له خپلو مېرمنو سره د رسول الله صلی الله علیه وسلم د تعامل او چلند ډول
یو له پخوانیو عادتونو او دودونو څخه، چې په کورنیو باندې یې خپل سیوری غوړولی، هغه دا دی چې ښځې ته د یوه راز په توګه کتل کېږي، چې باید پټه وساتل شي، او له نارینه سره یې ښکاره اړیکه د نارینه ارزښت او مقام راټیټوي. خاوند دنده لري چې له کوره بهر څوک پرې نږدي، څو د مېرمنې نوم یې واوري یا پرې پوه شي. که یو له دغو سخت دریځو کسانو څخه ناڅاپه خبر شي چې د هغه د مېرمنې نوم د خلکو غوږونو ته رسېدلی، نو داسې احساس کوي لکه دا بې ننګي د هغه لپاره د زغملو وړ نه وي.
هغه هڅه کوي چې د تګ راتګ پر مهال خپله ښځه له ځان سره ونه ګرځوي، د خپلوانو په کورونو او عامو ځایونو کې یې څنګ ته ونه کښېنوي، او که اړتیا وي چې ورسره ولاړ شي، نو هڅه کوي چې شاته ترې روانه وي، ترڅو څوک پرې پوه نه شي چې ښځه یې ورسره ده.
دا د ځینو کورنیو ناوړه رسم او دود دی، چې د زړه له کومې یې منلی دی. دا چلند نه له قرآن کریم او نه هم له کوم حدیث څخه ثابت شوی دی. ښځه د یو شرموونکي راز په توګه نه ده معرفي شوې، چې باید له صحنې لېرې شي. همدارنګه له نارینه (خاوند یا نورو محارمو) سره د هغې په عامه اړیکو کې د نارینه ارزښت او حیثیت ته زیان نه رسېږي. برعکس، هغه څه چې قرآن کریم پرې حکم کړی او رسول الله صلی الله علیه وسلم ترسره کړي دي، د دې خرافاتو خلاف دي.
رسول الله صلی الله علیه وسلم له خپلې مېرمنې سره په تګ کې د ګناه احساس نه کاوه او نه یې د خپلې مېرمنې په پېژندګلوي یا نوم اخیستلو کې د شرم یا خوارۍ احساس کاوه. رسول الله صلی الله علیه وسلم به له خپلو مېرمنو سره یو ځای له کوره وتل او په یوې لارې به ورسره تګ راتګ کاوه.
په یوه حدیث کې راغلي، رسول الله صلی الله علیه وسلم د شپې له خپلې مېرمنې صفیه رضی الله عنها سره په لاره روان و، چې دوه انصاري سړي ترې تېر شول. کله چې هغوی رسول الله صلی الله علیه وسلم ولید، نو بېړه یې وکړه. رسول الله صلی الله علیه وسلم هغوی ته غږ وکړ او ویې فرمایل: «ورو ورو تګ وکړئ، دا ښځه زما مېرمن صفیه بنت حیی ده.»
هغوی وویل: سبحان الله، ای د خدای رسوله! رسول الله صلی الله علیه وسلم وفرمایل: «بیشکه چې شیطان د انسان په رګونو کې د وینې په څېر جریان لري او زه وېرېدم چې ستاسو په زړه کې به شر واچوي.»
په اوسني وخت کې د رسول الله صلی الله علیه وسلم لارښوونو عملي کول
البته دا باید په پام کې ونیول شي، چې له خپلې مېرمنې سره د وتلو او د هغوی په اړه د بدګومانۍ نه کولو په اړه چې څه بیان شول، د رسول الله صلی الله علیه وسلم او د صحابه کرامو په وخت پورې اړه لري. په دې زمانه کې، چې د فتنې او فساد وخت دی، باید یو څه احتیاط وشي، په ځانګړې توګه په غیر ضروري مواردو کې.
مګر که اړتیا وي، مېرمنو ته باید پاملرنه وشي، پرته له دې چې خلک څه وایي. د بېلګې په توګه، د همدې دود له امله ځینې خلک حتی ډاکټرانو ته د خپلو مېرمنو له بیولو ډډه کوي، او دا د خپل ځان او کورنۍ لپاره ننګ ګڼي.
یو عالم ویلي دي: «پوه شه چې ښه اخلاق دا نه دي چې خپلې مېرمنې ته تکلیف ورنکړې، بلکې ښه اخلاق دا دي چې د هغې ځورونه او تکلیف وزغمې، د هغې د غصې او خپګان په وخت کې نرم اوسې، او په دې اړوند د رسول الله صلی الله علیه وسلم پیروي وکړې؛ ځکه چې د رسول الله صلی الله علیه وسلم مېرمنې به کله کله له هغه سره په لانجه او جر و بحث بوختې وې.»
کله چې موږ د بشریت د لارښود او رهبر رسول الله صلی الله علیه وسلم دغه نېک چلند وینو، باید هر سړی په خپل کور او له خپلو مېرمنو سره د مهربانۍ او نېک چلند سیرت راژوندی کړي او زړونه یې خوشحاله کړي، ترڅو د ژوند سختۍ او کړاوونه لږ څه کم شي. په دې برخه کې د اسلام د ستر پیغمبر صلی الله علیه وسلم پیروي وکړئ او هغه په کورني ژوند کې د خپلې اسوې او بېلګې په توګه وټاکئ.
By محمد فاتح