لیکوال: مهاجر عزیزي
د مخ پټولو حکم ته تحلیلي کتنه (دریمه برخه)
د پوښښ او حجاب د اصطلاحاتو ترمنځ توپیر
-
د برقعې او نقاب تر منځ توپير: برقعه او نقاب دواړه د مخ پټولو لپاره کارول کيږي. د دوی تر مینځ یوازینی توپیر دا دی چې نقاب په مصنوعي مخ یا ماسک باندې هم اطلاق کیږي چې د څارویو یا خلکو په شکل کې یي.
-
د برقعې او خمار تر منځ توپیر: د برقعې او خمار تر منځ د توپیر په اړه باید ووایو چې دواړه هغه پوښښونه دي چې د مسلمانو ښځو لپاره کارول کیږي، په دې توپیر چې د برقعې سره مسلمانه ښځه خپل مخ پټوي او په خمار سره خپل سر او سینه پټوي.
-
د حجاب او خمار ترمنځ توپیر: حجاب د ښځې ټول بدن پوښي، خو په خمار سره یوازې سر پټوي.
-
د حجاب او برقعې فرق: حجاب د ښځې ټول بدن پټوي، خو برقعه یوازې مخ پټوي.
-
د حجاب او جلباب تر منځ فرق: حجاب یو مطلق پوښښ دی چې د ښځې عورت په بشپړه توګه د نامحرمو له سترګو څخه پټوي او همدارنګه هر هغه شی چې د دوو شیانو تر منځ خنډ وي که هغه دیوال وي یا څادر وي او داسې نور. مګر جلباب یو ځانګړی پوښښ دی چې په ټولو جامو باندې اغوستل کیږي او ټول بدن او مخ پوښي ترڅو یوازې یوه یا دوه سترګې څرګندې شي.
د برقعې شرطونه
برقع يا شرعي حجاب، څو شرطونه لري، که دا شرطونه په کې نه وي نو د شرعي صفت له لاسه ورکوي. دا شرایط په لاندې ډول دي:
-
ټول مخ پټول، پرته له دوو سترګو اندازه چې په هغه لاره وویني؛
-
نباید دومره نازک وي چې مخ ترې څرګند شي؛
-
مزین نه وي.
-
سترګې توري نه وي؛
-
تندی او وریځي باید له هغه څخه ونه لیدل شي.