لیکوال: مهاجر عزیزي
شیبې له روژې سره (اوولسمه برخه)
د رمضان میاشت؛ برکتونه او فرصتونه
څنګه کولای شو له رمضان څخه پوره پوره ګټه واخلو؟
-
د رمضان د مبارکو شپو قیام
د تراویح او تهجد لمونځ د نبي کریم صلیاللهعلیهوسلم له دوو مهمو او ثابتو سنتونو څخه دي.
دا دواړه لمونځونه د نورو نوافلو په پرتله ترټولو غوره او د ډېر فضیلت لرونکي دي، مشروعیت یې د نبوي سنتو له مخې ثابت دی.
الف: د تراویح لمونځ
د تراویح لمونځ د رمضان د مبارکې میاشتې له مهمو او د ډېر فضیلت لرونکو اعمالو له جملې څخه شمېرل کېږي. دا لمونځ د مبارکې میاشتې له برکتونو څخه د بشپړې ګټې اخیستنې لپاره یو بې ساری فرصت دی.
ب: د تراویح د کلمې ریښه
د “تراویح” کلمه د “ترویحه” جمع ده، چې مانا یې “یو ځل استراحت کول” دي؛ هماغسې لکه څنګه چې “تسلیمه” د “یو ځل سلام ویلو” مانا لري. هغه لمونځ چې د رمضان په شپو کې په جماعت سره ادا کېږي “تراویح” نومول شوي، ځکه کله چې صحابه کرامو رضیاللهعنهم دا لمونځ لومړی ځل په جماعت سره ادا کاوه، نو د هرو دوو سلامونو (څلور رکعتونو) وروسته به یې لږ استراحت کاوه (آرام به یې نیوه).
ج: د تراویح د لمانځه حکم
د تراویح لمونځ سنت مؤکده دی، چې نبي کریم صلیاللهعلیهوسلم هم په خپلو ویناوو کې ټینګار ورباندې کړی او هم یې په عملي ډول ترسره کړی دی. په دې حکم کې نارینه او ښځینه دواړه یو شان شامل دي، او که څوک دا لمونځ له عذر پرته پرېږدي، نو سخت ګناهکاریږي. خو په جماعت سره د تراویح د لمانځه ادا کول سنت کفایي دی؛ یانې که د هرې سیمې یو شمېر خلک یاد لمونځ په جماعت سره ادا کړي، نو له نورو ساقطېږي. خو سره له دې که د تراویح لمونځ په جماعت سره ادا شي نو فضیلت یې ډېر دی.
-
د تراویح د رکعتونو شمېر
