توګه د مدینې منورې او د سوریې د دمشق ښار ترمنځ پرته ده.

د تبوک د غزوې اسباب او لاملونه؛

وروسته له دې چې رسول الله صلی الله علیه وسلم د«موتې» له غزوې څخه فارغ شو او د اسلام دُښمنانو ته یې سخت ګوزار ورکړ، رومیانو او عیسویانو بیاځلي له رسول الله صلی الله علیه وسلم سره د جګړې پرېکړه وکړه؛ خو دا ځل د رومي امپراتورۍ په یووالي او اتحاد سره د روم ټول قوتونه د جګړې ډګر ته را ننوتي ترڅو د دوی په ګمان د تاریخ له پاڼې څخه د اسلام او مسلمانانو نوم د تل لپاره له منځه یوسي.

دا خبر د اسلام پېغمبر صلی الله علیه وسلم ته ورسېد، د دې خبر په حقيقت باندې تر پوره ډاډ وروسته یې عمومي اعلان وکړ او ټولو ګرانو اصحابو ته يې خبر ورکړ، چې له روميانو سره د جګړې لپاره تيارى ونيسي.

 په دې جګړه کې کابو دېرش زره مجاهدین د الله تعالیٰ الله جل جلاله د دین د لوړولو لپاره چمتو شول. په دې جګړه کې هیڅ یو منافق شتون نه درلود. د رسول الله صلی الله علیه وسلم ځینې اصحاب هم  و ازمویل شول او له جګړې څخه پاتې شول.

 د تبوک غزوې د پېښېدو نیټه؛

 علامه شلبي رحمه الله لیکي چې د نهم هجري قمري کال د رجب په میاشت کې د اسلام پیغمبر صلی الله علیه وسلم په تبوک کې له رومیانو سره جګړه وکړه.

 دا تاریخ په نورو کتابونو کې هم تائید شوی دی. لنډه دا چې دا غزا  د رجب، شعبان او رمضان تر مياشتو وځنډېده او دا هغه وخت وو چې د مدينې خلك د خپلو ونو او د كجورو باغونو ته د مېوې د راتلو انتظار کاوه او د ګرمۍ او تودوخې درجه ډېره لوړه شوې وه. په داسې توګه چې  د انسان حالت خراب کېده؛  خو بیا هم رسول الله صلی الله علیه وسلم له فرصت څخه په استفادې سره د نړۍ په ګوټ ګوټ کې د اسلام د بیرغ د لوړولو لپاره هر ډول لوږه او تنده وزغمله.

د اسلام د لښکر او د کفر د لښکر شمېر؛

لکه څنګه چې د سیرت او تاریخ په کتابونو کې راغلي دي چې رسول الله صلی الله علیه وسلم د مدینې ټولو خلکو ته د دې سترې او پرېکنده جګړې لپاره د چمتووالي اعلان وکړ او ټولو ته یې امر وکړ چې په هغه سپېڅلي جهاد کې ګډون وکړي؛ خو دا جهاد په داسې وخت کې ترسره شو چې هغه کسان چې په زړونو کې یې دایمي نفاق شتون درلود او یا له ټینګ او پیاوړي ایمان څخه بې برخې ول، تبوک ته د تللو هوډ یې نه درلود؛ ځکه دوی پوهېدل چې مادي امکانات او لګښتونه او داسې نور لږ دي؛  له همدې امله دا مبارزه د ریښتیني مؤمنانو او منافقینو تر منځ د معیار او تشخیص  جګړه وه، او په قران کریم کې په مختلفو ځایونو کې د هغو مؤمنانو ستاینه او تمجید شوې ده چې په دې جهاد کې یې برخه اخیستې وه او هغه څوک چې سرغړونه یې وکړه او وروسته پاتې شول، محکوم او مجازات شول.

خو له دې سره سره څه د پاسه دېرش زره مجاهدین له رسول الله صلی الله علیه وسلم سره یو ځای شول او لوی لښکر یې جوړ کړ.

نور بیا…