لیکوال: عبدالحي لیان
شیطانپرستي (نولسمه برخه)
د شیطانپرستانو کتابونه، رسمونه او معبدونه
۱. د شیطانپرستانو کتابونه
شیطانپرستان ځینې کتابونه او لیکنې لري چې د دوی د بنسټ ایښودونکو لخوا لیکل شوي. لاندې په دې برخه کې توضیحات وړاندې کوو:
۱.۱ د قانون کتاب
دا کتاب په شلمه پېړۍ کې د شیطانپرستۍ مشهوره څېره “آلیستر کرولي” لخوا لیکل شوی. په ۱۹۰۴ کې، مصر ته د خپلې مېرمنې “رُز” سره د سفر پر مهال، کرولي ادعا وکړه چې د “آیواز” په نامه یوه فرښته له هغه سره خبرې کړې او ځینې لارښوونې یې ورته الهام کړې دي. هغه دا احکام د کتاب په توګه تالیف کړل او “د قانون کتاب” نوم یې ورکړ، او ځان یې د دې الهامونو پیغمبر وباله. هغه دا لارښوونې د “تلما” (Thelema) په نوم د یوې فرقې د جوړښت بنسټ وګرځوله.
کرولي خپل کتاب په درېیو فصلونو کې تنظیم کړ، او هر فصل یې په یوه ورځ او یو ساعت کې ولیکه. د «قانون د کتاب» د لومړي فصل په څلوېښتم څپرکي کې راغلي دي: «هر څه چې غواړې، هغه وکړه؛ دا ټول قانون دی.» دا وینا د تلما فرقې مرکزي شعار وګرځېد.
دا شعار په لومړي ځل په شپاړسمه پېړۍ کې د فرانسوي اومانیست (انسانپال) لیکوال “فرانسیس رابله” لخوا وړاندې شو، او په اتلسمه پېړۍ کې “د دوزخ د اور ټولنې” هم د خپلې ډلې د اصلي شعار په توګه ومنله. دا شعار د تلما فرقې او ورپسې نورو شیطاني ډلو د ډېرو غیر اخلاقي انحرافاتو توجیه کوونکی وګرځېد.
۲.۱ د تلما فرقې مقدس کتاب
“آلیستر کرولي” په ۱۹۰۷ کې د “تلما فرقې مقدس کتاب” تدوین کړ.
۳.۱ د کرولي نور کتابونه او مقالې
کرولي ډېر کتابونه او مقالې لیکلي دي. د هغه ځینې مهم اثار عبارت دي له:
-
“د یوګا په اړه اته ویناوي“
-
“د دروغو کتاب“
-
“د آلیستر کرولي اعترافونه“ (د کرولي ژوندلیک)
-
“د سپوژمۍ زوی“
-
“۷۷۷ او نورې کابالیستي لیکنې“
۴.۱ شیطاني انجیل
“شیطاني انجیل”، چې د نوي شیطانپرستۍ سپیڅلی متن دی، د “آنتوان لاوي” لخوا لیکل شوی او د شیطانپرستۍ په اړه د مقالو، مشاهداتو، شیطاني رسمونو او ځانګړو نظریاتو ټولګه ده.
دا کتاب چې عبراني، یوناني، او انګلیسي عبارات لري، څلور برخې لري چې هره یوه یې د څلورو شیطانانو په نوم نومول شوې ده. دغه شیطانان دا دي:
-
شیطان (Satan): د شیطانپرستۍ پېژندنه وړاندې کوي.
-
لوسیفر (Lucifer): د شیطانپرستۍ په عقایدو او نظریاتو رڼا اچوي؛ (په ځانګړي ډول د جنسي اړیکو په اړه).
-
بلیال (Belial): د شیطان د عبادت او جادوګرۍ تمرینونه بیانوي.
-
لیویتان (Leviathan): د شیطان د عبادت د مراسمو لپاره ځینې متنونه وړاندې کوي.
